କନକ ବ୍ୟୁରୋ: ଦେଢମାସ ପରେ ଘଞ୍ଚ ଜଙ୍ଗଲରୁ ଉଦ୍ଧାର ହେଲା ନିଖୋଜ ଯୁବକଙ୍କ କଙ୍କାଳ । ଗଂଜେଇ ଚୋରା ଚାଲାଣ ନେଇ ଯୁବକଙ୍କୁ ନିର୍ମମ ଭାବେ ହତ୍ୟା କରି ଘଞ୍ଚ ଜଙ୍ଗଲ ଭିତରେ ଫିଙ୍ଗି ଦେଇଥିଲେ ଦୁଇ ସାଥୀ ଗଞ୍ଜେଇ ଚାଲାଣକାରୀ । ଆଉ ମୋଟର ସାଇକଲକୁ ବାଲିମେଳା ଜଳ ଭଣ୍ଡାର ଭିତରେ ଫିଙ୍ଗି ଦେଇଥିଲେ ଦୁଇ ହତ୍ୟାକାରୀ ଯୁବକ ।
Kanak News is now on WhatsApp
Join and get latest news updates delivered to you via WhatsApp
ମାଲକାନଗିରି ଥାନା ଅନ୍ତର୍ଗତ ସିନ୍ଧ୍ରୀମାଳ ଗାଁର ରାମ ଚନ୍ଦ୍ର ମାଢୀ ଗତ ଦେଢ ମାସ ଧରି ନିଖୋଜ ଥିଲେ । ଗତ ଡିସେମ୍ବର ୨ ତାରିଖରେ ଏନେଇ ପରିବାର ଲୋକେ ମାଲକାନଗିରି ଥାନାରେ ଏତଲା ଦେଇଥିଲେ । ପୁଲିସ ପୁରା ଘଟଣାର ପର୍ଦାଫାଶ କରି ହତ୍ୟାକାଣ୍ଡ ପଛରେ ଗଂଜେଇ କାରବାର ଥିବା ଜାଣିବାକୁ ପାଇଛି । ସିନ୍ଧ୍ରୀମାଳ ଗାଁର ଯୁବକ ରାମଚନ୍ଦ୍ର ମାଢୀ ଓ ତାଙ୍କ ଦୁଇ ସାଥୀ ମିଶି ଚିତ୍ରକୋଣ୍ଡା ଅଂଚଳରୁ ଗଂଜେଇ ଚୋରା ଚାଲାଣ କରୁଥିଲେ । ଗତ ନଭେମ୍ବର ୧୭ ତାରିଖ ଦିନ କଣ୍ଡଳଗୁଡା ଗାଁର ଲୋକନାଥ ଓ ଖଗେଶ୍ୱରଙ୍କ ସହ ଟଙ୍କା ପଇସାକୁ ନେଇ ବଚସା ହବାରୁ ରାମଚନ୍ଦ୍ରକୁ ଅତି ନିର୍ମମ ଭାବେ ହତ୍ୟା କରି ଜଂଗଲ ଭିତରେ ଫୋପାଡି ଦେଇଥିଲେ । ମାଲକାନଗିରି ପୁଲିସ ଜଣେ ପରେ ଜଣେ, ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।