୭ ମାସ ପରେ ଖୋଲିଲା ଦିଗପହଣ୍ଡି ଯୁବତୀଙ୍କ ହତ୍ୟା ପଛର ରହସ୍ୟ । ଅସଦାଚରଣ ଉଦ୍ୟମ କରି ଫେଲ ମାରିବା ପରେ ପାଣିରେ ବୁଡାଇ ମାରିଥିଲା ଅଭିଯୁକ୍ତ ।
କନକ ବ୍ୟୁରୋ : ୭ମାସ ପରେ ଗଞ୍ଜାମ ଜିଲ୍ଲାର ଯୁବତୀଙ୍କ ହତ୍ୟାକାଣ୍ଡର ପର୍ଦ୍ଦାଫାଶ ହୋଇଛି । ସେହି ଗାଁର ଜଣେ ଯୁବକ ଯୁବତୀଙ୍କୁ ପାଣିରେ ବୁଡାଇ ହତ୍ୟା କରିଥିବା ପୋଲିସ କହିଛି । ତେବେ ଏହି ଘଟଣାରେ କେହି ପ୍ରତ୍ୟକ୍ଷଦର୍ଶୀ ନଥିବାରୁ ପୋଲିସ ପାଇଁ ହତ୍ୟାକାରୀକୁ ଧରିବା ସବୁଠାରୁ ବଡ ଚ୍ୟାଲେଂଜ ଥିଲା ।
Kanak News is now on WhatsApp
Join and get latest news updates delivered to you via WhatsApp
ଗଂଜାମ ଜିଲ୍ଲା କେ ନୂଆ ଗାଁ ଥାନା ଅଂଚଳର ଯୁବତୀଙ୍କୁ ହତ୍ୟାର କାହାଣୀ ଶୁଣିଲେ ଆପଣ ବି ତାଜୁବ ହୋଇଯିବେ । ଇଏ ହେଉଛି ସେହି ଅଭିଯୁକ୍ତ ମନୋଜ ବେହେରା ଯିଏ ପୋଲିସ ଆଗରେ ଖୋଲିଛି ହତ୍ୟା ପଛର ଗୁମର ।
ଘଟଣା ଘଟିଥିଲା ଏମିତି । ମେ ୧୦ ତାରିଖ । ସକାଳ ପ୍ରାୟ ୯ଟା । ମାଆଙ୍କ ସହ ବିଲକୁ ଯାଇଥିଲେ ପୀଡିତା । ବିଲରେ ମାଆଙ୍କୁ ଛାଡି ପାଖ ନଈକୁ ଗାଧୋଇବାକୁ ଯାଇଥିଲେ । ପିଡିତା ଗାଧୋଇବା ସମୟରେ ସବୁବେଳେ ଲୁଚିକରି ଦେଖୁଥିଲା ମନୋଜ । ସେଦିନ ବି ଲୁଚି କରି ସବୁ ଦେଖୁଥିଲା । ଯୁବତୀଙ୍କୁ ଏକୁଟିଆ ପାଇ ପ୍ରଥମେ ପାଣି ଭିତରେ ଅସଦାଚରଣ କରିବାକୁ ଚେଷ୍ଟା କରିଥିଲା ମନୋଜ । କିନ୍ତୁ ଯୁବତୀ ଜଣଙ୍କ ଏହାର ବିରୋଧ କରିବାରୁ ଅତି ନିର୍ମମ ଭାବେ ପାଣିରେ ବୁଡାଇ ମାରି ଦେଇଥିଲା ।
ଘଟଣାର ଦୀର୍ଘ ୭ମାସ ଧରି ତଦନ୍ତ ଚାଲିଥିଲେ ମଧ୍ୟ ପୋଲିସ ଅଭିଯୁକ୍ତ ପାଖରେ ପହଂଚିପାରୁନଥିଲା । କାରଣ ଏହି ଘଟଣାର କେହି ପ୍ରତ୍ୟକ୍ଷଦର୍ଶୀ ନଥିଲେ । ପୋଲିସର କହିବାନୁସାରେ ଯୁବତୀଙ୍କୁ ସବୁଦିନ ପିଛା କରୁଥିଲା ମନୋଜ । ଏକଥା ଗାଁର କିଛି ଲୋକ ଏବଂ ପରିବାର ଲୋକଙ୍କ ଠାରୁ ଜାଣିବା ପରେ ମନୋଜ ଉପରେ ପୋଲିସର ସନ୍ଦେହ ବଢିଥିଲା ।
ଯୁବତୀଙ୍କୁ କେମିତି ପିଛା କରୁଥିଲା ମନୋଜ, ଗାଧୋଇବା ସମୟରେ କେମିତି ଲୁଚି କରିଦେଖୁଥିଲା, କେଉଁଠି ଲୁଚି କରି ଦେଖୁଥିଲା ଏବଂ ଅସଦାଚରଣ ଉଦ୍ୟମ ସହିତ କିପରି ହତ୍ୟା କଲା ତାର ଆଜି ଡେମୋ ଦେଖାଇଥିଲା ମନୋଜ । ୭ମାସର ବ୍ୟବଧାନ ପରେ ଏହି ଲୋମଟାଙ୍କୁରା ହତ୍ୟାକାଣ୍ଡ ଉପରୁ ଶେଷରେ ପରଦା ହଟିଛି ।