ରାଜ୍ୟରେ ଘୁଞ୍ଚିଲା ଗର୍ଭବତୀଙ୍କ ଟିକାକରଣ, ଟ୍ରେନିଂ ପରେ ଦିଆଯିବ ଟିକା । ସବୁ ଜିଲ୍ଲାପାଳ, ମ୍ୟୁନିସିପାଲ କମିଶନର ଓ ସିଡିଏମଓଙ୍କୁ ଚିଠି ଲେଖି ଜଣାଇଲେ ଏସିଏସ୍ ।
କେନ୍ଦ୍ର ମାର୍ଗଦର୍ଶିକା ଆସି ସାରିଥିଲେ ବି କର୍ମଶାଳାକୁ ଅପେକ୍ଷା
କନକ ବ୍ୟୁରୋ: ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ ଆଣ୍ଡ ପ୍ରିଭେନସନର ତଥ୍ୟ ଅନୁସାରେ, ୧୫ ବର୍ଷରୁ ୪୪ ବର୍ଷ ମଧ୍ୟରେ ୪ଲକ୍ଷ ମହିଳାଙ୍କ ଉପରେ କରାଯାଇଥିବା ସର୍ଭେରୁ ଜଣାପଡିଥିଲା ଗର୍ଭବତୀ ମହିଳାଙ୍କୁ ଆଇସିୟୁ, ଭେଂଟିଲେସନ ଏବଂ ଅକ୍ସିଜେନର ଆବଶ୍ୟକତା ସମ୍ଭାବନା ଅଧିକ । ଗର୍ଭବତୀ ମହିଳାଙ୍କ କ୍ଷେତ୍ରରେ ମୃତ୍ୟୁ ସମ୍ଭାବନା ୭୦ ପ୍ରତିଶତ ଅଧିକ ଓ ରକ୍ତ ଜମାଟ ବାନ୍ଧିବା ଭଳି ସମସ୍ୟା ମଧ୍ୟ ସାମ୍ନାକୁ ଆସିଥିଲା ।
Kanak News is now on WhatsApp
Join and get latest news updates delivered to you via WhatsApp
ଏଭଳି ଚିନ୍ତାଜନକ ତଥ୍ୟକୁ ଆଖି ଆଗରେ ରଖି ହିଁ ଦେଶରେ ଗର୍ଭବତୀଙ୍କୁ ଟିକାକରଣ ଆରମ୍ଭ କରିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ନିଷ୍ପତ୍ତି ଗ୍ରହଣ କରିଥିଲା । ହେଲେ ଏହି ପ୍ରକ୍ରିୟା ଆରମ୍ଭ ହେବା ଆଗରୁ ଆହୁରି ବିଳମ୍ବିତ ହୋଇଛି । ଅନ୍ୟପଟେ ରାଜ୍ୟ ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର, ସମସ୍ତ ଜିଲ୍ଲାପାଳ, ମ୍ୟୁନିସିପାଲ କମିଶନର ଓ ସିଡିଏମଓଙ୍କୁ ନିର୍ଦ୍ଦେଶ ଦେଇ କହିଛନ୍ତି –
- ଗର୍ଭବତୀଙ୍କୁ ଟିକାଦାନ ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ମାର୍ଗଦର୍ଶିକା ଦେଇସାରିଛି
- ଖୁବଶୀଘ୍ର କେନ୍ଦ୍ର ପୁରା ପ୍ରକ୍ରିୟା ନେଇ କର୍ମଶାଳା ଆୟୋଜନ କରିବ
- ଗାଇଡଲାଇନ ଉପରେ ସରକାର, ସ୍ୱାସ୍ଥ୍ୟକର୍ମୀଙ୍କୁ ଟ୍ରେନିଂ ଦେବେ
- ଗର୍ଭବତୀଙ୍କୁ ଟିକାକରଣ ସେପର୍ଯ୍ୟନ୍ତ ଆରମ୍ଭ କରାଯିବ ନାହିଁ
