୧୩ ବର୍ଷ ହେଲା ମାଟି ଘରେ ଚାଲିଛି ବିଦ୍ୟାଳୟ: ୨ଟି ଘରେ ୫ଟି ଶ୍ରେଣୀର ୫୨ ପିଲାଙ୍କ ଭବିଷ୍ୟତ ଗଢୁଛନ୍ତି ଶିକ୍ଷକ

କନକ ବ୍ୟୁରୋ: “ଭଲ ପାଠ ପଢ, ବଡ ସ୍ବପ୍ନ ଦେଖି ତାକୁ ସାକାର କର “ କୁନି କୁନି ଛାତ୍ରଛାତ୍ରୀଙ୍କ ପାଇଁ ଏପରି କିଛି ବାର୍ତ୍ତା ପ୍ରଦାନ କରିଛନ୍ତି ମୁଖ୍ୟମନ୍ତ୍ରୀ ଯାହାକୁ ଏକ ଫଳକରେ ଚିତ୍ରଣ କରାଯାଇ ସ୍କୁଲର କାନ୍ଥରେ ଲଗାଯାଇଛି। ସ୍କୁଲର ଅବସ୍ଥା ଏପରି ଯେ ସ୍ବପ୍ନ ଦେଖିବା ତ ଦୂରର କଥା କେମିତି ସୁରକ୍ଷିତର ସହ ବସି ପାଠପଢିବେ ସେହି ଚିନ୍ତାରେ ଲାଗିପଡିଥାଆନ୍ତି ୫୧ ଜଣ ଛାତ୍ରଛାତ୍ରୀ ମାନେ।

ବାଲେଶ୍ୱର ସାଂସଦ ପ୍ରତାପ ଷଡଙ୍ଗୀଙ୍କ ପଂଚାୟତରେ ଥିବା ଏକ ସରକାରୀ ବିଦ୍ୟାଳୟ । ୧୩ ବର୍ଷ ହେଲା ମାଟି କାନ୍ଥ ଓ ମାଟି ଚଟାଣରେ ବସି ପଢୁଛନ୍ତି ୫୧ ଜଣ ଛାତ୍ରଛାତ୍ରୀ । ଦୟନୀୟ ଅବସ୍ଥାରେ କୁନି କୁନି ପିଲାଙ୍କ ଭବିଷ୍ୟତ ଗଢୁଛନ୍ତି ୨ ଜଣ ଶିକ୍ଷକ । ଜଙ୍ଗଲ ଭିତରେ ଥିବା ଏହି ସ୍କୁଲର ଅବ୍ୟବସ୍ଥାକୁ ଦେଖି ପାରୁନାହାନ୍ତି ବିକାଶର ନାରା ଦେଉଥିବା ରାଜନେତା ଓ ରାଜ୍ୟ ସରକାର ।

୨୦୧୦ ମସିହାରେ ମାଟି କାନ୍ଥ ଓ ଚାଳ ଖପର ଘରେ ଆରମ୍ଭ ହୋଇଥିଲା ନୀଳଗିରି ବ୍ଲକ ତରମନଟି ପ୍ରାଥମିକ ବିଦ୍ୟାଳୟ । ବିଦ୍ୟାଳୟଟି ଭବିଷ୍ୟତରେ କୋଠାଘରରେ ପରିଣତ ହେବ ବୋଲି ପ୍ରତିଶ୍ରୁତି ମିଳିିଥିଲା । ହେଲେ ଆଜି ଯାଏଁ ଭାଗ୍ୟ ବଦଳିଲା ନାହିଁ । ଶିକ୍ଷକ ଓ ଗ୍ରାମବାସୀଙ୍କ ଉଦ୍ୟମରେ ଚାଳ ଛପରଟି ଆଜବେଷ୍ଟସରେ ପରିଣତ ହୋଇଛି । କିନ୍ତୁ କୋଠାଟିଏ ତିଆରି ହୋଇପାରିନାହିଁ । ଏହାକୁ ନେଇ ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀ ଦୁଃଖ ପ୍ରକାଶ କରିଛନ୍ତି । ସେପଟେ ବ୍ଲକ ଗୋଷ୍ଠୀ ଶିକ୍ଷାଧିକାରିଣୀ କହିଛନ୍ତି, ବିଦ୍ୟାଳୟଟି ଜଙ୍ଗଲ ଜମିରେ ରହିଥିବାରୁ ଉନ୍ନତିକରଣରେ ଅସୁବିଧା ହେଉଛି ।

ଯେଉଁ ବିଦ୍ୟାଳୟରେ କୋଠା ଘର ଅଛି, ସେଠି ଅଧିକ ଘର କରାଯାଉଛି । ଅଯଥାରେ ଅର୍ଥ ଖର୍ଚ କରାଯାଉଛି, ହେଲେ ଯେଉଁଠି ବିଦ୍ୟାଳୟ ଗୃହର ଆବଶ୍ୟକତା ରହିଛି, ସେଠି ସରକାରଙ୍କ ନଜର ପଡୁନାହିଁ ।