କେନ୍ଦ୍ର ସରକାରଙ୍କୁ ଗଡକରୀଙ୍କ ସମାଲୋଚନା, ଲୋକଙ୍କ ପରାମର୍ଶ ନନେଇ ସରକାର କରୁଛନ୍ତି କାମ
କନକ ବ୍ୟୁରୋ : କେନ୍ଦ୍ର ରାଜମାର୍ଗ ଓ ପରିବହନ ମନ୍ତ୍ରୀ ନିତୀନ ଗଡକରୀ ପୁଣିଥରେ କେନ୍ଦ୍ର ସରକାର ଓ ପ୍ରଶାସନକୁ ସମାଲୋଚନା କରିଛନ୍ତି । ସେ କହିଛନ୍ତି କି ସରକାର ସମ୍ପୂର୍ଣ୍ଣ ଅହଂକାରୀ ହୋଇପଡିଛନ୍ତି । ସରକାର ଭାବୁଛନ୍ତି କି ତାଙ୍କ ପାଖରେ ସମ୍ପୂର୍ଣ୍ଣ ସୂଚନା ରହିଛି ତେଣୁ ସେ ଲୋକଙ୍କ ପରାମର୍ଶ ଗ୍ରହଣ କରିବାକୁ ରାଜି ହେଉ ନାହାଁନ୍ତି । ଜଣେ ଭଲ ଲୋକ ନିଜ ପାଖରେ ନିନ୍ଦୁକମାନଙ୍କୁ ରଖିଥାଏ ବୋଲି ଗଡକରୀ କହିଛନ୍ତି । ଦିଲ୍ଲୀରେ ଏକ ଘରୋଇ କଂସଲ୍ଟ ଆପ୍ ଉଦଘାଟନ ସମାରୋହରେ ଯୋଗଦେଇ ଗଡକରୀ ଏଭଳି ବୟାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେ ପ୍ରଶାସନକୁ ଦୋଷ ଦେଇ କହିଛନ୍ତି କି ଠିକ୍ ସମୟରେ ନିଷ୍ପତ୍ତି ନନେଇ ପାରିବାରୁ ପ୍ରୋଜେକ୍ଟଗୁଡିକ ଡେରି ହେଉଛି । ସେ ଆହୁରି କହିଛନ୍ତି କି ଜଏଣ୍ଟ ସେକ୍ରେଟାରୀଙ୍କ ଭୁଲକୁ ସେକ୍ରେଟାରୀ ଲୁଚାଉଥିବା ବେଳେ ସେକ୍ରେଟାରୀଙ୍କ ଭୁଲକୁ ମନ୍ତ୍ରୀ ଘଣ୍ଟ ଘୁଡାଉଛନ୍ତି ବୋଲି ଗଡକରୀ ଅଭିଯୋଗ କରିଛନ୍ତି । ହେଲେ ସେ ନିଜକୁ ପରାଦର୍ଶୀ ଓ ଦାୟିତ୍ୱ ନିର୍ବାହ କରିବାକୁ ସକ୍ଷମ ବୋଲି କହିଛନ୍ତି ।
ଅନ୍ୟପଟେ ଜମି ଅଧିଗ୍ରହଣ ସମସ୍ୟାକୁ ନେଇ ସରକାରଙ୍କୁ ବି ଘେରିଛନ୍ତି ଗଡକରୀ । ସେ କହିଛନ୍ତି କି ଲୋକମାନଙ୍କ ପରାମର୍ଶକୁ ସରକାର ଶୁଣୁ ନଥିବାରୁ ଜମି ଅଧିଗ୍ରହଣରେ ସରକାର ବିଶେଷ ସଫଳତା ପାଇପାରୁ ନାହାଁନ୍ତି । ରାଜମାର୍ଗ ପାଇଁ ହେଉଥିବା ଜମି ଅଧିଗ୍ରହଣ ପ୍ରସଙ୍ଗରେ ଗଡକରୀ କହିଛନ୍ତି କି ଜମି ମାଲିକମାନଙ୍କୁ ଜମିର ମୂଲ୍ୟଠାରୁ ଅଧିକ ଦିଆଯାଉଥିବାରୁ ଲୋକମାନେ ଖୁସି ଖୁସିରେ ସରକାରଙ୍କ ହାତକୁ ଜମି ଟେକି ଦେଉଛନ୍ତି ।
କେନ୍ଦ୍ରମନ୍ତ୍ରୀ ନିତୀନ ଗଡକରୀ ସୋମବାରକୁ କନସଲ୍ଟ ଆପ୍ ଲଂଚ୍ କରିଛନ୍ତି । ଏହି କାର୍ଯ୍ୟକ୍ରମରେ ପୂର୍ବ ଆଇଏଏସ ରାଘବ ଚନ୍ଦ୍ରା ଯୋଗଦେଇ କହିଥିଲେ କି ଏହି ଆପରେ ୬୫ ଟି ଅଞ୍ଚଳର ଦେଶର ୩୮୦ ଜଣ ବିଶେଷଜ୍ଞ ଯୋଡି ହୋଇଛନ୍ତି । ନୀତି ଆୟୋଗର ସିଇଓ ଅମିତାଭ କାନ୍ତ ବି ଏହି କାର୍ଯ୍ୟକ୍ରମରେ ସାମିଲ ଥିଲେ । ସେ କହିଥିଲେ କି ଆଗାମୀ ସମୟରେ ନୀତି ଆୟୋଗ ଏହି ଆପର ସହାୟତା ନେବ, କାରଣ ଏହି ଆପରେ ସବୁ ପ୍ରସଙ୍ଗରେ ସହାୟତା ଦେବାକୁ ବିଶେଷଜ୍ଞମାନେ ଯୋଡି ହୋଇଛନ୍ତି ।