ଅର୍ଥାତ୍ ରାଜ୍ୟରେ ଗର୍ଭବତୀଙ୍କୁ ଟିକାକରଣ ଆହୁରି ବିଳମ୍ବିତ ହେବାର ଆଶଙ୍କା ସୃଷ୍ଟି ହୋଇଛି । ବିଜନେସ ଷ୍ଟାଣ୍ଡାର୍ଡର ରିପୋର୍ଟ ଅନୁସାରେ, କରୋନା ପ୍ରଥମ ଲହର ତୁଳନାରେ ଦ୍ୱିତୀୟ ଲହରରେ ଗର୍ଭବତୀ ମହିଳାଙ୍କ ମୃତ୍ୟୁ ସଂଖ୍ୟା ଅଧିକ ଥିଲା । ମହିଳା ଗର୍ଭବତୀ ଥିବା ସମୟରେ ଶରୀରରେ ରୋଗ ପ୍ରତିରୋଧକ ଶକ୍ତି କମି ଯାଉଥିବାରୁ ଏହା ବିପଦଜନକ ହୋଇଥାଏ । ସାଧାରଣତଃ ଅନିୟନ୍ତ୍ରିତ ହେପାଟାଇଟିସ୍ ଓ ହାମରେଜ ପାଇଁ ରକ୍ତକ୍ଷୟ ହେଉଥିବାରୁ ମୃତ୍ୟୁ ସଂଖ୍ୟା ଅଧିକ ହେବା ସମ୍ଭାବନା ରହିଥାଏ । ହେଲେ ପରିବର୍ତ୍ତିତ ସ୍ଥିତିରେ କରୋନା ଲକ୍ଷଣ ଗର୍ଭବତୀଙ୍କ ପାଇଁ ଘାତକ ହେବାରେ ଲାଗିଛି । ଦ୍ୱିତୀୟ ଲହର ସମୟରେ କରୋନାରେ ଆକ୍ରାନ୍ତ ହେଉଥିବା ଗର୍ଭବତୀଙ୍କ ଫୁସଫୁସ୍ ସଂକୁଚିତ ହେଉଥିବାରୁ ଏହା ବିପଦଜନକ ହେଉଛି ।
ଏଭଳି ପରିସ୍ଥିତିରେ ଦେଶ ତୃତୀୟ ଲହରକୁ ସାମ୍ନା କରିବା ପାଇଁ ପ୍ରସ୍ତୁତ ହେଉଛି । ହେଲେ ଟିକାଦାନ ପ୍ରକ୍ରିୟା ବିଳମ୍ବିତ ହେଉଥିବାରୁ ଗର୍ଭବତୀଙ୍କ ପ୍ରତି ଆହୁରି ଅଧିକ ବିପଦର ଆଶଙ୍କା ଅନୁମାନ କରାଯାଉଛି । ଜାନୁଆରୀ ମାସରେ ଦେଶରେ ଯେତେବେଳେ ଟିକାକରଣ ଆରମ୍ଭ ହେଲା, ସେହି ସମୟର ତଥ୍ୟ କହୁଛି, ପ୍ରତିଦିନ ଦେଶରେ ୬୭ ହଜାର ଶିଶୁ ଜନ୍ମ ନିଅନ୍ତି । ଏହାର ଅର୍ଥ ପ୍ରତି ମାସ ପ୍ରାୟ ୨୦ ଲକ୍ଷ ମହିଳା ଗର୍ଭାବସ୍ଥାର ୯ ମାସ ପୁରଣ କରିସାରିଥାନ୍ତି । ଏପ୍ରିଲ ମାସରେ ଗର୍ଭବତୀଙ୍କୁ ଟିକାକରଣରେ ପ୍ରାଥମିକତା ଦେବାକୁ ଦାବି ଉଠିଥିଲା ।
ଆମେରିକା, ବ୍ରିଟେନ୍ ବେଲଜିୟମ ଭଳି ରାଷ୍ଟ୍ରରେ ମା’ ହେବାକୁ ଥିବା ମହିଳାଙ୍କୁ ଗୁରୁତ୍ୱ ଦିଆଯାଉଥିବା ବେଳେ ଭାରତ ପଛରେ ଥିଲା । ଟିକା କେତେ ପ୍ରଭାବି ହେବ ସେନେଇ ଅନୁଶୀଳନ ଚାଲିଥିଲା । ଆଉ ଯେତେବେଳେ ଅନୁମତି ମିଳିଲା, ପ୍ରକ୍ରିୟା ବିଳମ୍ବିତ ଆଶଙ୍କା ସୃଷ୍ଟି ହେଲା ।
ବିଶ୍ୱ ସ୍ୱାସ୍ଥ୍ୟ ସଂଗଠନର ତଥ୍ୟ ଅନୁସାରେ, ଡେଲଟା ଭାଇରସ୍ ଲଗାତର ଭାବେ ନିଜର ରୁପ ବଦଳାଇ ଘାତକ ହେବାରେ ଲାଗିଛି । ପୁରା ବିଶ୍ୱ ଏକ ବିପଦ ଭିତରେ ଥିବା ବେଳେ ଯେଉଁ ରାଷ୍ଟ୍ରରେ କମ ଟିକାକରଣ ହୋଇଛି ସେସବୁ ସ୍ଥାନରେ ହସ୍ପିଟାଲ ଉପରେ ଆଗାମୀ ଦିନରେ ରୋଗୀ ସଂଖ୍ୟା ବଢିପାରେ । ଆଉ ଏଭଳି ସ୍ଥଳେ ସରକାରୀ ସ୍ତରରେ ଗର୍ଭବତୀଙ୍କୁ ଟିକାଦାନ ପ୍ରକ୍ରିୟା ଶୀଘ୍ର ସାରିବା ଉପରେ ପଦକ୍ଷେପ ନେବା ଜରୁରୀ ।