ହ୍ୟୁମାନଙ୍କ ପୂଜାଘରେ ରହିଛି ଜଗନ୍ନାଥ ଓ ଦେବାଦେବୀଙ୍କ ମୂର୍ତି । ସବୁ ଧର୍ମକୁ ସମ୍ମାନ ଦେଉଥିବା କହିଲେ ହ୍ୟୁମାନ ।

କନକ ବ୍ୟୁରୋ: ଠାକୁର ଘରେ ଶୋଭା ପାଉଛନ୍ତି ଶ୍ରୀଜିଉ । ତିନିଠାକୁରଙ୍କ ଫଟୋ ସହ ଶ୍ରୀଗଣେଶ ଏବଂ ବିଷ୍ଣୁ ଅବତାରଙ୍କ ଫଟୋ ଚିତ୍ର ମଧ୍ୟ ରହିଛି । ପାଖରେ ହନୁମାନ ଚାଲିସା ରଖାଯାଇଛି । ଠାକୁର ପୂଜା ପାଉଥିବା ଏହି ଘରର ଠିକଣା ହେଉଛି, ସିଡିଏ-୬, କଟକ । ଯେଉଁ ଘରେ ରୁହନ୍ତି ଓଡ଼ିଶାର ଲୋକପ୍ରିୟ କଣ୍ଠଶିଳ୍ପୀ ହ୍ୟୁମାନ ସାଗର ।

ଧର୍ମ ପରିବର୍ତନ ନେଇ ଶ୍ରେୟାଙ୍କ ପକ୍ଷରୁ ହେଉଥିବା ଅଭିଯୋଗ ଏବଂ ଅଭିଯୋଗ ଉପରେ ହ୍ୟୁମାନ ରଖୁଥିବା ସଫେଇ ଭିତରେ, ଏଭଳି କିଛି ଚିତ୍ର ସାମ୍ନାକୁ ଆସିଛି, ଯାହା ହୁଏତ ଭିନ୍ନ ଏକ ଦିଗକୁ ଇସାରା କରୁଛି । ହ୍ୟୁମାନ ସାଗରଙ୍କ କଟକ ଘରେ, ନିର୍ଦ୍ଦିଷ୍ଟ ଭାବରେ ଏକ ପୂଜାଘର ରହିଛି । ଯେଉଁଠି ଓଡ଼ିଆଙ୍କ ଆରାଧ୍ୟ ଠାକୁର ଜଗନ୍ନାଥଙ୍କ ଫଟୋ ଚିତ୍ର ରହିଛି ।

ଶ୍ରେୟାଙ୍କ ଧର୍ମ ପରିବର୍ତନ କରିବା ପାଇଁ ହ୍ୟୁମାନ ସାଗର ଏବଂ ତାଙ୍କ ମା’ ବାରମ୍ବାର ଚାପ ପକାଉଥିବା, ଶ୍ରେୟାଙ୍କ ଓକିଲ ଅଭିଯୋଗ କରିଥିଲେ । କିନ୍ତୁ ଏହି ଅଭିଯୋଗକୁ ଖଣ୍ଡନ କରିଛନ୍ତି ହ୍ୟୁମାନ ସାଗର ଏବଂ ତାଙ୍କ ମା’ । ହ୍ୟୁମାନ କହିଛନ୍ତି- ଘରୁ ବାହାରିବା ପୂର୍ବରୁ ପୂଜା ଘରେ ମୁଣ୍ଡିଆ ମାରି କାମକୁ ଯାଆନ୍ତି । ଧର୍ମପରିର୍ତନ କଥାରେ କୌଣସି ସତ୍ୟାତା ନାହିଁ ।

ହ୍ୟୁମାନ ଏବଂ ଶ୍ରେୟାଙ୍କ ଭିତରେ ସୃଷ୍ଟି ହୋଇଥିବା ଦାମ୍ପତ୍ୟ କଳି, ଭିତରେ ଧର୍ମାନ୍ତିକରଣର ଅଭିଯୋଗକୁ ନେଇ ଉଠିଛି ଅନେକ ପ୍ରଶ୍ନ ?

-ସତରେ କ’ଣ ହ୍ୟୁମାନ, ଶ୍ରେୟାଙ୍କ ଧର୍ମ ପରିବର୍ତ୍ତନ କରିବାକୁ ଚାହୁଁଥିଲେ?
-ହିନ୍ଦୁରୁ ଖ୍ରୀଷ୍ଟିଆନ୍ ହେବା ପାଇଁ ହ୍ୟୁମାନଙ୍କ ପରିବାର ପକ୍ଷରୁ କ’ଣ ସତରେ ଚାପ ପକାଯାଉଥିଲା?
- ନା’ ଘର କଳିକୁ ଆଉ ଏକ ଭିନ୍ନ ଦିଗରେ ମୋଡ଼ି ଦେବାକୁ ଉଦ୍ୟମ କରାଯାଉଛି?