ମାନିବାକୁ ପଡିବ ଚୋରଙ୍କ ସାହସକୁ… ଠାକୁରଙ୍କୁ ବି ଛାଡୁ ନାହାନ୍ତି । ଲୁଟେରାଙ୍କ ଟାର୍ଗେଟରେ ଏବେ ମଠ ମନ୍ଦିର ।
କନକ ବ୍ୟୁରୋ: ଠାକୁରଙ୍କୁ ବି ଛାଡ଼ିଲେନି । ବୌଦ୍ଧର ପ୍ରସିଦ୍ଧ ହନୁମାନ ମନ୍ଦିରରୁ ଗଦା ଓ ଆଭୁଷଣ ଚୋରେଇ ନେଲେ ଲୁଟେରା । ସେହିପରି ବୌଦ୍ଧର ଅଧିଷ୍ଠାତ୍ରୀ ଦେବୀ ମା’ ଭୈରବୀଙ୍କ ମନ୍ଦିରରୁ ମା’ଙ୍କ ସୁନା ଆଖି ଓ ରୂପା ଅଳଙ୍କାର ବି ଲୁଟ୍ ହୋଇଥିବା ଅଭିଯୋଗ ହୋଇଛି । ସେହିପରି ଗାୟତ୍ରୀ ଓ ଶିବ ମନ୍ଦିରର ଦାନ ହୁଣ୍ଡି ଭାଙ୍ଗି ଦାନ ଟଙ୍କା ଲୁଟ୍ ହୋଇଛି । ଦୁଇ ମାସ ଭିତରେ ପ୍ରାୟ ୧୦ରୁ ଅଧିକ ମନ୍ଦିରରୁ ଚୋରି ହୋଇଥିବା ବେଳେ ଲୁଟେରାଙ୍କ ଟେର ପାଉନି ପୋଲିସ । ଘଟଣା ସ୍ଥଳରେ ସନ୍ଧାନୀ କୁକୁର ସହାୟତାରେ ପୋଲିସ ତଦନ୍ତ କରୁଛି ।
Kanak News is now on WhatsApp
Join and get latest news updates delivered to you via WhatsApp
ଜାନୁଆରୀ ୧୮ ତାରିଖରେ ସ୍ଥାନୀୟ ଚନ୍ଦ୍ରଚୂଡ଼ ମନ୍ଦିର ଦାନ ବାକ୍ସ ଭାଙ୍ଗି ଚୋରି ହୋଇଥିବା ବେଳେ ଏହାର ଠିକ୍ ୧୦ ଦିନ ପରେ ୨୮ ତାରିଖରେ ମହାନଦୀ ଗର୍ଭରେ ଥିବା ହନୁମାନ ମନ୍ଦିରରୁ ଚୋରି ହୋଇଥିଲା । ଏନେଇ ବୌଦ୍ଧ ଆଦର୍ଶ ଥାନାରେ ଅଭିଯୋଗ ହୋଇଛି । ସେହିପରି ଜଳେଶ୍ୱର ମନ୍ଦିର, ବାଘରାପାଲି ମନ୍ଦିର, ହରେକୃଷ୍ଣପୁରରେ ଥିବା ଦୁଇଟି ମନ୍ଦିର, ଖଣ୍ଡପଡ଼ା ଶିବ ମନ୍ଦିର, ବନ୍ଧାପଥର ଶିବ ମନ୍ଦିର ଓ ଜଗନ୍ନାଥ ମନ୍ଦିରରୁ ମଧ୍ୟ ଲୁଟ୍ କରିଛନ୍ତି ଲୁଟେରା । ବାରମ୍ବାର ଏଭଳି ଲୁଟ୍ ହେଉଥିବା ବେଳେ ମନ୍ଦିର ପରିସରରେ ସିସିଟିଭି ଲଗାଇବା ସହ ଲୁଟେରା ଗ୍ୟାଙ୍ଗକୁ ଖୁବ୍ ଶୀଘ୍ର ଧରିବାକୁ ଦାବି କରିଛନ୍ତି ପୂଜକ ଓ ଶ୍ରଦ୍ଧାଳୁ ।
ପୋଲିସକୁ ଚ୍ୟାଲେଂଜ କରି ଗୋଟିଏ ପରେ ଗୋଟିଏ ମନ୍ଦିରରୁ ଲୁଟ୍ କରୁଛନ୍ତି ଲୁଟେରା । କଡ଼ା ପେଟ୍ରୋଲିଂ ପରେ ବି ଏଭଳି ଲୁଟ୍ ହେବା ପୋଲିସର ଚିନ୍ତା ବଢ଼ାଇଛି । ଅନ୍ୟପଟେ ମନ୍ଦିର ପରିଚାଳନା କମିଟି ସହ ବୈଠକ କରି ତଦନ୍ତ ଜୋରଦାର କରିଛି ପୋଲିସ ।