କରୋନାର ନୂଆ ନୂଆ ରୂପକୁ ନେଇ ସତର୍କ କଲେ ରାଜ୍ୟ ସରକାର । ରାଜ୍ୟ ବାହାର ଫେରନ୍ତାଙ୍କ ପାଇଁ ୭ ଦିନିଆ ପୃଥକ ବାସ, ସମାଜିକ ଦୂରତା ଓ ମାସ୍କ ବାଧ୍ୟତାମୂଳକ
କନକ ବ୍ୟୁରୋ: କରୋନାର ନୂଆ ରୂପ ଚିନ୍ତା ବଢ଼ାଉଥିବା ବେଳେ ଓଡ଼ିଶାରେ ସଂକ୍ରମଣର ଆଶଙ୍କାକୁ ଦୃଷ୍ଟିରେ ରଖି ଆଗୁଆ ସତର୍କତାମୁଳକ ପଦକ୍ଷେପ ନେଇଛନ୍ତି ରାଜ୍ୟ ସରକାର । ଯଦିଓ ଆମ ରାଜ୍ୟରେ କରୋନା ସଂକ୍ରମଣ ନିୟନ୍ତ୍ରଣରେ ରହିଛି, ତଥାପି ସତର୍କ ନହେଲେ ପରିସ୍ଥିତି ବିଗିଡି ଯିବାର ଆଶଙ୍କା ରହିଛି । ଏଥିପାଇଁ ସ୍ୱାସ୍ଥ୍ୟ ବିଭାଗ ପକ୍ଷରୁ ନୂଆ ଗାଇଡଲାଇନ ଜାରି କରାଯାଇଛି । ଏହାରି ଭିତରେ ଓଡ଼ିଶାରେ ଟିକାକରଣ ପ୍ରକ୍ରିୟାକୁ ତ୍ୱାରାନ୍ୱିତ କରାଯାଇଛି । ରାଜ୍ୟରେ ମୋଟ୍ ୧୨ ଲକ୍ଷରୁ ଅଧିକ ଡୋଜ୍ ଟିକା ଦିଆଯାଇଥିବା ବେଳେ କେତେ ପ୍ରତିଶତ ଆଂଟିବଡ଼ି ବିକଶିତ ହୋଇଛି ତା ଉପରେ ସମସ୍ତଙ୍କ ନଜର ରହିଛି ।
Kanak News is now on WhatsApp
Join and get latest news updates delivered to you via WhatsApp
ବେଳ ଥାଉ ଥାଉ ସାବଧାନ ନହେଲେ, କରୋନା ସଂକ୍ରମଣ କେଉଁ ଭଳି ସ୍ଥିତି ସୃଷ୍ଟି କରିପାରେ, ଏକଥା ଆମେ ସମସ୍ତେ ଅନୁଭବ କରିଛନ୍ତି । ଆଉ ଏଭଳି ସ୍ଥିତିରେ କରୋନାର ନୂଆ ନୂଆ ରୂପ ଏବଂ ମହାରାଷ୍ଟ୍ର, ସମେତ ଦେଶର ବିଭିନ୍ନ ସ୍ଥାନରେ ବଢ଼ୁଥିବା ସଂକ୍ରମଣ ପୁଣି ଥରେ କରୋନାକୁ ନେଇ ଚିନ୍ତା କରିବାକୁ ବାଧ୍ୟ କରିଛି । ଏହାକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ବିଭାଗ ପକ୍ଷରୁ ନୂଆ ଗାଇଡଲାଇନ ଜାରି ହୋଇଛି ।
ଏଥିରେ କୁହାଯାଇଛି- କି ପ୍ରକାର ସତର୍କତା ଗ୍ରହଣ କରିବା?
