ଲେଗିଙ୍ଗସକୁ ଫରେନସିକ ଲ୍ୟାବକୁ ପଠାଇଲା ଏସଆଇଟି । ଅଭିଯୁକ୍ତର ବୟାନ ଓ ଏସଆଇଟିର ହତ୍ୟା ଥିଓରୀର ପ୍ରମାଣ ପାଇଁ ବେଶ ଗୁରୁତ୍ୱ ରଖୁଛି ଲେଗିଙ୍ଗସ ।
କନକ ବ୍ୟୁରୋ : ମଙ୍ଗଳବାର ଦିନ ପୋଖରୀରୁ ପାଣି ନିଷ୍କାସନ ପରେ ରାତି ପ୍ରାୟ ୧୦ଟା ୧୦ ପାଖାପାଖି ଓଡ୍ରାଫ୍ ଟିମକୁ ମିଳିଥିଲା ଏକ ଛୋଟ ପିଲାର ଲେଗିଙ୍ଗସ । ଏସଆଇଟି ମୁଖ୍ୟ ଅରୁଣ ବୋଥ୍ରା ଦୁଷ୍କର୍ମ ଓ ହତ୍ୟାର ଯେଉଁ ଥିଓରୀ ଦେଇଥିଲେ ସେହି ଆଧାରରେ ଦିନତମାମ ପୋଖରୀରୁ ଜଳ ନିଷ୍କାସନ ହେବା ସହ ପ୍ରମାଣ ଖୋଜା ଚାଲିଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରେସମିଟ୍ କରି ବୋଥ୍ରା କହିଥିଲେ ଅଭିଯୁକ୍ତ ସରୋଜ ସେଠୀ, ଏହି ଜଘନ୍ୟ କାଣ୍ଡ ଘଟାଇବା ପରେ ଲେଗିଙ୍ଗସକୁ ପୋଖରୀକୁ ଫିଙ୍ଗି ଦେଇଥିବା ପୋଲିସ ଆଗରେ କହିଥିଲା । ଏବେ ପ୍ରଶ୍ନ ଉଠୁଛି, ପୋଖରୀରୁ ମିଳିଥିବା ଲେଗିଙ୍ଗସ କାହାର?
ଅଭିଯୁକ୍ତ ସରୋଜ ସେଠୀ, ପରୀକୁ ହତ୍ୟା କରିବା ପରେ ଲେଗିଙ୍ଗସ ଘର ପଛପଟ ପୋଖରୀକୁ ପିଙ୍ଗି ଦେଇଥିବା ପ୍ରେସମିଟ୍ରେ କହିଥିଲେ ଅରୁଣ ବୋଥ୍ରା । ଯଦି ସେହି ଲେଗିଙ୍ଗସ ମିଳିଯାଇଛି, ତେବେ ତଦନ୍ତକାରୀ ଦଳ ହାତରେ ବଡ଼ ପ୍ରମାଣ ଲାଗିଛି ବୋଲି କୁହାଯାଇପାରିବ । ଯଦି ଏହା ପରୀର ନୁହେଁ, ତେବେ ଏସଆଇଟି ପାଇଁ ଚ୍ୟାଲେଂଜ ଆହୁରି ବଢ଼ିଯିବ ।
ମିଳିଥିବା ଲେଗିଙ୍ଗସ କାହାର, ଏଥିରେ ଆଉ କିଛି ପ୍ରମାଣ ଅଛି କି, ଏସବୁର ପରୀକ୍ଷା ପାଇଁ ପୋଖରୀରୁ ଉଦ୍ଧାର କରାଯାଇଥିବା ଲେଗିଙ୍ଗସକୁ ଫରେନ୍ସିକ୍ ଲ୍ୟାବକୁ ପଠାଇବ ଏସଆଇଟି । ବୈଜ୍ଞାନିକ ପଦ୍ଧତିରୁ ତଥ୍ୟ, ପ୍ରମାଣ ଖୋଜିବାକୁ ଉଦ୍ୟମ କରିବ ସ୍ୱତନ୍ତ୍ର ତଦନ୍ତକାରୀ ଦଳ । ତେବେ ଏହି ଲେଗିଙ୍ଗସ ପରୀର କି ନୁହେଁ, ପରିବାର ଲୋକଙ୍କ ସହମତି ମଧ୍ୟ ଆବଶ୍ୟକ ହୋଇପାରେ ।
ସେପଟେ ଅଧିକ ପ୍ରମାଣ ପାଇଁ ପୋଖରୀ ଭିତରେ ଓଡ୍ରାଫ ଟିମର ଖୋଜାଖୋଜି କାର୍ଯ୍ୟ ଜାରି ରହିଛି । ନୟାଗଡ଼ର ଯଦୁପୁର ଗାଁରେ ବୁଧବାର ଦିନ ବି ପହଁଚିଥିଲେ ଏସଆଇଟି ମୁଖ୍ୟ । ପୋଖରୀ ନିକଟରେ ଓଡ୍ରାଫ ଓ ଏସଆଇଟି ସଦସ୍ୟଙ୍କ ସହ ଆଲୋଚନା କରିଛନ୍ତି ଅରୁଣ ବୋଥ୍ରା ।