ହୋଟେଲରେ ବସିବାକୁ ନେଇ ତୁମୁଳକାଣ୍ଡ : ଭାଙ୍ଗିଲା ଟେବୁଲ, ଚେୟାର; ସୋସିଆଲ ମିଡିଆରେ ଭିଡିଓ ଭାଇରାଲ

କନକ ବ୍ୟୁରୋ : ହୋଟେଲରେ ବସିବାକୁ ନେଇ ତୁମୁଳକାଣ୍ଡ । ରାଜଧାନୀ ସ୍ଥିତ ଏକାମ୍ର ହୋଟେଲରେ ଘଟିଛି ଏହି ଅଭାବନୀୟ ଘଟଣା । ସାମାନ୍ୟ କଥାକୁ ନେଇ ଭାଙ୍ଗିଲା ଟେବୁଲ, ଉଡିଲା ଚେୟାର । ପେଟପୂଜା ନାମକ ହୋଟେଲରେ ବସିବାକୁ ନେଇ ଦୁଇ ଗ୍ରାହକଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ସେହି ଗଣ୍ଡଗୋଳର ସମ୍ପୂର୍ଣ୍ଣ ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି । ଆଉ ଭିଡିଓ ଏବେ ଭାଇରାଲ ହେବାରେ ଲାଗିଛି ।

ସୂଚନା ଅନୁସାରେ ଖାଇବା ସମୟରେ ଗୋଡରେ ଚେୟାର ବାଜି ଯିବାରୁ ଉତ୍ୟକ୍ତ ହୋଇଯାଇଥିଲେ ଜଣେ ଯୁବକ । ଏହି କଥାକୁ ନେଇ ରାଗିଯାଇ ସମସ୍ତଙ୍କ ସାମ୍ନାରେ ଅନ୍ୟ ଯୁବକଙ୍କୁ ନିସ୍ତୁକ ମାଡ ମାରିଥିଲେ । ଖବର ପାଇ ଖାରବେଳନଗର ଥାନା ପୁଲିସ ଘଟଣାସ୍ଥଳରେ ପହଞ୍ଚିଥିଲା । ଗଣ୍ଡଗୋଳ କରିଥିବା ଯୁବକ ଝାରପଡା ଅଞ୍ଚଳର ପ୍ରଭାତ କୁମାର ମାର୍ଥା ବୋଲି ପୁଲିସ ଚିହ୍ନଟ କରିଛି । ମାଡଖାଇଥିବା ଯୁବକଙ୍କ ଅଭିଯୋଗ ଆଧାରରେ ଏବେ ପୁଲିସ ତଦନ୍ତ ଚଲାଇଛି ।