ଓଡିଶାରେ ବଢୁଛି ଆଇସିୟୁ ରୋଗୀଙ୍କ ସଂଖ୍ୟା । ପ୍ରାୟ ଅଧା ଆଇସିୟୁ ବେଡ ଫୁଲ । ସରକାର କହିଲେ, ଆବଶ୍ୟକ ଥିଲେ ଆସନ୍ତୁ ହସପିଟାଲ
କନକ ବ୍ୟୁରୋ: ଚିନ୍ତା ବଢାଉଛି ରାଜ୍ୟରେ ସଂକ୍ରମଣ ସ୍ଥିତି । ଲଗାତାର ୬ ଦିନ କରୋନା ସଂକ୍ରମଣ ୬ ହଜାର ଉପରେ ରହିଛି । ଗତ ୨୪ ଘଂଟା ମଧ୍ୟରେ ଚିହ୍ନଟ ହୋଇଛନ୍ତି ୬ହଜାର ୭୩ ପଜିଟିଭ । ସର୍ବାଧିକ କରୋନା ପଜିଟିଭ, ୧୦୯୨ଜଣ ଚିହ୍ନଟ ହୋଇଛନ୍ତି ଖୋର୍ଦ୍ଧା ଜିଲ୍ଲାରୁ । ୨୪ ଘଂଟାରେ ୩୬ ହଜାର ୮୪୫ ନମୁନା ପରୀକ୍ଷାରୁ ଏହି ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଅର୍ଥାତ ରାଜ୍ୟରେ କମ୍ ନମୁନା ପରୀକ୍ଷା କରାଯାଇଛି । ଫଳରେ କରୋନା ପଜିଟିଭ ରେଟ୍ ରହିଛି ୧୬.୪୮ ପ୍ରତିଶତ । ରାଜ୍ୟରେ କରୋନାର ଏହି ଟ୍ରେଣ୍ଡ କହୁଛି, ୬ ଦିନ ହେଲା ଏକ ପ୍ରକାର ସ୍ଥିର ଅଛି କରୋନା ସଂକ୍ରମଣ ।
Kanak News is now on WhatsApp
Join and get latest news updates delivered to you via WhatsApp
ଦିନକରେ ଆଉ ୧୦ଜଣଙ୍କର ମୃତ୍ୟୁ ସହ ରାଜ୍ୟରେ ମୋଟ କରୋନା ଜନିତ ମୃତ୍ୟୁ ସଂଖ୍ୟା ୨ହଜାର ୭କୁ ବୃଦ୍ଧି ପାଇଛି । ଗତ ୬ ଦିନରେ କରୋନା ଯୋଗୁଁ ରାଜ୍ୟରେ ୪୯ ଜଣଙ୍କର ମୃତ୍ୟୁ ହୋଇଛି । ଏପରି ସମୟରେ ଆଇଆଇଟି କାନପୁରର ଷ୍ଟଡି ଅନୁସାରେ ମେ ଦ୍ୱିତୀୟ ସପ୍ତାହ ବେଳକୁ କରୋନାର ପିକ ଆସିପାରେ ବୋଲି ସୂଚନା ଦେଇଛନ୍ତି ଜନସ୍ୱାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର ।
ସଂକ୍ରମଣର ଭୟାବହତା ଭିତରେ ଯଦି କିଛି ଚିନ୍ତା ବଢାଇଛି ତା ହେଉଛି ଆଇସିୟୁ ରୋଗୀଙ୍କ ସଂଖ୍ୟା ବୃଦ୍ଧି । ରାଜ୍ୟରେ ୧୦୬୦ କରୋନା ରୋଗୀ ଏବେ ଆଇସିୟୁରେ ଚିକିତ୍ସିତ ହେଉଥିବା ବେଳେ ୨୨୩ ଜଣ ରୋଗୀ ରହିଛନ୍ତି ଭେଂଟିଲେଟରରେ । ଜେନେରାଲ ବେଡ ବା ସାଧରଣ ବେଡରେ ଚିକିତ୍ସିତ ହେଉଛନ୍ତି ୨୯୪୨ଜଣ ରୋଗୀ । ଏହାରି ଭିତରେ ଆବଶ୍ୟକ ନଥିଲେ ହସ୍ପିଟାଲ ବେଡ଼ ଅକ୍ତିଆର ନକରିବାକୁ ସରକାର ପରାମର୍ଶ ଦେଇଛନ୍ତିା
ରାଜ୍ୟରେ ଟେଷ୍ଟିଂର ଚାହିଦା ବଢିଥିବା ବେଳେ ଟେଷ୍ଟିଂ କିଟର ଅଭାବ ନାହିଁ ବୋଲି ରାଜ୍ୟ ସରକାର ସ୍ପଷ୍ଟ କରିଛନ୍ତି । କିନ୍ତୁ ଟାର୍ଗଟେଡ ଭାକସିନେସନ ଅର୍ଥାତ ଯେଉଁମାନଙ୍କର ଆବଶ୍ୟକତା ରହିଛି ସେମାନଙ୍କର ପରୀକ୍ଷା କରାଯିବ ବୋଲି କହିଛନ୍ତି ।