ବଢ଼ିଚାଲିଛି ଏନଏସି ସଂଖ୍ୟା: ରାଜ୍ୟରେ ଆଉ ୨୨ଟି ନୂଆ ଏନଏସି ଘୋଷଣା କଲେ ମୁଖ୍ୟମନ୍ତ୍ରୀ
କନକ ବ୍ୟୁରୋ: ୧୩ ଜିଲ୍ଲାର ୨୨ଟି ସହରକୁ ମିଳିଲା ଏନଏସି ମାନ୍ୟତା । ପୂର୍ବରୁ ୩୫ଟି ନୂଆ ଏନଏସି ଓ ୫ଟି ମ୍ୟୁନସିପାଲଟି ନେଇ ଘୋଷଣା କରାଯାଇଥିଲା । ଏହାପରେ ଅନେକ ସ୍ଥାନରେ ନିଜ ନିଜ ସହରକୁ ଏନଏସି ମାନ୍ୟତା ଦେବାକୁ ନେଇ ପ୍ରତିବାଦ ହୋଇଥିଲା । ଏହାପରେ ରାଜ୍ୟ ସରକାର ୨୨ଟି ସହରକୁ ଏନଏସି ମାନ୍ୟତା ପ୍ରଦାନ କରିଛନ୍ତି । ଯାହାକୁ ନେଇ ଏବେ ସଂପୃକ୍ତ ଅଂଚଳବାସୀ ଖୁସି ପ୍ରକଟ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୨ଟି ସହରକୁ ବିଜ୍ଞପିତ ଅଂଚଳ ପରିଷଦ ବା ଏନଏସି ମାନ୍ୟତା ମଳିବା ପରେ ପରସ୍ପରକୁ ମିଠା ଖୁଆଇ, ବାଣ ଫୁଟାଇ ଉତ୍ସବ ମନାଇଛନ୍ତି ଜନତା । ୧୩ ଜିଲ୍ଲାର ୨୨ଟି ସହର ଏନଏସି ମାନ୍ୟତା ପାଇଥିବା ବେଳେ ଭଞ୍ଜନଗରକୁ ମ୍ୟୁନସିପାଲଟି ଭାବେ ଉନ୍ନୀତ କରାଯାଇଛି ।
ଦୀର୍ଘ ବର୍ଷ ଧରି ହେଉଥିବା ଦାବି ସାକାର ହୋଇଛି । କେତେ ବନ୍ଦ, କେତେ ଆନ୍ଦୋଳନ ପରେ ଦାବି ପୂରଣ ହୋଇଛି । ଆଉ ଯେତେବେଳେ ନିଜ ସହରକୁ ଏନଏସିର ମାନ୍ୟତା ମିିଳିଛି, ଖୁସିରେ ସବୁଠି ସେଲିବ୍ରେସନ୍ କରାଯାଉଛି । ବୋଲଗଡ଼ରୁ ବାମରା, ଖଇରା, ପୁରୁଣାକଟକ ସବୁଠି ଖୁସି ମନାଇବା ସହ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ।
ଏନଏସି ମାନ୍ୟତା ପାଇଥିବା ସହରଗୁଡ଼ିକର ତାଲିକାରେ ବୌଦ୍ଧ ଜିଲ୍ଲାର ମନମୁଣ୍ଡା, ପୁରୁଣାକଟକ ଓ ବାଉଁସୁଣି, ବଲାଙ୍ଗିରର ଲୋଇସିଂହା ଓ ସିନେ୍ଧକେଲା, ବରଗଡ଼ର ସୋହେଲା, ବାଲେଶ୍ୱରର ବାଲିଆପାଳ ଓ ଖଇରା, ଭଦ୍ରକର ଧାମରା, ଢେଙ୍କାନାଳର ରାସୋଳ, ଜଗତସିଂହପୁରର କୁଜଙ୍ଗ, କଳାହାଣ୍ଡିର ନର୍ଲା ଓ ମଦନପୁର ରାମପୁର, ଖୋର୍ଦ୍ଧାର ବୋଲଗଡ଼, ନୟାଗଡ଼ର ଶରଣକୁଳ, ପୁରୀର ସାକ୍ଷୀଗୋପାଳ ଓ କାକଟପୁର, ସମ୍ବଲପୁରର ରେଙ୍ଗାଲି ଓ ବାମଣ୍ଡା, ଏବଂ ସୁବର୍ଣ୍ଣପୁର ଜିଲ୍ଲାର ସୁବଳୟା, ଉଲୁଣ୍ଡା ଓ ରାମପୁର ।
ଜନତାଙ୍କ ଦାବି, ବଢ଼ୁଥିବା ଜନସଂଖ୍ୟା ଏବଂ ଅର୍ଥନୈତିକ ବିକାଶକୁ ଦୃଷ୍ଟିରେ ରଖି ଏହି ବିଜ୍ଞାପିତ ଅଂଚଳ ପରିଷଦ ଗଠନ ପାଇଁ ମୁଖ୍ୟମନ୍ତ୍ରୀ ନିଷ୍ପତି ନେଇଛନ୍ତି । ପୂର୍ବରୁ ୩୫ଟି ନୂଆ ଏନଏସି ଓ ୫ଟି ମ୍ୟୁନସିପାଲଟି ନେଇ ଘୋଷଣା କରାଯାଇଥିଲା । ତେବେ ୬୮ଟି ପୁରୁଣା ବିଜ୍ଞପିତ ଅଂଚଳ ପରିଷଦ ଏବଂ ଏହାପୂର୍ବରୁ ଘୋଷଣା ହୋଇଥିବା ୩୫ ଏନଏସି ଏବଂ ନୂଆ ୨୨ ଏନଏସିକୁ ମିଶାଇ, ଓଡ଼ିଶାରେ ମୋଟ୍ ବିଜ୍ଞପିତ ଅଂଚଳ ପରିଷଦ ସଂଖ୍ୟା ୧୨୫ରେ ପହଂଚିଛି ।
ପୁରୁଣା ବିଜ୍ଞପିତ ଅଂଚଳ ପରିଷଦ ୬୮
ପୂର୍ବରୁ ଘୋଷଣା ହୋଇଥିବା ଏନଏସି ୩୫
ନୂଆ ବିଜ୍ଞପିତ ଅଂଚଳ ପରିଷଦ ୨୨
ମୋଟ: ୧୨୫
ତେବେ ୫ଟି ଅଧ୍ୟକ୍ଷ, ବିଭିନ୍ନ ଜିଲ୍ଲା ଗସ୍ତ କରି ଲୋକଙ୍କ ଦାବି ଓ ବିକାଶର ଆବଶ୍ୟକତା ସମ୍ପର୍କରେ ଆଲୋଚନା କରିଥିଲେ । ଏହା ପରେ ମୁଖ୍ୟମନ୍ତ୍ରୀ ନିଷ୍ପତି ନେଇଥିଲେ ।