କୋଭାକ୍ସିନକୁ ଝଟକା । ଜରୁରୀକାଳୀନ ବ୍ୟବହାର ପାଇଁ ଅନୁମତି ଦେଲାନି ଆମେରିକା । 

କନକ ବ୍ୟୁରୋ: ଆମେରିକାରେ ଜରୁରୀକାଳୀନ ବ୍ୟବହାର ପାଇଁ ସ୍ୱଦେଶୀ ଟିକା ନିର୍ମାତା ଭାରତ ବାୟୋଟେକକୁ ଆଉ କିଛି ସମୟ ଅପେକ୍ଷା କରିବାକୁ ପଡ଼ିବ  । କୋଭାକ୍ସିନର ଜରୁରୀକାଳୀନ ବ୍ୟବହାରକୁ ଅନୁମୋଦନ ନକରିବାକୁ ଆମେରିକା ନିଷ୍ପତ୍ତି ନେଇଛି। ଆମେରିକାର ଖାଦ୍ୟ ଏବଂ ପ୍ରଶାସନ (ଏଫଡିଏ) କୋଭାକ୍ସିନ ଟିକାର ଜରୁରୀକାଳୀନ ବ୍ୟବହାର ପାଇଁ ଭାରତ ବାୟୋଟେକର ଆବେଦନକୁ ପ୍ରତ୍ୟାଖ୍ୟାନ କରିଛି। ବର୍ତ୍ତମାନ ଏହା ସହିତ କମ୍ପାନୀକୁ ଆମେରିକାରେ ଏହାର ଟିକା ଆରମ୍ଭ କରିବାକୁ ଆଉ କିଛି ସମୟ ଅପେକ୍ଷା କରିବାକୁ ପଡିବ ।

ସୂଚନା ଥାଉ କି ଯେ କିଛି ଦିନ ପୂର୍ବେ କୋଭାକ୍ସିନ ପାଇଁ ଆମେରିକାର ଅଂଶୀଦାର କମ୍ପାନୀ ଓକୁଗେନ ଏହି ଟିକାକୁ ଜରୁରୀକାଳୀନ ବ୍ୟବହାର ପାଇଁ ଅନୁମତି ମାଗିଥିଲା । ଓକୁଗେନ ପକ୍ଷରୁ କୁହାଯାଇଛି ଯେ ଏଫଡିଏ, କମ୍ପାନୀକୁ ଆଉ ଏକ ଅତିରିକ୍ତ ପରୀକ୍ଷା ଆରମ୍ଭ କରିବାକୁ କହିଛି ଯାହା ଦ୍ୱାରା କମ୍ପାନୀ ବାୟୋଲୋଜିକାଲ ଲାଇସେନ୍ସ ଆବେଦନ କରିପାରିବ ।

ଅନ୍ୟପକ୍ଷରେ, ଓକୁଗେନର ମୁଖ୍ୟ କାର୍ୟ୍ୟନିର୍ବାହୀ ଶଙ୍କର ମୁସୁନିରି କହିଛନ୍ତି ଯେ ଯଦିଓ ଏହା ଟିକାକରଣ ବିଳମ୍ବ କରିବ, ତଥାପି ଆମେ କୋଭାକ୍ସିନକୁ ଆମେରିକାରେ ଆଣିବାକୁ ସ୍ଥିର କରିଛୁ। ସୂଚନା ଥାଉ କି ଯେ, ଭାରତ ବାୟୋଟେକ୍ ଏପର୍ୟ୍ୟନ୍ତ ତୃତୀୟ ପର୍ୟ୍ୟାୟ କ୍ଲିନିକାଲ୍ ଟ୍ରାଏଲର ତଥ୍ୟ ସେୟାର କରିନାହିଁ, ଯାହା ଦେଶରେ ଅନେକ ସମାଲୋଚନାର ଶିକାର ହେଉଛି ।