ଆସିଲା ସେରୋସର୍ଭେ ରିପୋର୍ଟ । ୭୦ ପ୍ରତିଶତ ଶିଶୁଙ୍କ ଦେହରେ ଆଣ୍ଟିବଡି ।
କନକ ବ୍ୟୁରୋ: କରୋନାର ଦ୍ୱିତୀୟ ଲହର ସମ୍ପୂର୍ଣ୍ଣ ଯାଇନି, ତୃତୀୟ ଲହରର ଆଶଙ୍କା ରହିଛି । ଏଭଳି ପରିସ୍ଥିତି ଦେଇ ରାଜ୍ୟବାସୀ ଗତି କରୁଥିବାବେଳେ ଆସିଛି ଏକ ଭଲ ଖବର । ୧୨ ଜିଲ୍ଲାରେ କରାଯାଇଥିବା ସେରୋ ସର୍ଭେ ରିପୋର୍ଟରୁ ଜଣାପଡିଛି ୭୩ ପ୍ରତିଶତ ଲୋକଙ୍କ ପାଖରେ ରହିଛି କୋଭିଡ୍ ଭୂତାଣୁର ମୁକାବିଲା ପାଇଁ ରୋଗ ପ୍ରତିରୋଧକ ଶକ୍ତି । ଖୋର୍ଦ୍ଧା ଜିଲ୍ଳାରେ ଲୋକଙ୍କ ରୋଗ ପ୍ରତିରୋଧକ ଶକ୍ତି ସର୍ବାଧିକ ୮୦ ପ୍ରତିଶତ ରହିଛି । ସେହିପରି ୯୩.୫ ପ୍ରତିଶତ ସ୍ୱାସ୍ଥ୍ୟକର୍ମୀଙ୍କ ନିକଟରେ ରହିଛି ରୋଗ ପ୍ରତିରୋଧକ ଶକ୍ତି ।
Kanak News is now on WhatsApp
Join and get latest news updates delivered to you via WhatsApp
ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, କରୋନାର ତୃତୀୟ ଲହର ଆସିଲେ, ଏଥିରେ ଅଧିକ ଛୋଟ ପିଲା ସଂକ୍ରମିତ ହେବାର ଆଶଙ୍କା କରାଯାଉଥିଲା । ଏହାକୁ ନେଇ ଅନେକଙ୍କ ଭିତରେ ଭୟ ଭିତରେ ସେରୋ ସର୍ଭେ ରିପୋର୍ଟ ଆଶ୍ୱସ୍ତି ଆଣିଛି । ରାଜ୍ୟର ୧୨ ଜିଲ୍ଲାରେ କରାଯାଇଥିବା ସର୍ଭେରୁ ଜଣାପଡିଛି ଟିକା ନେଇ ନଥିଲେ ବି ୭୦ ପ୍ରତିଶତ ପିଲାଙ୍କ ନିକଟରେ ଆଣ୍ଟିବଡି ବା ରୋଗ ପ୍ରତିରୋଧକ ଶକ୍ତି ରହିଛି । ରାଜ୍ୟର ଉପକୂଳ, ପଶ୍ଚିମ , ଦକ୍ଷିଣ ଓ ଉତ୍ତର ଓଡିଶାର ୧୨ଟି ଜିଲ୍ଲାରୁ ପ୍ରାୟ ୬ ହଜାର ନମୁନା ସଂଗ୍ରହ କରିଥିଲା ଆରଏମଆରଏସି । ମୋଟ ସାମ୍ପୁଲ ମଧ୍ୟରୁ ୫୭୯୬ ନମୁନା ଗୋଷ୍ଠିରୁ ସଂଗ୍ରହ କରାଯାଇଥିଲା । ସେଥିରୁ ୪୨୪୭ ଲୋକଙ୍କ ଦେହରେ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇଥିବା ସୂଚନା ମିଳିଛି ।