ରାଜଧାନୀରେ କାହିଁକି ବଢ଼ିଲା ମଶାଙ୍କ ଉତ୍ପାତ, ଜଣାପଡ଼ିଲା କାରଣ। କରୋନା ଦୁଇ ବର୍ଷ ବନ୍ଦ ଥିଲା ମଶା ମରା ଅଭିଯାନ।

କନକ ବ୍ୟୁରୋ: ଭୁବନେଶ୍ୱରର ସବୁ ଅଂଚଳରେ ମଶା ଲୋକଙ୍କୁ କଲବଲ କରୁଥିବାବେଳେ ବିଏମସି ଡ୍ରୋନ ସହାୟତାରେ ଆରମ୍ଭ କରିଛି ମଶାମରା ଅଭିଯାନ । ପ୍ରଥମ ଡ୍ରୋନ ସହାୟତାରେ ଫଟୋ ଉଠାଇ ମଶାର ଉତ୍ପତି ସ୍ଥଳକୁ ଚିହ୍ନଟ କରିବା ପରେ ଆଉ ଏକ ଡ୍ରୋନ୍ ସହାୟତାରେ ମଶା ନିପାତ ପାଇଁ ଔଷଧ ସିଂଚନ କରାଯାଉଛି । ପ୍ରାଥମିକ ପର୍ଯ୍ୟାୟରେ ଭୁବନେଶ୍ୱରର ନୀଳାଦ୍ରି ବିହାର ଅଂଚଳରେ ଏହାକୁ ଆରମ୍ଭ କରାଯାଇଛି । ପର୍ଯ୍ୟାୟକ୍ରମେ ଏହା ଅନ୍ୟ ଅଂଚଳକୁ ସମ୍ପ୍ରସାରିତ କରାଯିବ । ଦୀର୍ଘ ୨ ବର୍ଷର ଅବହେଳା ଯୋଗୁଁ ରାଜଧାନୀବାସୀ ଆଜି ମଶା ପାଇଁ କଲବଲ ହେଉଛନ୍ତିା କୁହାଯାଉଛି

-କୋଭିଡ ସମୟରେ ବିଏମସିର ମଶାମରା ଅଭିଯାନ ବନ୍ଦ ଥିଲା
-ନାଳନର୍ଦ୍ଦମାରେ ମଶାମରା ତେଲ ପକାଯାଇନଥିଲା
-ଡ୍ରେନ ସଫା ହୋଇନଥିଲା, ଘାସବୁଦା କଟା ଯାଇନଥିଲା
-ସାନିଟାଇଜର ଛିଞ୍ଚିବା ପାଇଁ ସବୁ ସ୍ପ୍ରୋୟାର ବ୍ୟବହାର ହୋଇଥିଲା
-ପରେ ଏହି ସ୍ପ୍ରୋୟାର ଖରାପ ହୋଇଯାଇଥିଲା

ଆଉ ଏବେ ମଶା ବଢିବା ପରେ ବିଏମସି ଡ୍ରୋନ ସହାୟତାରେ ମଶା ନିପାତ ଅଭିଯାନ ଆରମ୍ଭ କରିଛି । କିନ୍ତୁ ଏହା କେତେଦୂର ସଫଳ ହେବ ସେ ନେଇ ସନ୍ଦେହ ସୃଷ୍ଟି ହୋଇଛି । ଭୁବନେଶ୍ୱରର ବିଭିନ୍ନ ସ୍ଥାନରେ ଅପରିଷ୍କାର ପରିବେଶ, କୁଢ କୁଢ ଆବର୍ଜନା ଗଦାହେବା ଓ ଖରାପ ପାଣି ଜମିବା ଏଭଳି ସନ୍ଦେହକୁ ଘନୀଭୂତ କରିଛି ।

ପ୍ରଥମ ପର୍ଯ୍ୟାୟରେ ଅପହଞ୍ଚ ଇଲାକାରେ ଲାର୍ଭା ଉତ୍ସ ଚିହ୍ନଟ କରିବ ଡ୍ରୋନ । କିନ୍ତୁ କି ପ୍ରକାର ଉତ୍ସ ଚିହ୍ନଟ ହେଲା ତାହା କେହି କହିପାରୁନାହାନ୍ତି । ରାଜଧାନୀରେ ମଶାଙ୍କ ସାନ୍ଦ୍ରତା ବଢିଯାଇଥିବାରୁ ଡ୍ରୋନ ଯୋଜନା କେତେଦୂର ସଫଳ ହେବ ସେ ନେଇ ସନ୍ଦେହ ସୃଷ୍ଟି ହୋଇଛି ।