ସାମାନ୍ୟ ବଚସାରୁ ମାଆ-ଝିଅଙ୍କ ଉପରେ ଟ୍ରକ ଚଢ଼ାଇ ଦେଲା ଜହ୍ଲାଦ ଡ୍ରାଇଭର । ଦୁର୍ଘଟଣାର ରୂପ ଦେବା ପାଇଁ ରଚିଥିଲା ଭୟଙ୍କର ଷଡଯନ୍ତ୍ର ।
କନକ ବ୍ୟୁରୋ: ପ୍ରତିହିଂସା ଓ ପ୍ରତିଶୋଧ ପାଇଁ ମାଆ-ଝିଅଙ୍କ ଜୀବନ ଯାଇଛି । ଟ୍ରକ ଚଢ଼ାଇ ସେମାନଙ୍କୁ ହତ୍ୟା କରିଛି ଟ୍ରକ ଡ୍ରାଇଭର । ସାଇଡ୍ ମାରିବା ଓ ରାସ୍ତାରେ ଅଶ୍ଳୀଳ ଇଙ୍ଗିତ ଦେବା ପରେ ଯେତେବେଳେ ମାଆ-ଝିଅ ଏହାର ପ୍ରତିବାଦ କଲେ ଏବଂ ରାସ୍ତାରେ ମାଡ଼ ମାରିଲେ, ତାକୁ ଗ୍ରହଣ କରିପାରିନଥିଲା ନରହନ୍ତା ଡ୍ରାଇଭର । ସ୍କୁଟିରେ ଯାଉଥିବା ମାଆ-ଝିଅଙ୍କ ଉପରେ ଟ୍ରକ ଚଢ଼ାଇ ହତ୍ୟା କରିବା ପରେ ଦୁର୍ଘଟଣାର ରୂପ ଦେବା ପାଇଁ ରଚିଥିଲା ଭୟଙ୍କର ଷଡ଼ଯନ୍ତ୍ର ।
Kanak News is now on WhatsApp
Join and get latest news updates delivered to you via WhatsApp
- ଛାତି ଥରାଇଦେଲା ହତ୍ୟାକାଣ୍ଡ
- ମାଆ-ଝିଅଙ୍କ ଉପରେ ଟ୍ରକ ଚଢ଼ାଇଦେଲା ଡ୍ରାଇଭର
- ହତ୍ୟାକାଣ୍ଡର ଦୁର୍ଘଟଣା ଷ୍ଟାଇଲ୍
ଫିଲ୍ମର ଭୟାନକ କାହାଣୀ ଭଳି ସତ କାହାଣୀ ଘଟିଛି ଯାଜପୁର ଜିଲ୍ଲା ଜେନାପୁର ଥାନା ବରଡ଼ା ଛକ ନିକଟରେ । କ୍ଷଣିକ ରାଗ କେତେ ବିଭତ୍ସ ହୋଇପାରେ, ମଣିଷକୁ କିପରି ନରହନ୍ତା ବନାଇଦିଏ, ତାହା ହିଁ ଦେଖିବାକୁ ମିଳିଛି ଏହି ଅଭାବନୀୟ ଘଟଣାରେ । ପ୍ରତିିଶୋଧ ପାଇଁ ହତ୍ୟାକାଣ୍ଡ ଘଟାଇବା ଦୁର୍ଘଟଣାର ରୂପ ଦେବାକୁ ଷଡ଼ଯନ୍ତ୍ର କରିଥିଲା ଟ୍ରକ ଡ୍ରାଇଭର ।
୫୩ ନମ୍ବର ଜାତୀୟ ରାଜପଥ । ବୁଧବାର ପ୍ରାୟ ସଂଧ୍ୟା ୫ଟା । କେନ୍ଦ୍ରାପଡ଼ାରେ ଏକ ଶୁଦ୍ଧକ୍ରିୟା ସାରି ଫେରୁଥିଲେ ସୁକିନ୍ଦା ଅଞ୍ଚଳର ଅଶୋକ ଚକ୍ରବର୍ତ୍ତୀଙ୍କ ପତ୍ନୀ ଶ୍ରିତିକା ଓ ତାଙ୍କ ଝିଅ ସୋନାଲି ଚକ୍ରବର୍ତ୍ତୀ । ମାଆ-ଝିଅ ସ୍କୁଟିରେ ଫେରୁଥିବା ବେଳେ ଚଣ୍ଡିଖୋଲରୁ ତାଙ୍କୁ ପିଛା କରିଥିଲା ଏକ ଟ୍ରକ । ବିଭିନ୍ନ ପ୍ରକାର ଅଶ୍ଳୀଳ ଇଙ୍ଗିତ ମଧ୍ୟ ଦେଉଥିଲା ଟ୍ରକ ଡ୍ରାଇଭର ଅମର ସ୍ୱାଇଁ । ଡ୍ରାଇଭରର ଆଚରଣକୁ ପ୍ରତିବାଦ କରି ଆରୁହା ନିକଟରେ ଟ୍ରକକୁ ଅଟକାଇ ଥିଲେ ମାଆ-ଝିଅ । ସ୍କୁଟିକୁ ଟ୍ରକ ଆଗରେ ରଖି ଡ୍ରାଇଭର ଅମର ସ୍ୱାଇଁଙ୍କ ଉପରକୁ ଜୋତା ଫିଙ୍ଗିଥିଲେ ସୋନାଲି । ଉଭୟ ମାଆ-ଝିଅ ଡ୍ରାଇଭରକୁ ମାଡ଼ ମାରିବା ସହ ମୋବାଇଲରେ ତାର ଫଟୋ ଉଠାଇଥିଲେ ।
