କନକ ବ୍ୟୁରୋ : କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ସ୍ୱରକୁ ନକଲି କରି ଫୋନରେ ଜଣେ ହୋଟେଲ ମାଲିକଙ୍କ ସହ କଥା ହୋଇ, ଜଣେ ଠକ କେମିତି ଠକେଇ ପାଇଁ ଯୋଜନା କରିଥିଲା ତାହା ଆମେ ଆପଣଙ୍କୁ ଜଣାଇଥିଲୁ । କିନ୍ତୁ ପ୍ରକୃତରେ ସେହି ଠକ ଜଣଙ୍କ କିଏ ତାହା ସାମନାକୁ ଆସିନଥିଲା । ଏତେ ଦିନ ପରେ ସାମନାକୁ ଯାହା ଆସିଛି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କୃଷିମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ନାଁ କହି ଠକେଇ କରିବାକୁ ଯୋଜନା କରିଥିବା ଠକ ଜଣଙ୍କର କଳା କାରନାମା ଏବେ ପଦାକୁ ଆସିଛି । ପୋଲିସର ସୂଚନା ଅନୁସାରେ ସେହି ଠକେଇ ଯୋଜନାର ମାଷ୍ଟରମାଇଣ୍ଡ ସୌମ୍ୟରଞ୍ଜନ ପ୍ରଧାନ ଓରଫ ସୁଲଗ୍ନା । କିନ୍ତୁ ସେ ଠକେଇ ପାଇଁ କେତେବେଳେ ମା’ ଶିବାନୀ ଦୁର୍ଗା ସାଜନ୍ତି ତ ଆଉ କେତେବେଳେ ମନ୍ତ୍ରୀ ବନି ଯାନ୍ତି । ଭିନ୍ନ ଭିନ୍ନ ପରିଚୟ ଦେଇ , ଅନ୍ୟମାନଙ୍କର ସ୍ୱରକୁ ନକଲ କରି ବଡ ବଡ ଲୋକଙ୍କୁ ଟାର୍ଗେଟ କରିଥାନ୍ତି । ସେମିତି କଟକର ଏକ ଘରୋଇ ହସ୍ପିଟାଲର ମାଲିକଙ୍କୁ ୪୫ହଜାର ଟଙ୍କା ଚୁନା ଲଗାଇବାପରେ ସାଇବର ଥାନାରେ ଅଭିଯୋଗ ହୋଇଥିଲା । ମାମଲାର ତଦନ୍ତ ପରେ ପୋଲିସ ଅଭିଯୁକ୍ତକୁ ଧରିବାରେ ସକ୍ଷମ ହୋଇଛି ।
ସୌମ୍ୟରଞ୍ଜନଙ୍କୁ ପଚରାଉଚୁରା ପରେ ରାଜ୍ୟର ଶହେ ଜଣ ଡାକ୍ତର ଏବଂ ବହୁ ହୋଟେଲ ବ୍ୟବସାୟୀଙ୍କଠାରୁ ପ୍ରାୟ ୧୦ଲକ୍ଷରୁ ଅଧିକ ଟଙ୍କା ଠକି ନେଇଥିବା ଜଣାପଡିଛି । ଗିରଫ ପରେ ଅଭିଯୁକ୍ତ ନିକଟରୁ ଦୁଇଟି ମୋବାଇଲ ଫୋନ, ଦୁଇଟି ଜାଲ ସିମକାର୍ଡ ଏବଂ ବ୍ୟାଙ୍କ ଆକାଉଂଟରେ ଥିବା ୪୬ ହଜାର ୫ଶହ ଟଙ୍କା ଜବତ କରିଛି ପୋଲିସ । ସାଇବର ବିଶେଷଜ୍ଞଙ୍କ ମତରେ ସୁଲଗ୍ନା ଏଆଇ ଆପ୍ ମାଧ୍ୟମରେ ଏପରି ସ୍ୱର ନକଲ କରି ଠକେଇ ହେଉଛି ।
ଅଭିଯୁକ୍ତ ଘରୋଇ ହସ୍ପିଟାଲ, ହୋଟେଲ, ରେସ୍ତୁରାଁ ମାଲିକଙ୍କ ନମ୍ବର ଗୁଗୁଲରୁ ସଂଗ୍ରହ କରି ସେମାନଙ୍କୁ ଟାର୍ଗେଟ କରୁଥିଲା । ଆଉ ବିଭିନ୍ନ ଲୋକଙ୍କ ସ୍ୱର ନକଲ କରି ବିଭିନ୍ନ ଆଳ ଦେଖାଇ ଠକେଇ କରୁଥିଲା । ଆଉ ଧରାପଡିବା ପରେ ଠକ ଓ ଠକେଇର ପର୍ଦାଫାଶ ହୋଇଛି । ତେବେ ଏହି ପ୍ରସଙ୍ଗରେ ପ୍ରତିକ୍ରିୟା ଦେବାକୁ ମନା କରିଦେଇଛନ୍ତି କୃଷିମନ୍ତ୍ରୀ ।