ଆସନ କମ, ଡିମାଣ୍ଡ ଅଧିକ । ମୋଦୀଙ୍କ ମୁଣ୍ଡବିନ୍ଧାର କାରଣ ପାଲଟିପାରନ୍ତି ଏନଡିଏରେ ଥିବା ଛୋଟ ଦଳ ।
କନକ ବ୍ୟୁରୋ : ଏନଡିଏର ସଂସଦୀୟ ଦଳ ବୈଠକରେ ଏନଡିଏର ନେତା ଭାବେ ନିର୍ବାଚିତ ହୋଇଛନ୍ତି ନରେନ୍ଦ୍ର ମୋଦୀ । ଏହାସହ ପୁଣିଥରେ ପ୍ରଧାନମନ୍ତ୍ରୀ ଭାବେ ମୋଦୀ ଶପଥ ନେବା ସ୍ପଷ୍ଟ ହୋଇଛି । ଆସନ୍ତା ୯ ତାରିଖରେ ପ୍ରଧାନମନ୍ତ୍ରୀ ଭାବେ ଶପଥ ନେବେ ନରେନ୍ଦ୍ର ମୋଦୀ । ଚଳିତ ନିର୍ବାଚନରେ ବିଜେପି ଏକାକୀ ବହୁମତ ପାଇନଥିଲେ ମଧ୍ୟ ଏନଡିଏ ସରକାର ଗଢିବାକୁ ମ୍ୟାଜିକ ନମ୍ବର ପାଇଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପି ୨୪୦ ଆସନ ପାଇଥିବା ବେଳେ ଟିଡିପି ୧୬, ଜେଡିୟୁ ୧୨, ଶିବସେନା ୭, ଏଲଜେପି(ଆର) ୫ଟି ଆସନ ପାଇଛନ୍ତି । କିଛି ଏଭଳି ସହଯୋଗୀ ଦଳର ସହଯୋଗ ବଳରେ ମୋଦୀ ୩.୦ ଯୁଗ ଆରମ୍ଭ ହୋଇଛି । ଅନ୍ୟପଟେ ଏନଡିଏରେ ଏମିତି କିଛି ସହଯୋଗୀ ଦଳ ରହିଛନ୍ତି ଯେଉଁମାନଙ୍କର ଦଳର ସାଂସଦଙ୍କ ସଂଖ୍ୟା ବହୁତ କମ କିନ୍ତୁ ସେମାନଙ୍କର ଦାବି ବହୁତ ବଡ । ଯେଉଁ ଦଳ ଗୁଡିକୁ ପ୍ରଧାନମନ୍ତ୍ରୀ ମୋଦୀ ଅଣଦେଖା ମଧ୍ୟ କରିପାରିବେ ନାହିଁ । କିନ୍ତୁ ଏହି ଦଳର ଦାବି ପ୍ରଧାନମନ୍ତ୍ରୀ ମୋଦୀଙ୍କ ଚିନ୍ତା ବଢାଇଛି ।
ଏନଡିଏରେ ଏମିତି ୧୦ଟି ଦଳ ରହିଛନ୍ତି ଯେଉଁମାନଙ୍କର ସାଂସଦ ସଂଖ୍ୟା ୧ କିମ୍ବା ୨ରେ ସୀମିତ । ସେଭଳି ଦଳ ଗୁଡିକ ମଧ୍ୟରେ ଆରଏଲଡିର ୨ ସାଂସଦ, ଜେଡିଏସ ଓ ଜନସେନା ପାର୍ଟିର ୨ ଜଣ ଲେଖାଏଁ ସାଂସଦ ରହିଛନ୍ତି । ଏହାବାଦ୍ ଅନୁପ୍ରିୟା ପଟେଲଙ୍କ ଅପନା ଦଳ, (ଏସ) ଜୀତନରାମ ମାଂଝୀଙ୍କ ହିନ୍ଦୁସ୍ତାନୀ ଆୱାମା ମୋର୍ଚ୍ଚା(ଏସ), ଅଜିତ ପାୱାରଙ୍କ ଏନସିପି, ପ୍ରେମ ସିଂ ତମାଙ୍ଗଙ୍କ ଏସକେଏମ, ଆସାମ ଗଣ ପରିଷଦ, ଅଲ୍ ଝାଡଖଣ୍ଡ ଷ୍ଟୁଡେଣ୍ଟସ ୟୁନିୟନ, ୟୁପିପିଏଲର ଜଣେ ଲେଖାଏଁ ସାଂସଦ ରହିଛନ୍ତି । ଏହି ୧୦ ଦଳ ପାଖରେ ୧୩ ଜଣ ସାଂସଦ ରହିଛନ୍ତି । କିନ୍ତୁ ଏମାନଙ୍କର ଦଳର ଅନେକ ହେଭିୱେଟ ଚେହେରା ମଧ୍ୟ ରହିଛନ୍ତି ଯେଉଁମାନଙ୍କୁ ଅଣଦେଖା କରିବା ବିଜେପି ପକ୍ଷେ ସମ୍ଭବପର ନୁହେଁ । କିନ୍ତୁ ଏହି ଦଳ ଗୁଡିକ ମୋଦୀଙ୍କ ତୃତୀୟ ପାଳିରେ ବଡ ପଦବୀ ପାଇବା ଆଶାରେ ରହିଛନ୍ତି । କିଛି ଦଳ କ୍ୟାବିନେଟ ପାହ୍ୟା ଚାହୁଁଥିବା ବେଳେ କିଛି ଦଳ ମନ୍ତ୍ରୀମଣ୍ଡଳରେ ସାମିଲ ହେବାକୁ ଦାବି କରୁଛନ୍ତି । ଏଭଳି ସ୍ଥଳେ ପ୍ରଧାନମନ୍ତ୍ରୀ କାହାକୁ କିଭଳି ସନ୍ତୁଷ୍ଟ କରିବେ ତାହା ଉପରେ ସମସ୍ତଙ୍କର ନଜର ରହିଛି ।