-ମୌଳିକ କୋଭିଡ ନିରୋଧୀ ଆଚରଣ ଗ୍ରହଣ କରିବା
-ହାତ ଧୋଇବା, ଠିକ ଭାବେ ମାସ୍କ ପିନ୍ଧିବା ଓ ଶାରୀରିକ ଦୂରତା ରଖିବା
-ସରକାରଙ୍କ ନିୟମ ଅନୁସାରେ ସମୟ ଆସିଲେ କରୋନା ଟିକା ନେବା
-ଜନସମାଗମଠାରୁ ନିଜକୁ ଯଥାସମ୍ଭବ ଦୂରେଇ ରଖିବା
-କୋଭିଡ ନିୟମ ପାଳନକୁ ସାମ୍ବିଧାନିକ ଓ ମାନବିକ ଦାୟିତ୍ୱ ଭାବିବା
-ବାହାର ରାଜ୍ୟ ଫେରନ୍ତା ୭ଦିନ ଗୃହ ପୃଥକ ବାସରେ ରହିବା
-ସନ୍ଦିଗ୍ଧ ଲକ୍ଷ୍ୟଣ ଥିଲେ ତୁରନ୍ତ ହସ୍ପିଟାଲ ଯାଇ କରୋନା ପରୀକ୍ଷା କରିବା
ଏହି ନୂଆ ଗାଇଡ୍ଲାଇନ୍ରେ କରୋନାର ନୂଆ ରୂପର ନୂଆ ଲକ୍ଷଣ ସମ୍ପର୍କରେ ମଧ୍ୟ ସୂଚନା ଦିଆଯାଇଛି ।
ନୂଆ ରୂପର ନୂଆ ଲକ୍ଷଣ
-ଦେହ, ହାତ ଅବଶ ଲାଗିବା
-ଭୋକ ନହେବା
-ମୁଣ୍ଡ ବିନ୍ଧା, ଦେହ, ହାତ ସାମାନ୍ୟରୁ ମଧ୍ୟମ ଘୋଳା ବିନ୍ଧା
-ନୂଆ କରି ଚର୍ମରୋଗ ଦେଖାଦେବା
-ଚର୍ମ କୁଣ୍ଡାଇ ହୋଇ ନାଲି କିମ୍ବା ନୀଳ ପଡିବା
-ଗଳା ଦରଜ ଓ ନାକ ଚୁଂଟି ହେବା
-ସାମାନ୍ୟ କାଶ ହେବା ସହ ଛାତିରେ ଯନ୍ତ୍ରଣା ହେବା
କରୋନ ସଂକ୍ରମଣ ବଢ଼ୁଥିବା ବେଳେ ଟିକାକରଣ ପ୍ରକ୍ରିୟାକୁ ବି ତ୍ୱରାନ୍ୱିତ କରାଯାଇଛି । ପ୍ରତିଦିନ ୧ ଲକ୍ଷ ବୟସ୍କଙ୍କ ଟିକାରକଣ ପାଇଁ ୯୨୭ଟି କେନ୍ଦ୍ର କରାଯାଇଛି । ଗ୍ରାମାଚଂଳରେ ବୟସ୍କ ଲୋକଙ୍କୁ ଟିକା ଦେବା ପାଇଁ ଘର ଘର ବୁଲି ପ୍ରଶାସନ ସଚେତନ କରୁଛି । ଯେଉଁ ଜିଲ୍ଲାରେ ଟିକାକରଣ ପ୍ରତିଶତ କମିଛି, ତା ଉପରେ ଅଧିକ ଧ୍ୟାନ ନିଆଯାଉଛି ।
ଏସବୁ ଭିତରେ ସମସ୍ତଙ୍କ ମନରେ ପ୍ରଶ୍ନ ଆସୁଛି ଟିକା ନେବା ପରେ କେତେ ପ୍ରତିଶତ ଆଂଟିବଡ଼ି ବିକଶିତ ହୋଇଛି । ଆଂଟିବଡ଼ିକୁ ଲୋକଙ୍କ ଭିତରେ ଉଠୁଥିବା ପ୍ରଶ୍ନର ଉତର ରଖିଛନ୍ତି ବରିଷ୍ଠ ଚିକିତ୍ସକ ଭି.ଭେଙ୍କଟ ରାଓ ।
-ଟିକାର ପ୍ରଥମ ଡୋଜ୍ ନେବାର ୨୮ ଦିନ ପରେ ଆଂଟିବଡ଼ି ବିକଶିତ ହୋଇଥାଏ
– ଦ୍ୱିତୀୟ ଡୋଜ୍ ନେବାର ୧୪ ଦିନ ପରେ ରକ୍ତ ପରୀକ୍ଷା କଲେ ଆଂଟିବଡ଼ିର ସ୍ତର ଜଣାପଡ଼ିଥାଏ
– ଆଉ ମାସେ ପରେ ଆଂଟିବଡ଼ିର ସ୍ତର କେତେ ପ୍ରତିଶତ ବଢ଼ିଛି ଜାଣିବାରେ ସହଜ ହୋଇଥାଏ
– ସିରୋ ସର୍ଭେ ସାମଗ୍ରିକ ବିକଶିତ ଆଂଟିବଡ଼ିର ସୂଚକାଙ୍କ ବୋଲି ଧରାଯାଏ, ଯାହା ଗବେଷଣା ପାଇଁ ପ୍ରଯୁର୍ଜ୍ୟ
– ଟିକା ନେବା ପରେ ଆଂଟିବଡ଼ି ଗୋଟିଏ ବର୍ଷ ଯାଏଁ ରହିଥାଏ
– କରୋନା ଆକ୍ରାନ୍ତ ହେବା ପରେ ଟିକା ନେଇଥିଲେ ଆଂଟିବଡ଼ି କେତେ ଦିନ ରହିବ ତାହା ନିର୍ଦ୍ଧିଷ୍ଟ ଭାବେ କହି ହେବନାହିଁ
ତେବେ ଆଶ୍ୱସ୍ତିକର କଥା ହେଉଛି ନୂଆ ଷ୍ଟ୍ରେନ୍ର କରୋନା ଭୁତାଣୁକୁ ବି ଟିକା ପ୍ରତିହତ କରିବାର ସକ୍ଷମ ରହିଛି । କିନ୍ତୁ ସାମଗ୍ରିକ ଭାବେ କରୋନା ମୁକାବିଲା ପାଇଁ ସତର୍କତା ଜରୁରୀ ଏବଂ ରାଜ୍ୟ ସରକାର ଜାରି କରିଥିବା ନୂଆ ଗାଇଡ୍ଲାଇନ୍ ପାଳନ କରିବା ଆବଶ୍ୟକ ।