କନକ ବ୍ୟୁରୋ: ଗିରିଧର ଗମାଙ୍ଗ, ତାଙ୍କ ପୁଅ ଶିଶିର ଗମାଙ୍ଗଙ୍କ ପରେ ଏବେ ଜୟରାମ ପାଙ୍ଗି ସୋମବାର ଭାରତୀୟ ରାଷ୍ଟ ସମିତ, ବିଆରଏସ୍ ମୁଖ୍ୟ ତଥା ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କୁ ଭେଟିଛନ୍ତି । ଏହାପରେ ଅବିଭକ୍ତ କୋରାପୁଟ ଜିଲ୍ଲାର ସମୀକରଣ ବଦଳିବା ପାଇଁ ଯାଉଛି । ଜୟରାମ ପାଙ୍ଗି ବିଜେପି ଛାଡି ନିକଟରେ ଦଣ୍ଡକାରଣ୍ୟ କମିଟି ଗଠନ କରିଥିଲେ । ଆଉ ସେ ଏବେ ରାଷ୍ଟ୍ରୀୟ ଦଳ ମୁହାଁ ହୋଇଛନ୍ତି । ଅର୍ଥାତ ଏହି ନେତାମାନେ ଖୁବଶୀଘ୍ର ବିଏଆରଏସରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ହେଉଛି । କୋରାପୁଟ ରାଜନୀତିରେ ଦୀର୍ଘଦିନ ଧରି ଗମାଙ୍ଗ-ପାଙ୍ଗିଙ୍କ ପ୍ରଭାବ ରହିଥିବାରୁ ଏମାନଙ୍କ ଦଳ ଡିଆଁ ଚର୍ଚ୍ଚା ଜିଲ୍ଲା ରାଜନୀତିକୁ ରୋଚକ କରିପାରେ ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ନିର୍ବାଚନରେ ବିଜେଡି ସହ ସମ୍ପର୍କ ତୁଟାଇ କୋରାପୁଟ ଆସନରୁ ବିଜେପିର ସାଂସଦ ପ୍ରାର୍ଥୀ ହୋଇଥିଲେ ଟାଣୁଆ ଆଦିବାସୀ ନେତା ଜୟରାମ ପାଙ୍ଗି । ସେ ୨ ଲକ୍ଷ ୮ ହଜାରରୁ ଅଧିକ ଭୋଟ ପାଇ ବିଜେଡି ପାଇଁ କଂଟା ସାଜିଥିଲେ । ଆଉ ଏଠାରୁ ଜିତିଥିଲେ କଂଗ୍ରେସର ସପ୍ତଗିରି ଉଲ୍ଲାକା । ଖାଲି ସେତିକି ନୁହେଁ ବିଜେପିର ସଙ୍ଗଠନ ଓ ଭୋଟ ପ୍ରତିଶତକୁ ସେ ମଧ୍ୟ ବଢାଇଥିଲେ । ଅନ୍ୟପଟେ ଗିରିଧର ଗମାଙ୍ଗ ଓ ତାଙ୍କ ପୁଅ ଶିଶିର ଗମାଙ୍ଗ ଜିଲ୍ଲାରେ ବିଜେପିର ଶକ୍ତି ବୃଦ୍ଧି କରିଥିଲେ । ତେଣୁ ଏହି ନେତା ଯଦି ଦଳ ଛାଡନ୍ତି ତାହାହେଲେ ବିଜେପିରେ ସଙ୍ଗଠନ ଉପରେ ପ୍ରଭାବ ପଡିପାରେ ବୋଲି ଚର୍ଚ୍ଚା ଜୋର ଧରିଛି ।
ରାୟଗଡା ଓ କୋରାପୁଟ ରାଜନୀତିରେ ଗମାଙ୍ଗ ଓ ପାଙ୍ଗି ପରିବାରର ଦବଦବା ରହିିଛି । କିନ୍ତୁ ଉଭୟ ବିଜେପିରେ କୋଣଠେସା ହେବା ପରେ ଦଳ ବଦଳାଇ ନୂଆ ରାଜନୈତକି ସମୀକରଣ ଲକ୍ଷ୍ୟରେ ଅଛନ୍ତି । ଆଉ ଏହି ନେତା ଖୁବଶୀଘ୍ର ବିଆରଏସରେ ସାମିଲ ହୋଇପାରନ୍ତି ।