ପିସିସି ସଭାପତି ପଦରୁ ନିରଞ୍ଜନଙ୍କ ଇସ୍ତଫା ନେଇ ଚର୍ଚ୍ଚା । ଉଠିଲା ପ୍ରଶ୍ନ, ବିନା ମୁଖିଆରେ କେମିତି ଆଗକୁ ବଢ଼ିବ ରାଜ୍ୟ କଂଗ୍ରେସ?
କନକ ବ୍ୟୁରୋ: ପିସିସି ସଭାପତି ପଦରୁ ନିରଞ୍ଜନ ପଟ୍ଟନାୟକ ଇସ୍ତଫା ଦେଇଥିବା ଚର୍ଚ୍ଚା ଜୋର ଧରୁଥିବା ବେଳେ ପୁଣିଥରେ ରାଜ୍ୟ କଂଗ୍ରେସ, ମୁରବୀ ବିହୀନ ହେବା ଭଳି ସ୍ଥିତି ଉପୁଜିଛି । ଅନ୍ୟପଟେ କିଛି ଅସନ୍ତୁଷ୍ଟ ନେତା, ନେତୃତ୍ୱ ପରିବର୍ତ୍ତନ ପାଇଁ ହାଇକମାଣ୍ଡଙ୍କ ନିକଟରେ ଲବି ସିନା କରୁଛନ୍ତି, ହେଲେ ପରବର୍ତ୍ତୀ ପିସିସି ମୁଖ୍ୟ କିଏ ହେବ,ସେ ନେଇ କାହା ପାଖରେ କିଛି ଖବର ନାହିଁ । କିନ୍ତୁ ପରସ୍ପର ଭିତରେ ଚାଲିଛି ଗୋଡ ଟଣାଟଣି ।
Kanak News is now on WhatsApp
Join and get latest news updates delivered to you via WhatsApp
ତେବେ ଯେଉଁସବୁ ନେତାଙ୍କ ନାଁକୁ ନେଇ ଚର୍ଚ୍ଚା ହେଉଛି କିମ୍ବା ଯେଉଁମାନେ ପିସିସି ମୁଖ୍ୟ ହେବାକୁ ପ୍ରତ୍ୟକ୍ଷ ବା ପରୋକ୍ଷ ଭାବେ ଲବି କରୁଛନ୍ତି । ସେମାନଙ୍କ ଠାରେ କେତେ ସାଙ୍ଗଠନିକ ଦକ୍ଷତା ରହିଛି, ତାହା ଉପରେ ମଧ୍ୟ କଂଗ୍ରେସ କର୍ମୀଙ୍କ ମନରେ ସନ୍ଦେହ ରହିଛି । ସବୁ ନେତାଙ୍କୁ ଏକାଠି କରି ଦଳକୁ ଆଗକୁ ନେବା ଭଳି ଦକ୍ଷତା ମଧ୍ୟ ନଜରକୁ ଆସିନାହିଁ । ଏହି ନେତାମାନଙ୍କ ବିରୋଧରେ ବି ଅନେକ ସମୟରେ ଓଡ଼ିଶାରୁ ନେତା କର୍ମୀ ଯାଇ ଦିଲ୍ଲୀରେ ଫେରାଦ ହୋଇଛନ୍ତି ।
ଯଦି ନିରଞ୍ଜନ ପଟ୍ଟନାୟକ ପିସିସି ସଭାପତି ପଦ ଛାଡିଦିଅନ୍ତି , ତେବେ ଦଳ କିପରି ଆଗକୁ ଯିବ? ଆଗକୁ ପଞ୍ଚାୟତ ନିର୍ବାଚନ ଥିବାରୁ ପ୍ରତି ମୁହୂର୍ତ ଗୁରୁତ୍ୱପୂର୍ଣ୍ଣ ଆଉ ଏଭଳି ସମୟରେ ବିନା ମୁଖିଆରେ କଂଗ୍ରେସ ଆଗକୁ ଯାଉଛି । ଉଭୟ ବିଜେଡି ଓ ବିଜେପି, ପଞ୍ଚାୟତ ପ୍ଲାନ୍ ପ୍ରସ୍ତୁତ କରି ତୃଣମୂଳ ସ୍ତରରେ କାମ ଆରମ୍ଭ କରିଦେଲେଣି । ହେଲେ କଂଗ୍ରେସ ନେତା ଗୋଷ୍ଠିକନ୍ଦଳ ଭିତରେ ମାତିଛନ୍ତି । ତେଣୁ ଦଳ ମୁଖିଆ ବିହୀନ ହୋଇଯାଇଛି । ଏବେ ଦେଖିବାର କଥା, କାହା ସପକ୍ଷରେ ଦିଲ୍ଲୀ ଲବି ଯାଉଛି । କାହା ଉପରେ ଭରସା ରଖି ପିସିସି ଦାୟିତ୍ୱ ଦେଉଛନ୍ତି ସୋନିଆ ଗାନ୍ଧୀ ।