କରୋନାରୁ ଉପଶମ ଦେବ ନାଲି ପିମ୍ପୁଡିର ଆଚାର? ଏହାର ବ୍ୟବହାର ହେଉନାହିଁ ବୋଲି କୋର୍ଟରେ ହୋଇଥିଲା ମାମଲା । ତିନି ମାସ ଭିତରେ ନିଷ୍ପତି ନେବାକୁ ନିର୍ଦ୍ଦେଶ ଦେଲେ ଓଡିଶା ହାଇକୋର୍ଟ
କନକ ବ୍ୟୁରୋ : ଆଦିବାସୀ ଇଂଜିନିଅର ନୟାଧର ପଡିଆଲ ରୁଜୁ କରିଥିବା ଏକ ଜନସ୍ୱାର୍ଥ ମାମଲାର ବିଚାର କରି ଓଡିଶା ହାଇକୋର୍ଟ ଆୟୁଷ ମନ୍ତ୍ରାଳୟର ମହାନିର୍ଦ୍ଦେଶକଙ୍କୁ ଏଭଳି ନିର୍ଦ୍ଦେଶ ଦେଇଛନ୍ତି । ଓଡିଶା, ଛତିଶଗଡ ସମେତ ଅନ୍ୟରାଜ୍ୟର ଆଦିବାସୀ ବହୁଳ ଅଂଚଳରେ ନାଲି ପିମ୍ପୁଡି ବା କାଈ ଆଚାର ବା ଚଟଣୀକୁ ଔଷଧ ଭାବେ ବ୍ୟବହାର କରାଯାଏ ।
Kanak News is now on WhatsApp
Join and get latest news updates delivered to you via WhatsApp
ଏସବୁ ଅଂଚଳରେ ଥଣ୍ଡା, କଫ, ହାଲିଆ ଲାଗିଲେ, ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ହେବା, ଫ୍ଲୁ ପରି ରୋଗର ଚିକିତ୍ସା ପାଇଁ ଏହି ଆଚାର ବା ଚଟଣୀର ଉପଯୋଗ ହୋଇଥାଏ । ତେଣୁ କରୋନାରୁ ଉପଶମ ପାଇଁ ଏହା ଉପରେ କାହିଁକି ଗବେଷଣା କରାଯାଉ ନାହିଁ ବୋଲି ଇଂଜିନିଅର ନୟାଧର ପଡିଆଲଙ୍କ କୋର୍ଟରେ ଆବେଦନ କରିଥିଲେ ।
ଓଡିଶା, ଛତିଶଗଡ, ଝାଡଖଣ୍ଡ ଆଦି ଅଂଚଳର ଜଙ୍ଗଲରେ ଦେଖାଯାଉଥିବା ଏହି କାଈକୁ ସଂଗ୍ରହ କରାଯାଇଥାଏ ଏବଂ କଂଚା ଲଙ୍କା ଓ ନାଲି ପିମ୍ପୁଡିକୁ ମିଶାଇ ଆଚାର ପ୍ରସ୍ତୁତ କରାଯାଇଥାଏ । ଏହି ଆଚାର ବା ଚଟଣୀକୁ ବିଭିନ୍ନ ରୋଗ ପାଇଁ ଆଦିବାସୀ ବ୍ୟବହାର କରିଥାନ୍ତି । ଏହାର କରୋନାରେ ପ୍ରୟୋଗ କରିବା ପାଇଁ ହାଇକୋର୍ଟରେ ନୟାଧର ଆବେଦନ କରିବା ପୂର୍ବରୁ ସିଆଇଏସଆରକୁ ଜୁନ ୨୩ ତାରିଖ ଏବଂ ଆୟୁଷ ମନ୍ତ୍ରାଳୟକୁ ଜୁଲାଇ ୭ ତାରିଖରେ କାଈ ଆଚାର ଉପକାରିତା ବିଷୟରେ ଲେଖିଜଣାଇଥିଲେ ।
ଏଥିରେ ସେ କାଈ ଆଚାର ବା ଚଟଣୀରେ ଭୂତାଣୁ ନିରୋଧୀ ଉପାଦାନ ଥିବାରୁ ଏହା ପାଚନ କ୍ରିୟାରେ ସହାୟକ ହୋଇଥାଏ ବୋଲି ଦାବି କରିଥିଲେ । ସେହିପରି ନାଲି ପିମ୍ୁୁଡି ବା କାଈର ଆଚାରରେ ପ୍ରୋଟିନ, କାଲସିୟମ ଓ ଜିଙ୍କ ରହିଥିବାରୁ ଏହା ପ୍ରତିରୋଧକ ଶକ୍ତି ବୃଦ୍ଧିରେ ସହାୟକ ବୋଲି ନିଜ ଦାବି ଆବେଦନରେ ନୟାଧର ଦର୍ଶାଇଛନ୍ତି ।
ଆଗତ ଜନସ୍ୱାର୍ଥ ମାମଲାର ବାଚାର କରିଥିଲେ ଜଷ୍ଟିସ ବିଆର ଷଡଙ୍ଗୀ ଓ ଜଷ୍ଟିସ ପ୍ରମଥ ପଟ୍ଟନାୟକଙ୍କ ଖଣ୍ଡପୀଠ । ଏହି ମାମଲାର ଶୁଣାଣି କରି ହାଇକୋର୍ଟ, ଆୟୁଷ ମନ୍ତ୍ରାଳୟ ଓ କାଉନସିଲ ଅଫ ସାଇନଟିଫିକ୍ ଆଣ୍ଡ ଇଣ୍ଡଷ୍ଟ୍ରିଆଲ ରିସର୍ଚ୍ଚକୁ ୩ ମାସ ଭିତରେ ଏନେଇ ନିଷ୍ପତି ନେବାକୁ ନିର୍ଦ୍ଦେଶ ଦେଇଛନ୍ତି । ଖଣ୍ଡପୀଠ କାଈ ଆଚାର ଉପରେ କୌଣସି ମତ ନଦେଇ ଏସଂପର୍କରେ ଅଧିକ ତଥ୍ୟ ଦେବା ସହ ନିଷ୍ପତି ନେବାକୁ ଆୟୁଷ ମନ୍ତ୍ରାଳୟକୁ କହିଛନ୍ତି । ଅନ୍ୟପଟେ ଏଭଳି ଦାବି ପଛରେ କୌଣସି ବୈଜ୍ଞାନିକ ତଥ୍ୟ ନାହିଁ ବୋଲି କହିଛନ୍ତି ବରିଷ୍ଠ ଚିକିତ୍ସକ ।