ସ୍ଥାନୀୟ ଲୋକଙ୍କ ହସ୍ତକ୍ଷେପ ଯୋଗୁଁ ଚୁପ୍ ରହି ଯାଇଥିଲା ଡ୍ରାଇଭର ଅମର ସ୍ୱାଇଁ । ହେଲେ ତା ମନରେ ଜଳୁଥିଲା ପ୍ରତିହିଂସାର ନିଆଁ । ରାଗରେ ରକ୍ତ ଚାଉଳ ଚୋବାଉଥିଲା ଅମର । କଥା କଟାକଟି ବେଳେ ଧମକ ମଧ୍ୟ ଦେଇଥିଲା, ମାଆ-ଝିଅଙ୍କୁ ମାରି ନଈରେ ଫିଙ୍ଗି ଦେବ । ସେତେବେଳେ ଏହି କଥାକୁ କେହି ଗୁରୁତ୍ୱ ଦେଇନଥିଲେ । ଏପରିକି ମାଆ ଶ୍ରିତିକା-ଝିଅ ସୋନାଲି ମଧ୍ୟ ସେମାନଙ୍କ ଘରକୁ ସ୍କୁଟିରେ ଚାଲି ଯାଇଥିଲେ । କାହାରିକୁ ଜଣାନଥିଲା, ମୃତ୍ୟୁ ସେମାନଙ୍କୁ ପିଛା କରୁଛି ।
- ସ୍ଥାନ : ଜେନାପୁର ଥାନା ବରଡ଼ା ଛକ
- ସମୟ : ସଂଧ୍ୟା ପ୍ରାୟ ସାଢ଼େ ୫ଟା
ଅଭିଯୁକ୍ତ ଡ୍ରାଇଭର ଅମର ସ୍ୱାଇଁ ମାଆ-ଝିଅଙ୍କ ସହ ପାଟିତୁଣ୍ଡ ହେବା ପରେ ପ୍ରତିଶୋଧ ନେବା ପାଇଁ ମାତ୍ର କେଇ ମିନିଟ ଭିତରେ ରଚିଥିଲା ଭୟଙ୍କର ଷଡ଼ଯନ୍ତ୍ର । ଶ୍ରିତିକା ଓ ସୋନାଲି ଯାଉଥିବା ସ୍କୁଟିକୁ ଟ୍ରକରେ ପିଛା କଲା ଅମର । ସେମାନଙ୍କ ଟପି ଯାଇ ସୁରକ୍ଷିତ ସ୍ଥାନରେ ଅପେକ୍ଷା କଲା । ସ୍କୁଟି ଆଗକୁ ଯିବା ମାତ୍ରେ ବାଁ ପଟେ ସେମାନଙ୍କ ଉପରକୁ ଚଢ଼ାଇଦେଲା ଟ୍ରକ । ଚାହୁଁ ଚାହୁଁ ଦୁଇ ଜଣ ରାସ୍ତାର ଆରପଟେ ଛଟିକି ପଡ଼ିଲେ । ଚୁରମାର ହୋଇଗଲା ସ୍କୁଟି । ମାଆ-ଝିଅଙ୍କୁ ହତ୍ୟା କରି ଟ୍ରକକୁ ଆଗକୁ ନେଇ ଓଲଟାଇ ଦେଲା ଅମର । ଦୁର୍ଘଟଣାର ରୂପ ଦେବା ପାଇଁ କରିଥିଲା ଯୋଜନା ।
ସତ କିନ୍ତୁ ଲୁଚି ରହିନଥିଲା । ଡ୍ରାଇଭର ଅମର ସ୍ୱାଇଁକୁ ଗିରଫ କରିଛି ଜେନାପୁର ପୁଲିସ । ବଡ଼ଚଣା ଡାକ୍ତରଖାନାରେ ମୃତଦେହକୁ ବ୍ୟବଚ୍ଛେଦ କରାଯିବା ପରେ ସେମାନଙ୍କ ଅନ୍ତିମ ସକ୍ରାର କରାଯାଇଛି । ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ନରହନ୍ତା ଡ୍ରାଇଭର ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି ଲୋକେ ।