କନକ ବ୍ୟୁରୋ: ରଥଯାତ୍ରାରେ ବିଭିନ୍ନ ଆଡୁ ଅଘଟଣର ଖବର ଆସିଛି । ବାଲେଶ୍ୱର ଜିଲ୍ଲା ବସ୍ତାରେ ରଥ ଟାଣୁଥିବାବେଳେ ୧୧ କେଭି ବିଦ୍ୟୁତ ତାର ଲାଗି ଜଣଙ୍କର ମୃତ୍ୟୁ ହୋଇଥିବାବେଳେ ୭ଜଣ ଗୁରୁତର ଆହତ ହୋଇଛନ୍ତି । ଆଜି ସଂଧ୍ୟାରେ ବସ୍ତା ଥାନା ଗୁଡିଖାଳ ଗାଁରେ ଶତାଧିକ ଲୋକ ରଥ ଟାଣୁଥିବାବେଳେ ମଠସାହି ନିକଟ ରାସ୍ତା ଉପର ଦେଇ ଯାଇଥିବା ୧୧ କେଭି ବିଦ୍ୟୁତ ତାର ସହିତ ରଥଟି ଲାଗି ଯାଇଥିଲା । ବର୍ଷା ଯୋଗୁଁ ରଥ ଓଦା ଥିବାବେଳେ ଏହା ସଂସ୍ପର୍ଷରେ ଆସିଥିବା ଲୋକଙ୍କୁ ବିଦ୍ୟୁତ ଆଘାତ ଲାଗିଥିଲା । ୮ ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ଆମ୍ବୁଲାନ୍ସରେ ହସ୍ପିଟାଲ ନିଆଗଲା । ହେଲେ ସେମାନଙ୍କ ଭିତରୁ ଆଗରଡା ଗାଁର ଅନିଲ କୁମାର ସାହୁ ନାମକ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି କଳାହାଣ୍ଡି ଜିଲ୍ଲା ଧର୍ମଗଡରେ ରଥ ଟାଣିଲାବେଳେ ଚକ ତଳେ ଚାପିହୋଇ ଜଣେ ନାବାଳକଙ୍କ ହାତ କଟି ଯାଇଛି । ସେ ଜୟପାଟଣା ବ୍ଲକ ଆମଜୋର ଗାଁର ଘନଶ୍ୟାମ ଦୁର୍ଗା ବୋଲି ଜଣାପଡିଛି । ତୃତୀୟ ଶ୍ରେଣୀରେ ପଢୁଥିବା ଘନଶ୍ୟାମଙ୍କ ବାପା ସେନା ବାହିନୀରେ କାମ କରନ୍ତି । ମାଆଙ୍କ ସହ ଆଜି ରଥଯାତ୍ରା ଦେଖିବାକୁ ଆସିଥିବାବେଳେ ଏହି ଅଘଟଣର ଶିକାର ହୋଇଛନ୍ତି । କଳାହାଣ୍ଡି କୋକସରାରେ ଝିଅ ଘରକୁ ଯାଉଥିବାବେଳେ ପୋଲିସ ଗାଡି ଧକ୍କାରେ ଜଣେ ମହିଳାଙ୍କ ମୃତ୍ୟୁ ହୋଇଛି । ଆମପାଣି ପଂଚାୟତ କନ୍ଦାଗଡ ଗାଁର କିଆଁ ମାଝୀ ନିଜ ୧୦ ବର୍ଷର ଝିଅ ସହିତ ବିବାହିତା ଝିଅ ଘରକୁ ଯାଉଥିଲେ । ଭୁର୍ଷାଗୁଡା ନିକଟରେ ବିପରୀତ ଦିଗରୁ ଆସୁଥିବା ଆମପାଣି ପୋଲିସ ଗାଡି ଦ୍ରୁତ ବେଗରେ ଆସି ତାଙ୍କୁ ଧକ୍କା ଦେଇଥିଲା । ୩ଜଣ ଗୁରୁତର ହୋଇଥିବାବେଳେ କୋକସରା ହସ୍ପିଟାଲରେ ମହିଳାଙ୍କ ମୃତ୍ୟୁ ହୋଇଛି ।