ସାରାରାଜ୍ୟରେ ହକି ଫିଭର: ରାଜ୍ୟବାସୀ ଦେଖିଲେ ହକି ବିଶ୍ୱକପ୍ ଉଦଘାଟନୀ
କନକ ବ୍ୟୁରୋ: ଓଡିଶା ଇତିହାସରେ ବୋଧହୁଏ ପ୍ରଥମ ଥର ପାଇଁ ଏଭଳି ଘଟଣା ଘଟିଛି, ଯେତେବେଳେ ସାରା ରାଜ୍ୟକୁ ଘାରିଛି ହକି ଫିଭର । ପିଲାଠୁ ବୟସ୍କ, ସମସ୍ତଙ୍କ ଭିତରେ ହକି ବିଶ୍ୱକପ ଉଦଘାଟନୀ ଉତ୍ସବ ଦେଖିବା ପାଇଁ ନାହିଁ ନଥିବା ଉକ୍ରଣ୍ଠା ଦେଖାଯାଇଛି । ଗାଁ ଠୁ ସହର ସବୁଠି ହକି ବିଶ୍ୱକପ୍ ଉଦଘାଟନୀ ଉତ୍ସବର ମଜା ଉଠାଇଛନ୍ତି ଲୋକେ ।
Kanak News is now on WhatsApp
Join and get latest news updates delivered to you via WhatsApp
ଘରେ ଘରେ ପହଂଚିଲା ‘ହକି ବିଶ୍ୱକପ ଉଦ୍ଘାଟନୀ’
ବିଭିନ୍ନ ସ୍ଥାନରେ ଏଲଇଡି ଲଗାଇଲେ ରାଜ୍ୟ ସରକାର
ଗଣମାଧ୍ୟମରେ ସାଂସ୍କୃତିକ କାର୍ଯ୍ୟକ୍ରମ ସିଧାପ୍ରସାରଣ
କ୍ରମାଗତ ଦ୍ୱିତୀୟ ଥର ହକି ବିଶ୍ୱକପର ଆୟୋଜନ କରି ଏକ ବିରଳ ରେକର୍ଡ କରିଛି ଓଡିଶା । କଟକ ବାରବାଟୀ ଷ୍ଟାଡିୟମରେ ଉଦ୍ଘାଟନୀ ଉତ୍ସବକୁ ଭବ୍ୟ ଓ ଆକର୍ଷଣୀୟ କରିବା ପାଇଁ ସବୁ ପ୍ରକାର ଉଦ୍ୟମ କରାଯାଇଛି । ଆଉ ଏହି ବିରଳ ରେକର୍ଡର ପ୍ରତ୍ୟକ ଓଡିଆଙ୍କୁ ସାମିଲ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି । ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମକୁ ଘରେ ଘରେ ପହଂଚାଇବା ପାଇଁ ଟେଲିଭିଜନ ଚ୍ୟାନେଲରେ ସିଧାପ୍ରସାରଣର ବ୍ୟବସ୍ଥା କରିଛି ସୂଚନା ଓ ଲୋକସଂପର୍କ ବିଭାଗ । ଏଥିସହ ବିଭିନ୍ନ ସ୍ଥାନରେ ବଡ ବଡ ଏଲଇଡି ଲଗାଇ ହକି ବିଶ୍ୱକପ୍ ଉଦଘାଟନୀ କାର୍ଯ୍ୟକ୍ରମ ଦେଖିବାର ସୁଯୋଗ ସୃଷ୍ଟି କରାଯାଇଛି । ଯେଉଁମାନେ ବାରବାଟୀ ଯାଇ ଉଦଘାଟନୀ ସମାରୋହର ପ୍ରତ୍ୟକ୍ଷ ଅନୁଭୂତି ନେଇପାରିନାହାଁନ୍ତି, ସେମାନେ ଏଲିଇଡି ଜରିଆରେ ଗାଁରେ ବସି ଆମୋଦିତ ହୋଇଛନ୍ତି । ଏପରିକି ବାଲେଶ୍ୱରରେ ଏକ ସିନେମା ହଲରେ ଉଦଘାଟନୀ କାର୍ଯ୍ୟକ୍ରମ ଦେଖିବାର ବନ୍ଦୋବସ୍ତ କରାଯାଇଥିଲା ।
୨୦୧୮ରେ ଓଡିଶା ପ୍ରଥମ ଥର ପାଇଁ ହକି ବିଶ୍ୱକପର ଆୟୋଜନ କରିଥିଲା । କିନ୍ତୁ ସେତେବେଳେ ହକି ଖେଳକୁ ନେଇ ରାଜ୍ୟବାସୀଙ୍କ ଭିତରେ ଯେତିକି ଉକ୍ରଣ୍ଠା ଥିଲା ତାହା ଏବେ ବହୁ ପରିମାଣରେ ବଢ଼ି ଯାଇଛି । ଯାହାର ପ୍ରମାଣ ବାରବାଟୀ ଷ୍ଟାଡିୟମରେ ଆୟୋଜିତ ହକି ବିଶ୍ୱକପ୍ ଉଦଘାଟନି ଉତ୍ସବରୁ ସ୍ପଷ୍ଟ ହୋଇଯାଇଛି ।