ଲାଣ୍ଡର ବିକ୍ରମକୁ ଛୁଇଁବ ଅନ୍ଧାର । ଆଗାମୀ ୧୪ ଦିନ ଅନ୍ଧାରରେ ରହିବ ଲାଣ୍ଡର ବିକ୍ରମ, ଫଟୋ ବି ଉଠାଇବା ହୋଇଯିବ ମୁସ୍କିଲ ।
ଚନ୍ଦ୍ରର ଦକ୍ଷିଣ ମେରୁରେ ଆଉ କିଛି ଘଣ୍ଟା ମଧ୍ୟରେ ଘନ ଅନ୍ଧକାର ଛାଇଯିବ । ଆଉ ଏହାସହ ଲାଣ୍ଡର ବିକ୍ରମ ସହ ଇସ୍ରୋର ସର୍ମ୍ପକ ସ୍ଥାପନ କରିବା ସ୍ୱପ୍ନ ମଧ୍ୟ ଅନ୍ଧାରରେ ଲୁଚିଯିବ । କାରଣ ଆଉ କିଛି ଘଣ୍ଟା ମଧ୍ୟରେ ଅନ୍ଧାରରେ ଲୁଚିଯିବ ଲାଣ୍ଡର ବିକ୍ରମ । ଆଉ ଏହି ସମୟରେ ଲାଣ୍ଡର ବିକ୍ରମର ସ୍ଥିତି ସର୍ମ୍ପକରେ ଜାଣିବା ଇସ୍ରୋ ପାଇଁ ସହଜ ହେବନି । ପୃଥିବୀର ସମୟ ଅନୁଯାୟୀ ପ୍ରାୟ ୧୪ ଦିନ ଅନ୍ଧାରରେ ରହିବ ଲାଣ୍ଡର ବିକ୍ରମ । ଏହି ସମୟ ମଧ୍ୟରେ ବିକ୍ରମ ସୁରକ୍ଷିତ ରହିବ କି ନାହିଁ ତାହା ଉପରେ ସମସ୍ତଙ୍କର ନଜର ।
Kanak News is now on WhatsApp
Join and get latest news updates delivered to you via WhatsApp
ଲାଣ୍ଡର ବିକ୍ରମକୁ ଯେଉଁଠାରେ ଦେଖିବାକୁ ମିଳିଛି ସେଠାରେ ଆଗାମୀ ୧୪ ଦିନ ପର୍ଯ୍ୟନ୍ତ ସୂର୍ଯ୍ୟ କରିଣ ପଡିବ ନାହିଁ । ଏପରିକି ତ୍ରାପମାତ୍ରା ମଧ୍ୟ ମାଇନସ୍ ୧୮୩ ଡିଗ୍ରୀ ସେଲସିୟସକୁ ଖସି ଆସିପାରେ । ଆଉ ଏଭଳି ସ୍ଥିତିରେ ବିକ୍ରମ ଲାଣ୍ଡରରେ ଲାଗିଥିବା ଇଲେକଟ୍ରୋନିକ ସରଞ୍ଜାମ ନଷ୍ଟ ହୋଇଯାଇପାରେ ।
ଗତ ୭ ସେପ୍ଟେମ୍ବର ରାତି ପ୍ରାୟ ୧.୫୦ ମିନିଟରେ ଚନ୍ଦ୍ରର ଦକ୍ଷିଣ ମେରୁରେ ସଫ୍ଟ ଲ୍ୟାଣ୍ଡିଂ ପୂର୍ବରୁ ଖସିପଡିଥିଲା ଲାଣ୍ଡର ବିକ୍ରମ । ଏହି ସମୟରେ ଚନ୍ଦ୍ରରେ ସୂଯ୍ୟକିରଣ ପଡିବା ଆରମ୍ଭ ହୋଇଥିଲା । ଚନ୍ଦ୍ରର ଗୋଟିଏ ଦିନ ପୃଥିବୀର ୧୪ ଦିନ ସମାନ ହୋଇଥିବାରୁ ଏବେ ଚନ୍ଦ୍ରରେ ସନ୍ଧ୍ୟା ହେବା ଆରମ୍ଭ କରିଛି । ତେବେ ଆସନ୍ତା ୨୦ରୁ ୨୧ ମଧ୍ୟରେ ଚନ୍ଦ୍ରରେ ପୂରା ଅନ୍ଧକାର ଛାଇଯିବ । ଆଉ ଏହାସହ ଲାଣ୍ଡର ବିକ୍ରମ ଓ ରୋଭର ପ୍ରଜ୍ଞାନର ମିଶନ ସମୟସୀମା ମଧ୍ୟ ପୂରା ହୋଇଯିବ ।
ସେପ୍ଟେମ୍ବର ୨୦-୨୧ ପରେ ପରେ ଚନ୍ଦ୍ରଯାନ-୨ ସମ୍ବନ୍ଧୀୟ ସମସ୍ତ ତଥ୍ୟ ଓ ଫଟୋ ଇସ୍ରୋ ପକ୍ଷରୁ ଜାରି କରାଯାଇପାରେ ବୋଲି ଖବର ଜାତୀୟ ଗଣମାଧ୍ୟମରେ ସାମ୍ନାକୁ ଆସୁଛି । ତେବେ ଇସ୍ରୋ ପକ୍ଷରୁ ଏନେଇ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ । ତେବେ ଚନ୍ଦ୍ରଯାନ-୨ ସମ୍ବନ୍ଧୀୟ ସମସ୍ତ ତଥ୍ୟ ଓ ଫଟୋ ସୋସିଆଲ ମିଡିଆ ମାଧ୍ୟମରେ ଲୋକଙ୍କୁ ଜଣାଯିବ ବୋଲି କହିଛି ଇସ୍ରୋ ।