କନକ ବ୍ୟୁରୋ : ମୁଖ୍ୟମନ୍ତ୍ରୀ ଆସନରେ ବସିବା ପରେ ଭଗୱନ୍ତ ମାନ୍ ଗୋଟିଏ ପରେ ଗୋଟିଏ ବଡ ନିଷ୍ପତ୍ତି ନେଉଛନ୍ତି । ପ୍ରଥମେ ଦୁର୍ନୀତିରେ ରୋକ ଲଗାଇବାକୁ ଏକ ଟୋଲ ଫ୍ରି ନମ୍ବର ଜାରି କରିଥିବା ବେଳେ ଆଜି ପୁଣିଥରେ ଏକ ବଡ ନିଷ୍ପତ୍ତି ନେଇଛନ୍ତି ମାନ୍ । ବିଧାୟକଙ୍କୁ ମିଳୁଥିବା ପେନସନ ଫର୍ମୁଲାରେ ବଡ ଧରଣର ପରିବର୍ତ୍ତନ ନେଇ ଘୋଷଣା କରିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ । ଏଣିକି ବିଧାୟକଙ୍କୁ ଗୋଟିଏ କାର୍ଯ୍ୟକାଳର ପେନସନ ମିଳିବ । ଏବେ ଯେତେଥର ଜଣେ ବିଧାୟକ ହେଉଥିଲେ, ସେତେଥର ପେନସନ ପାଉଥିଲେ । କିନ୍ତୁ ଆପ୍ ସରକାରରେ ଏହି ପରିବର୍ତ୍ତନ ହେବାକୁ ଯାଉଛି ।

Advertisment

ଭଗୱନ୍ତ ମାନ୍ କହିଛନ୍ତି, ଏବେ ବେରୋଜଗାରୀ ଏକ ବଡ ମୁଦ୍ଦା । ଯୁବବର୍ଗ ଡିଗ୍ରୀ ଧରି ଘରେ ବସିଛନ୍ତି । ଯେଉଁମାନେ ଚାକିରି ମାଗୁଛନ୍ତି, ସେମାନଙ୍କୁ ଲାଠି ପାହାର ମିଳୁଛି । ତେଣୁ ଏଭଳି ଏକ ସମସ୍ୟାକୁ ଶେଷ କରିବାକୁ ରାଜ୍ୟ ସରକାର ବଡ ପଦକ୍ଷେପ ଉଡାଇଛନ୍ତି । ଅନେକ ବିଧାୟକ ୫ରୁ ୧୦ ଥର ଲେଖାଏଁ ଜିତିଛନ୍ତି । ସେମାନଙ୍କୁ ମାସିକ ଲକ୍ଷାଧିକ ଟଙ୍କାର ପେନସନ ମିଳୁଛି । କାହାକୁ ୪ ଲକ୍ଷ ତ ପୁଣି କାହାକୁ ୫ ଲକ୍ଷ ଟଙ୍କାର ପେନସନ ମିଳୁଛି । କିଛି ଲୋକ ଏମିତି ବି ଅଛନ୍ତି ଯେଉଁମାନେ ପୂର୍ବରୁ ସାଂସଦ ପରେ ବିଧାୟକ ହୋଇଛନ୍ତି । ଆଉ ଏଭଳି ନେତା ମାନେ ଉଭୟ ସାଂସଦ ଓ ବିଧାୟକଙ୍କ ପେନସନ ପାଉଛନ୍ତି । ଯାହାଦ୍ୱାରା ରାଜକୋଷରୁ ଅଧିକ ଟଙ୍କା ବ୍ୟୟ ହେଉଛି । କିନ୍ତୁ ଏଣିକି ମାତ୍ର ଗୋଟିଏ କାର୍ଯ୍ୟକାଳର ପେନସନ ପାଇପାରିବେ ବିଧାୟକ ।

ଭଗୱନ୍ତ କହିଛନ୍ତି, ଯିଏ ଯେତେଥର ଜିତୁ । ଏଣିକି ବିଧାୟକଙ୍କୁ ମାତ୍ର ଗୋଟିଏ କାର୍ଯ୍ୟକାଳର ପେନସନ ମିଳିବ ।ଯାହାଦ୍ୱାରା କୋଟି କୋଟି ଟଙ୍କା ବଞ୍ଚିଯିବ । ଆଉ ଏହି ଟଙ୍କାକୁ ଜନସାଧାରଣଙ୍କ ସୁବିଧା ସୁଯୋଗ ପାଇଁ ଖର୍ଚ୍ଚ କରାଯିବ । ଏହାଛଡା ବିଧାୟକଙ୍କ ପରିବାରକୁ ମିଳୁଥିବା ପେନସନ ଅର୍ଥକୁ ମଧ୍ୟ କମାଇ ଦେବାକୁ ନିଷ୍ପତ୍ତି ନିଆଯାଇଛି ।