ବୀରପୁଅକୁ ଝୁରୁଛି ଗାଁ, ସହିଦ ଦେବାଶିଷ ବିଶ୍ୱାଳଙ୍କ ପାଇଁ କାନ୍ଦୁଛି ଜନ୍ମମାଟି । ପରିବାର ଉପରେ ଖସିପଡିଛି ଦୁଃଖର ପାହାଡ଼ ।
କନକ ବ୍ୟୁରୋ: ଦେଶର ସୁରକ୍ଷା ପାଇଁ ଘରୁ ବାହାରି ଯାଇଥିବା ପୁଅର ସହିଦ ଖବର ଯେତେ ଘରେ ପହଞ୍ଚିଛି, ଖବରଟି ଚଡ଼କ ଭଳି ପରିବାର’ର ମୁଣ୍ଡରେ ଛିଣ୍ଡିପଡ଼ିଛି । ଅପ୍ରତ୍ୟାଶିତ ଓ ଅବିଶ୍ୱନୀୟ ଖବରଟି ପୁରା ଅଳଗୁମ ପଞ୍ଚାୟତକୁ ଚହଳାଇ ଦେଇଛି । ଘର, ଗାଁ, ସାମଗ୍ରିକ ଭାବେ ପୁରୀ ଜିଲ୍ଲାକୁ ଶୋକରେ ବୁଡ଼ାଇ ଦେଇଛି ।ଏଇ କିଛି ମାସ ତଳେ ଘରରକୁ ଆସିଥିଲେ ଦେବାଶିଷ ବିଶ୍ୱାଳ । କୁନି ଝିଅର ଜନ୍ମଦିନରେ ପ୍ରତିଶ୍ରୁତି ଦେଇ କହିଥିଲେ, ପୁଣି ସମୟ ମିଳିଲେ ସୀମାରୁ ଫେରିଥିବେ । ଦିନକ ପରେ ଦେବାଶିଷ ବିଶ୍ୱାଳ ଏବଂ ପତ୍ନୀ ସୁଶ୍ରୀ ସଙ୍ଗୀତା ବିଶ୍ୱାଳର ପ୍ରଥମ ବିବାହ ବାର୍ଷିକୀ ପାଳିଥାନ୍ତେ । ହେଲେ ତାପୂର୍ବରୁ ଦେବାଶିଷ ମା’ମାଟିର ସୁରକ୍ଷା ପାଇଁ ସବୁଦିନ ପାଇଁ ସହିଦ ହୋଇଯାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୁରୀ ଜିଲ୍ଲା ଅଳଗୁମ ପଞ୍ଚାୟତ ଖଣ୍ଡାୟତ ସାହିରେ ଯେତେବେଳେ ଆମ ପ୍ରତିନିଧି ପହଞ୍ଚିଥିଲେ, ଦେବାଶିଷଙ୍କ ବିୟୋଗ ଖବରର ବିସାଦରେ ବୁଡ଼ି ରହିଥିଲା ପୁରା ଗାଁ । ସାଙ୍ଗ ସାଥୀ ଝୁରୁଥିଲେ, ଆତ୍ମୟୀ ସ୍ୱଜନ ଝୁରୁଥିଲେ । ପରିବାର ଲୋକଙ୍କ ଅବସ୍ଥା ତ’ ଆଖିରେ ଦେଖି ହେଉନଥିଲା ।
ଦେଶର ସୁରକ୍ଷା ପାଇଁ ରାଷ୍ଟ୍ରୀୟ ରାଇଫଲ୍ସର ଯବାନ ଭାବେ ଆତଙ୍କବାଦୀ ନିରୋଧ ଅପରେସନରେ ସାମିଲ ଥିଲେ ଓଡ଼ିଆ ଯବାନ ଲାନ୍ସ ନାଏକ୍ ଦେବାଶିଷ ବିଶ୍ୱାଳ । ହେଲେ ଆତଙ୍କବାଦୀଙ୍କ ଆକ୍ରମଣ ଯୋଗୁଁ ଓଡ଼ିଶାର ଦେବାଶିଷଙ୍କ ସମେତ ୪ ଜଣ ଯବାନଙ୍କୁ ବଳିଦାନ ଦେବାକୁ ପଡ଼ିଛି । ଏହି ଘଟଣାରେ ପଞ୍ଜାବର ହାବିଲଦାର ମନଦୀପ ସିଂ, ଲାନ୍ସ ନାଏକ କୁଲୱନ୍ତ ସିଂ, ସିପାହୀ ହରକ୍ରିଷନ ସିଂ ଏବଂ ସେବକ ସିଂ ସହିଦ ହୋଇଛନ୍ତି । ଓଡ଼ିଶା ଭଳି ପଞ୍ଜାବର ସହିଦ ପରିବାରରେ ମଧ୍ୟ ଦେଖିବାକୁ ମିଳିଛି ଶୋକାକୂଳ ପରିବେଶ ।
ଯେତେବେଳେ ବି ଯବାନ ଦେହରୁ ରକ୍ତ ଝରେ, ସେହି ରକ୍ତ ଦେଶର ୧୪୦ କୋଟି ଜନତାଙ୍କ ଦେହରେ ନିଆଁ ଲଗାଇଦିଏ । ଆଜି ପୁଣି ଥରେ ସେଇଆ ଘଟିଛି ।ଯବାନଙ୍କ ପାଇଁ ସମସ୍ତଙ୍କ ଆଖିରୁ ଲୁହ ଝରୁଛି । ସୀମାର ସୁରକ୍ଷା ପାଇଁ, ଦେଶବାସୀଙ୍କ ସୁରକ୍ଷା ପାଇଁ ବଳିଦାନକୁ ଆଜି ସଲାମ୍ କରୁଛି ସାରା ଦେଶ ।