ଦେଶରେ କରୋନା ସ୍ଥିତିକୁ ନେଇ ପ୍ରଧାନମନ୍ତ୍ରୀଙ୍କ ସମୀକ୍ଷା । କେନ୍ଦ୍ର ଦେଇଥିବା ଭେନଟିଲେଟର ଅବ୍ୟବହୃତ ହୋଇ ରହୁଥିବାରୁ ଉଦବେଗ ପ୍ରକାଶ ।
କନକ ବ୍ୟୁରୋ: ଦେଶରେ କରୋନା ସ୍ଥିତିର ସମୀକ୍ଷା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ବରିଷ୍ଠ ଅଧିକାରୀଙ୍କ ସହିତଦେଶରେ କିପରି ରହିଛି କରୋନା ମୁକାବିଲାର ସ୍ଥିତି ସେନେଇ ଶନିବାର ପ୍୍ରଧାନମନ୍ତ୍ରୀ ସମୀକ୍ଷା କରିଛନ୍ତି । ଦେଶରେ ଟିକାକରଣ ନେଇ ଦେଖା ଦେଇଥିବା ସ୍ଥିତି ସମ୍ପର୍କରେ ପଚାରିବୁଝିଥିଲେ ପ୍ରଧାନମନ୍ତ୍ରୀ । ବର୍ତମାନ ଦେଶରେ ସପ୍ତାହକୁ ଟେଷ୍ଟିଂ ସଂଖ୍ୟା ୫୦ ଲକ୍ଷରୁ ବୃଦ୍ଧି ହୋଇ ଏକ କୋଟି ୩୦ ଲକ୍ଷରେ ପହଁଚି ଗଲାଣି ।
Kanak News is now on WhatsApp
Join and get latest news updates delivered to you via WhatsApp
ତେବେ ବର୍ତମାନ କରୋନା ସଂକ୍ରମଣକୁ ନିୟନ୍ତ୍ରଣକୁ ଆଣିବାକୁ ହେଲେ ଗ୍ରାମାଂଚଳ ଗୁଡିକର ସଂକ୍ରମଣକୁ ନିୟନ୍ତ୍ରଣକୁ ଆଣିବାକୁ ହେବ ବୋଲି ପରାମର୍ଶ ରଖିଛନ୍ତି ପ୍ରଧାନମନ୍ତ୍ରୀ । ଗ୍ରାମାଂଚଳ ଗୁଡିକରେ ଅଧିକ ପରିମାଣର ଟେଷ୍ଟିଂ କରାଯିବା ସହିତ ସ୍ଥାନୀୟ ଅଂଚଳକୁ କଂଟେଂଟମେଂଟ ଜୋନ୍ କରିବା ସହ ଅଧିକରୁ ଅଧିକ ଲୋକଙ୍କୁ ଗ୍ରାମାଂଚଳରେ ଟିକା ଦେବାକୁ ସେ ଗୁରୁତ୍ୱ ଦେଇଛନ୍ତି । ସେହିପରି କେନ୍ଦ୍ର ଦେଇଥିବା ଭେନଟିଲେଟର ଅବ୍ୟବହୃତ ହୋଇ ରହୁଥିବାରୁ ଉଦବେଗ ପ୍ରକାଶ କରିଛନ୍ତି । କେନ୍ଦ୍ର ଦେଇଥିବା ଭେନଟିଲେଟର ଗୁଡିକର ଅଡିଟ୍ କରିବାକୁ ସେ ନିର୍ଦ୍ଦେଶ ଦେଇଛନ୍ତି । ବର୍ତମାନ ବିଭିନ୍ନ ଡାକ୍ତରଖାନା ଗୁଡିକରେ ଅକ୍ସିଜେନ୍ ଅଭାବରୁ ରୋଗୀ ଆଖି ବୁଜୁଥିବା ଖବର ଆସିବା ଭିତରେ କିଛି ଦିନତଳେ ଭେନଟିଲେଟର ବ୍ୟବହାର ନହୋଇ ପଡି ରହିଥିବା ଚିତ୍ର ବି ଆସିଥିଲା ।
ଏହାରି ଭିତରେ ଭେନଟିଲେଟର ଗୁଡିକର ଅଡିଟ୍ କରାଇ ଏହାକୁ କେତେମାତ୍ରାରେ ବ୍ୟବହାର କରାଯାଉଛି ସେ ନେଇ ରିପୋର୍ଟ ମାଗିଛନ୍ତି ପ୍ରଧାନମନ୍ତ୍ରୀ । ଗ୍ରାମାଂଚଳରେ କରୋନା ବ୍ୟାପୁଥିବାରୁ ଘରକୁ ଘର ବୁଲି ଟେଷ୍ଟିଂ ଓ ସରଭେଲାନସ ଉପରେ ଜୋର ଦେଇଛନ୍ତି ପ୍୍ରଧାନମନ୍ତ୍ରୀ । ଗ୍ରାମାଂଚଳରେ ଏହି ଟିକାକରଣ ଓ ସଂକ୍ରମିତଙ୍କୁ ଚିହ୍ନଟ କ୍ଷେତ୍ରରେ ଆଶା ଓ ଅଙ୍ଗନବାଡି କର୍ମୀଙ୍କୁ ଅଧିକ ସଶକ୍ତ କରିବାକୁ ମୋଦୀ ପରାମର୍ଶ ରଖିଛନ୍ତି ।