ଅଣ ବିଜେପି ଶାସିତ ରାଜ୍ୟର ରାଜ୍ୟପାଳଙ୍କ ଉପରେ ସୁପ୍ରିମକୋର୍ଟ କ୍ଷୁବ୍ଧ: ତାଗିଦ୍ କରି ମୁଖ୍ୟ ବିଚାରପତି କହିଲେ ତୁମେ ନିର୍ବାଚିତ ପ୍ରତିନିଧି ନୁହେଁ
କନକ ବ୍ୟୁରୋ: ଅଣ ବିଜେପି ଶାସିତ ରାଜ୍ୟରେ ରାଜ୍ୟପାଳ ଏବଂ ସରକାରଙ୍କ ମଧ୍ୟରେ ବିବାଦ ଭିତରେ ବଡ଼ ବୟାନ ଦେଇଛନ୍ତି ସୁପ୍ରିମକୋର୍ଟ । ରାଜ୍ୟପାଳଙ୍କୁ ତାଗିଦ୍ କରି ତୁମେ ନିର୍ବାଚିତ ପ୍ରତିନିଧି ନୁହେଁ ବୋଲି କହିଛନ୍ତି ସର୍ବୋଚ୍ଚ କୋର୍ଟ । ବିଲ ମଞ୍ଜୁରୀରେ ରାଜ୍ୟପାଳ ବିଳମ୍ବ କରୁଥିବା ଅଭିଯୋଗ ଆଣି ସୁପ୍ରିମକୋର୍ଟ ଯାଇଛନ୍ତି କେରଳ, ପଞ୍ଜାବ, ତାମିଲନାଡୁ ସରକାର । ମାମଲା ଶୁଣାଣି କରି ମୁଖ୍ୟ ବିଚାରପତି ଡି.ୱାଇ ଚନ୍ଦ୍ରଚୁଡ କହିଛନ୍ତି, ବିଧାନସଭାରେ ପାରିତ ହୋଇଥିବା ମୁଖ୍ୟ ବିଲଗୁଡିକୁ ରାଜ୍ୟପାଳ ମଞ୍ଜୁରୀ ଦେଉନାହାଁନ୍ତି । ବିଶେଷକରି ଅଣ ବିଜେପି ଶାସିତ ରାଜ୍ୟରେ ଏଭଳି ଦେଖିବାକୁ ମିଳୁଛି । କିନ୍ତୁ ରାଜ୍ୟପାଳମାନେ ଭୁଲିଯିବା ଉଚିତ୍ ନୁହେଁ କି ସେମାନେ ନିର୍ବାଚିତ ପ୍ରତିନିଧି ନୁହଁନ୍ତି ।
Kanak News is now on WhatsApp
Join and get latest news updates delivered to you via WhatsApp
ପଶ୍ଚିମବଙ୍ଗ ଠୁ ଆରମ୍ଭ କରି ପଞ୍ଜାବ ଯାଏ ଅଧିକାଂଶ ଅଣ ବିଜେପି ଶାସିତ ରାଜ୍ୟରେ ରାଜ୍ୟପାଳଙ୍କ ସହ ସରକାରଙ୍କ ପଡୁନାହିଁ । ରାଜ୍ୟପାଳ ଏକ ନିରପେକ୍ଷ ପଦବୀ । କିନ୍ତୁ କେନ୍ଦ୍ର ସରକାର ସେମାନଙ୍କୁ ନିଯୁକ୍ତି ଦେଉଥିବାରୁ ସେମାନେ କେନ୍ଦ୍ର ପ୍ରରୋଚନାରେ କାର୍ଯ୍ୟ କରୁଥିବା ଅଭିଯୋଗ ଆଣିଛନ୍ତି ବିରୋଧୀ ।
ରାଜ୍ୟ ସରକାରଙ୍କ ଅଭିଯୋଗର ଣୁଣାଣି କରି କାହିଁକି ମାମଲା ସୁପ୍ରିମକୋର୍ଟ ଆସୁଛି ବୋଲି ରାଜ୍ୟପାଳଙ୍କୁ ପ୍ରଶ୍ନ କରିଛନ୍ତି ମୁଖ୍ୟ ବିଚାରପତି । ଯେପର୍ଯ୍ୟନ୍ତ ମାମଲା ସୁପ୍ରିମକୋର୍ଟ ନ ଆସୁଛି ସେପର୍ଯ୍ୟନ୍ତ ରାଜ୍ୟପାଳ ବିଲକୁ ମଞ୍ଜୁରୀ ଦେଉନାହାଁନ୍ତି । ଏହା ବନ୍ଦ ହେବା ଦରକାର ବୋଲି କହିଛନ୍ତି କୋର୍ଟ । ଏଥିସହ ସର୍ବୋଚ୍ଚ କୋର୍ଟ ସୋଲିସିଟର ଜେନେରାଲ ତୁସାର ମେହେଟାଙ୍କୁ ପଞ୍ଜାବ ରାଜ୍ୟପାଳ ନେଇଥିବା ନିଷ୍ପତ୍ତିର ରେକର୍ଡ ରଖିବାକୁ ନିର୍ଦ୍ଦେଶ ଦେଇଛନ୍ତି ।
କିନ୍ତୁ ସୋଲିସିଟର ଜେନେରାଲ କହିଛନ୍ତି, ରାଜ୍ୟପାଳ ଠିକ୍ ନିଷ୍ପତି ନେଉଛନ୍ତି, ରାଜ୍ୟ ସରକାର ଅନାବଶ୍ୟକ ଭାବେ ମକଦ୍ଦମା କରୁଛନ୍ତି । ପଞ୍ଜାବ ସରକାରଙ୍କ ଓକିଲ କହିଛନ୍ତି, ରାଜସ୍ୱ ପରିଚାଳନା, ଜିଏସଟି ସଂଶୋଧନ, ଗୁରୁଦ୍ୱାର ପରିଚଳନା ଭଳି ଗୁରୁତ୍ୱପୂର୍ଣ୍ଣ ବିଲକୁ ରାଜ୍ୟପାଳ ମଞ୍ଜୁରୀ ଦେଉନାହାଁନ୍ତି । ଗତ ଜୁଲାଇ ମାସରୁ ଏଭଳି ବିଲ ପଡିରହିଥିବାରୁ ଶାସନ ବ୍ୟବସ୍ଥା ପ୍ରଭାବିତ ହେଉଛି ।
ପଞ୍ଜାବର ମୋଟ ୭ ଟି ବିଲ ମଞ୍ଜୂୁରୀ ଅପେକ୍ଷାରେ ଅଛି । ସେଥିରୁ ୪ ଟି ବିଧାନସଭାରେ ପାସ୍ ହୋଇଥିବା ବେଳେ ବାକି ୩ଟି ମନି ବିଲ, ଯାହା ରାଜ୍ୟପାଳଙ୍କ ମଞ୍ଜୁରୀ ପରେ ଆଗତ ହେବ । ତେବେ ମାମଲାର ପରବର୍ତି ଶୁଣାଣି ଶୁକ୍ରବାର କରିବାକୁ ଧାର୍ଯ୍ୟ କରିଛନ୍ତି କୋର୍ଟ ।