କନକ ବ୍ୟୁରୋ: ଜୋ ବାଇଡେନ୍ ଆମେରିକା ରାଷ୍ଟ୍ରପତି ହେବା ପରେ ପ୍ରଥମଥର ଆମେରିକା ଗସ୍ତରେ ଯାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବୁଧବାର ସକାଳୁ ବାୟୁସେନାର ସ୍ୱତନ୍ତ୍ର ବିମାନରେ ଯାତ୍ରା କରିଛନ୍ତି ମୋଦି ଆଉ ଆମେରିକା ଉଦ୍ଦେଶ୍ୟରେ ନିଜ ଯାତ୍ରା ପୂର୍ବରୁ ମୋଦି କହିଛନ୍ତି…
Kanak News is now on WhatsApp
Join and get latest news updates delivered to you via WhatsApp
“ଆମେରିକା ଯାତ୍ରାରେ ମୁଁ ରାଷ୍ଟ୍ରପତି ବାଇଡେନଙ୍କ ସହ ଦ୍ୱିପାକ୍ଷିକ ଆଲୋଚନା କରିବି.. ଏଥିରେ ଭାରତ-ଆମେରିକାର ବ୍ୟାପକ ରଣନୀତି ସହଯୋଗ ନେଇ ସମୀକ୍ଷା କରିବି.. ପରସ୍ପର ସ୍ୱାର୍ଥ ନେଇ ଆଲୋଚନା କରିବା ସହ ବିଶ୍ୱର ମୁଖ୍ୟ ପ୍ରସଙ୍ଗ ଉପରେ ମୁଁ ଆଲୋଚନା କରିବି..”
ପ୍ରଧାନମନ୍ତ୍ରୀ ମୋଦି ଆହୁରି ମଧ୍ୟ କହିଛନ୍ତି – “ରାଷ୍ଟ୍ରପତି ବାଇଡେନଙ୍କ ସମେତ କ୍ୱାଡ୍ ସମ୍ମିଳନୀରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମୋରିସନ୍ ଏବଂ ଜାପାନ ପ୍ରଧାନମନ୍ତ୍ରୀ ୟୋସିହିଦେ ସୁଗାଙ୍କୁ ମଧ୍ୟ ଭେଟିବି, ଯେଉଁଠି ଭବିଷ୍ୟତ ପାଇଁ ପରସ୍ପରର ସହଭାଗିତା ନେଇ ଆଲୋଚନା କରାଯିବ..” । ତେବେ ପ୍ରଧାନମନ୍ତ୍ରୀ ମୋଦି ଓ ରାଷ୍ଟ୍ରପତି ବାଇଡେନଙ୍କ ମଧ୍ୟରେ ପ୍ରଥମ ଥର ଦ୍ୱିପାକ୍ଷିକ ଆଲୋଚନା ହେବ । ଏଥିପାଇଁ ମୋଦିଙ୍କ ଏହି ଯାତ୍ରା ଉପରେ ରହିଛି ସାରା ବିଶ୍ୱର ନଜର । ନିଜର ୪ ଦିନିଆ ଗସ୍ତରେ ମୋଦି ଅନେକ କାର୍ଯ୍ୟକ୍ରମରେ ଯୋଗଦେବେ ।
ପ୍ରଧାନମନ୍ତ୍ରୀ ମୋଦିଙ୍କ ଆମେରିକା ଗସ୍ତର ସମ୍ପୂର୍ଣ୍ଣ କାର୍ଯ୍ୟକ୍ରମ:
- ୨୨ ସେପ୍ଟେମ୍ବର – ରାଷ୍ଟ୍ରପତି ବାଇଡେନଙ୍କ ଦ୍ୱାରା ଆୟୋଜିତ କୋଭିଡ୍-୧୯ ସମ୍ମିଳନୀରେ ଯୋଗଦେବେ
- ୨୩ ସେପ୍ଟେମ୍ବର – ଉପ-ରାଷ୍ଟ୍ରପତି କମଲା ହାରିସଙ୍କ ସହ ବୈଠକ ଏଥିସହ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମୋରିସନ୍ ଏବଂ ଜାପାନ ପ୍ରଧାନମନ୍ତ୍ରୀ ୟୋସିହିଦେ ସୁଗାଙ୍କୁ ଭେଟିବେ ମୋଦି ୱାସିଙ୍ଗଟନର ଆମେରିକାର ବଡ ବଡ କମ୍ପାନୀର ସିଇଓଙ୍କୁ ଭେଟିବେ ମୋଦି
- ୨୪ ସେପ୍ଟେମ୍ବର – ରାଷ୍ଟ୍ରପତି ବାଇଡେନଙ୍କ ସହ ଦ୍ୱିପାକ୍ଷିକ ଆଲୋଚନା ଏବଂ କ୍ୱାଡ୍ ବୈଠକରେ ଯୋଗଦେବେ ପ୍ରଧାନମନ୍ତ୍ରୀ ମୋଦି
- ୨୫ ସେପ୍ଟେମ୍ବର – ୟୁଏନ୍ ଜେନେରାଲ ଆସେମ୍ବଲିକୁ ସମ୍ବୋଧନ କରିବେ ମୋଦି
ଆମେରିକାରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେଇ ସେପ୍ଟେମ୍ବର ୨୬ ତାରିଖରେ ଭାରତ ଫେରିବେ ପ୍ରଧାନମନ୍ତ୍ରୀ । ତେବେ କରୋନା ମହାମାରୀ ପାଇଁ ପ୍ରାୟ ୨ ବର୍ଷ ପରେ ମୋଦିଙ୍କର ଏହା ପ୍ରଥମ ବିଦେଶ ଯାତ୍ରା ହୋଇଛି ।