ମହାରଥୀଙ୍କ ଶେଷ ଯାତ୍ରାରେ ସାମିଲ ହୋଇ ବିବାଦ ଘେରରେ ଛନ୍ଦି ହେଲେ ସତ୍ୟବାଦୀ ବିଧାୟକ । ୨୮ ତାରିଖରେ କରୋନା ପିଜିଟିଭ୍ ଆସିଥିଲେ ଉମା ସାମନ୍ତରାୟ : ହସ୍ପିଟାଲରେ ଭର୍ତିଥିବା ବେଳେ ହଜାର ହଜାର ଲୋକଙ୍କ ଭିଡ଼ରେ ହେଲେ ସାମିଲ
କନକ ବ୍ୟୁରୋ : ରବିବାର ପୂର୍ବତନ ମନ୍ତ୍ରୀ ତଥା ପିପିଲିର ଦିବଂଗତ ବିଧାୟକ ପ୍ରଦୀପ ମହାରଥୀଙ୍କ ଅନ୍ତିମ ସଂସ୍କାରର ଦୃଶ୍ୟ । ମହାରଥୀଙ୍କ ଭଳି ଜଣେ ଲୋକପ୍ରିୟ ନେତାଙ୍କ ଯେତେବେଳେ ମୃତ୍ୟୁ ହୁଏ ସେତେବେଳେ ଶେଷ ବିଦାୟ ଏଭଳି ହେବା କିଛି ଅସ୍ୱାଭାବିକ ନୁହେଁ । କିନ୍ତୁ ଯଦି ଏହି ଭିଡରେ କରୋନା ଆକ୍ରାନ୍ତ ବ୍ୟକ୍ତି ସାମିଲ ହୁଅନ୍ତି ତେବେ ବିପଦ ବଢିଯାଇପାରେ ।
Kanak News is now on WhatsApp
Join and get latest news updates delivered to you via WhatsApp
ଭିଡ ଭିତରେ କରୋନା ଆକ୍ରାନ୍ତ ବିଧାୟକ
ନିୟମ ଭାଙ୍ଗିଲେ ଉମା ସାମନ୍ତରାୟ
ସ୍ୱର୍ଗଦ୍ୱାରରେ ସତ୍ୟବାଦୀ ବିଧାୟକ ଉମା ସାମନ୍ତରାୟ । ସେପ୍ଟେମ୍ୱର ୨୮ ତାରିଖରେ ଉମା ପଜିଟିଭ୍ ଚିହ୍ନଟ ହୋଇଥିବା ନେଇ ଟୁଇଟ୍ କରିଥିଲେ ଏବଂ ଯେଉଁମାନେ ତାଙ୍କ ସଂସ୍ପର୍ଶରେ ଆସିଥିଲେ ସେମାନେ ସଂଗରୋଧରେ ରହିବାକୁ ପରାମର୍ଶ ଦେଇଥିଲେ । ପଜିଟିଭ୍ ଚିହ୍ନଟ ହେବାର ମାତ୍ର ୭ ଦିନରେ ଉମା ସାମିଲ ହେବା ଘଟଣା ଏବେ ପ୍ରଶ୍ନବାଚୀ ସୃଷ୍ଟି କରିଛି ।
ସବୁଠାରୁ ବଡ କଥା ହେଉଛି ଉମା ସାମନ୍ତରାୟ କରୋନା ଆକ୍ରାନ୍ତ ଥାଇ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଥିଲେ । ସେହିଠାରୁ ସିଧା ପହଁଚିଥିଲେ ଅନ୍ତେଷ୍ଟିକ୍ରିୟା ଚାଲିଥିବା ସ୍ୱର୍ଗଦ୍ୱାରରେ ।
ଉମାଙ୍କ ଭାବାବେଗରେ କୌଣସି ତୃଟି ନାହିଁ । କିନ୍ତୁ ସେ ଜାଣିବା ଦରକାର ଯେ ସେ କରୋନାରେ ଆକ୍ରାନ୍ତ ହୋଇଛନ୍ତି । ଏହି ସମୟରେ ତାଙ୍କ ଠାରୁ ସଂକ୍ରମଣ ବ୍ୟାପିବାର ଯଥେଷ୍ଟ ସଂଭାବନା ରହିଛି । ଏନେଇ ପୁରୀ ସମୁଦ୍ରକୂଳ ଥାନାରେ ଏତଲା ଦେଇଛି ଜଗନ୍ନାଥ ସେନା । କରୋନା କାଳରେ ଅନ୍ତିମ ସଂସ୍କାର ପାଇଁ ସୀମିତ ଲୋକଙ୍କ ସମାଗମ ନେଇ ନିୟମ ରଖିଛନ୍ତି ସରକାର ।
ମାତ୍ର ୨୦ ଜଣ ଲୋକ ଅନ୍ତିମ ସଂସ୍କାର କାମରେ ଯୋଗ ଦେଇ ପାରିବେ ବୋଲି ନିୟମ ରହିଛି । ଉମା ସାମନ୍ତରାୟଙ୍କ ସହ ମନ୍ତ୍ରୀ ସମୀର ଦାଶଙ୍କ ବିରୋଧରେ ମଧ୍ୟ ପୁରୀରେ ଥାନାରେ ଏତଲା ହୋଇଛି । ସେପଟେ ସମୀର ଦାଶ କହିଛନ୍ତି ସେ ୨୧ ଦିନ ପରେ ଏହି ଅନ୍ତିମ ଯାତ୍ରାରେ ସାମିଲ ହୋଇଛନ୍ତି ।
ଓଡିଶାରେ କରୋନା ଏକ ପ୍ରକାର ଶୀର୍ଷରେ ଥିବାବେଳେ ମହାରଥୀଙ୍କ ବିଦାୟ ଯାତ୍ରାରେ ଏତେବଡ ଭିଡକୁ କେମିତି ଅନୁମତି ଦିଆଗଲା ତାହା ଏକ ବଡ ପ୍ରଶ୍ନ । କାରଣ କୋଭିଡ ନିୟମ ଉଲ୍ଲଘନ ପାଇଁ ଛୋଟ ଛୋଟ ଗରିବ ଦୋକାନୀଙ୍କ ଦୋକାନ ସିଲ୍ କରିଦିଆଯାଉଛି । ଆଉ ଇଏତ ଏତେବଡ ଭିଡ । ଆଉ ପଜିଟିଭ ଚିହ୍ନଟ ହେବାର ମାତ୍ର ୭ ଦିନରେ ଉମା ସାମନ୍ତରାୟ କିପର ଏଥିରେ ସାମିଲ ହେଲେ ସେ ନେଇ ତାଙ୍କ ପ୍ରତିକ୍ରିୟା ମିଳିପାରିନାହିଁ ।