ବାଘ ଛାଲ ଡିଲର ଭିଡିଓ ଭାଇରାଲ : ଗୁଳିପରେ ନିଜେ ସମିତି ସଭ୍ୟ ବାଘ ଦେହରୁ ଉତାରୁଛନ୍ତି ଛାଲ ; ଖୁଲମଖୁଲା ଚାଲିଛି ମୂଲଚାଲ ,ରଣପୁର ବାଘଛାଲ ଜବତ ଘଟଣାରେ ଗିରଫ ହୋଇଛନ୍ତି ବନ୍ଧମୁଣ୍ଡା ସମିତି ସଭ୍ୟ

348

କନକ ବ୍ୟୁରୋ : ବାଘ ଛାଲ ପାଇଁ ଡିଲ୍ । ଧୀରେ ଧୀରେ ଖୋଲୁଛି ଗୁମର । ଭିଡିଓ ହେଉଛି ଭାଇରାଲ ।  ବାଘ ଛାଲ  କାରବାର କରୁଥିବା  ନେଇ ଏସଟିଏଫ ଦ୍ୱାରା ଗିରଫ ହୋଇଥିବା  ରଣପୁର ବ୍ଲକ  ବନ୍ଧମୁଣ୍ଡା ପଂଚାୟତର ସମିତିସଭ୍ୟ ଲକ୍ଷୀଧର ନାୟକଙ୍କ ବେଆଇନ କାରବାରର ଗୁମର ଧୀରେ ଧୀରେ ଖୋଲିବାରେ ଲାଗିଛି । ଏହି କାରବାରରେ କେବଳ ଲକ୍ଷୀଧର ନୁହନ୍ତି , ଆହୁରି କିଛି ବ୍ୟକ୍ତି ଥିବା  ଜଣାଯାଇଛି ।  ଏପିରିକି ସମିତିସଭ୍ୟ  ବାଘକୁ ମାରିବା ପରେ ତା ଦେହରୁ  ଛାଲ ଉତାରୁଥିବାର ଏକ ଫଟୋ ଭାଇରାଲ ହୋଇଛି ।  ଏହି ସମୟରେ ଅନ୍ୟଦୁଇଜଣ ବ୍ୟକ୍ତି  ତାଙ୍କୁ ସହଯୋଗ କରୁଥିବା ଦେଖିବାକୁ ମିଳିଛି ।  ସମିତି ସଭ୍ୟ ତଥା  ଗିରଫ ଅଭିଯୁ୍କ୍ତ ଲକ୍ଷ୍ମୀଧରଙ୍କ ପଂଚାୟତ ବନ୍ଧମୁଣ୍ଡା  ତଥା ଗାଁ ଜାମୁଗଣ୍ଡ ସଂରକ୍ଷିତ ଜଙ୍ଗଲ ନିକଟବର୍ତୀ । ଏହା ରଣପୁରର ଏକ ଅଗମ୍ୟ ଅଂଚଳ ।  ଏଠାରେ ହାତୀଠାରୁ  ଆରମ୍ଭ କରି ଅନ୍ୟ ବନ୍ୟଜନ୍ତୁ  ରହୁଛନ୍ତି ।  ଏହି ପଂଚାୟତକୁ  ପ୍ରବେଶ ପାଇଁ ଚେକପୋଷ୍ଟ ରହିଛି ।  ବନବିଭାଗର କର୍ମଚାରୀ ଏଠାରେ ନିୟୋଜିତ ଅଛନ୍ତି ।

ତେଣୁ ଏଠାରେ କିଭଳି ବାଘକୁ ହତ୍ୟା କରାଗଲା, ବନବିଭାଗ କିଭଳି ଜାଣପାରିଲାନି ତାହା ଅନେକ ପ୍ରଶ୍ନ ସୃଷ୍ଟି କରିଛି । ଯଦି ଅନ୍ୟ ଅଂଚଳରୁ ବାଘ ଶୀକାର କରି ଏହି ଅଂଚଳକୁ ଅଣାଗଲା, ତାହାହେଲେ  ବନବିଭାଗ କର୍ମଚାରୀ ଜାଣିପାରିଲେ ନାହିଁ କିଭଳି ।  ଏସଟିଏଫ,  ଲକ୍ଷୀଧରଙ୍କ ନିକଟରୁ ଦୁଇଟି ବାଘ ଛାଲ ଜବତ କରିବା ପରେ  ଅସୁରକୁମାରୀ ଜଙ୍ଗଲରେ ବାଘ ମୃତ୍ୟୁ ଘଟଣା ସହିତ  ତାଙ୍କ ଲିଙ୍କ୍ ଥିବା ଚର୍ଚ୍ଚାକୁ ଆସିଛି ।  ଗୋଟିଏ ସପ୍ତାହ ମଧ୍ୟରେ  ଦଶପଲ୍ଲା ଓ ରଣପୁର ଅଂଚଳରୁ  ୩ ବେପାରୀ ଗିରଫ ହେବା ସହ  ବାଘ ଛାଲ ଓ ହରିଣ ଛାଲ ଜବତ ହେବା ଘଟଣା  ବନ୍ୟଜନ୍ତୁଙ୍କ ଜୀବନ ଆଶଙ୍କାରେ ଥିବା ସ୍ପଷ୍ଟ କରୁଛି ।

Comments are closed.