ଠପ ହେଲା ମହାନଦୀ ଜଳବିବାଦ ଟ୍ରିବ୍ୟୁନାଲ: ଅଧାରେ ଝୁଲିଲା ବିବାଦର ଶୁଣାଣି

କନକ ବ୍ୟୁରୋ: ମହାନଦୀ ଜଳ ବିବାଦର ଶୁଣାଣୀ ପାଇଁ ଗଠିତ ଟ୍ରିବ୍ୟୁନାଲର ଅବଧି ଚଳିତମାସ ୧୧ରେ ଶେଷ ହୋଇଛି ।  ପୂର୍ବରୁ  ମହାନଦୀ ଜଳବିବାଦର ସମାଧାନ ଲାଗି ଗଠିତ ଟ୍ରିବ୍ୟୁନାଲର  ଅବଧି ଗୋଟିଏଥର ବଢାଇଥିଲେ ସରକାର । କିନ୍ତୁ ଏବେ ଟ୍ରିବ୍ୟୁନାଲର ଅବଧି  ବଢିବ କି ନାହିଁ ତାହା ସ୍ପଷ୍ଟ ହୋଇନାହିଁ ।  ଫଳରେ ଶୁଣାଣି ନେଇ ଅନିଶ୍ଚିତତା ଦେଖାଦେଇଛି ।

 -ଆସନ୍ତା ୨୫ ତାରିଖ ଶୁଣାଣି ଓ କ୍ଷେତ୍ର ପରିଦର୍ଶନକୁ ବାତିଲ କରାଯାଇଛି

-୨୦୧୮ ମାର୍ଚ୍ଚ ୧୨ ତାରିଖରେ ମହାନଦୀ ଟ୍ରିବ୍ୟୁନାଲ ଗଠନ ହୋଇଥିଲା

-୨୦୨୧ରେ କାର୍ଯ୍ୟକାଳ ଦୁଇବର୍ଷ ବୃଦ୍ଧି ହୋଇଥିଲା

-ଫେବୃଆରୀ ଶୁଣାଣିବେଳେ  ଓଡିଶା ଓ ଛତିଶଗଡ  ଅବଧି ବୃଦ୍ଧି ପାଇଁ ଅନୁରୋଧ

-ଟ୍ରିବ୍ୟୁନାଲ ବି ପଠାଇଥିଲା ଷ୍ଟାଟସ ରିପୋର୍ଟ

ବର୍ତମାନ ଅବଧି  ବୃଦ୍ଧି ଆବେଦନ ଆଇନ ମନ୍ତ୍ରଣାଳୟ ନିକଟରେ ବିଚାରାଧୀନ ଅଛି ।

କୋଭିଡ ମହାମାରୀ ଯୋଗୁଁ  ଦୁଇବର୍ଷ ଧରି ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ଶୁଣାଣି ହୋଇପାରିନାହି । ଆଉ ଟ୍ରିବ୍ୟୁନାଲର ଅବଧି ବୃଦ୍ଧି ନ ହେବା ଜଳବିବାଦର ସମାଧାନକୁ ଅନିଶ୍ଚିତତା ଆଡକୁ ଠେଲିଦେଇଛି । ଏ ନେଇ କେନ୍ଦ୍ର ସରକାର କି ପଦକ୍ଷେପ ନେଉଛନ୍ତି ତାକୁ ଅପେକ୍ଷା କରାଯାଇଛି ।

ମହାନଦୀ ଜଳବିବାଦ ଟ୍ରିବ୍ୟୁନାଲ ଫେବୃଆରୀ ୧୩ ତାରିଖ ସୁଦ୍ଧା ୩୫ଟି ଶୁଣାଣି କରିଛି ।  ଓଡିଶା ଦ୍ୱାରା  ଦାଖଲ ମଧ୍ୟବର୍ତୀକାଳୀନ ଆବେଦନର ଶୁଣାଣି ସରିଛି । କିନ୍ତୁ ଏ ଯାଏଁ ରାୟ ପ୍ରକାଶ ପାଇନାହିଁ । ଓଡିଶାର ମୂଳ ଆବେଦନର ଶୁଣାଣି ପ୍ରକ୍ରିୟା ଆରମ୍ଭ ହୋଇନାହିଁ ।  ତେବେ ଅବଧି ବୃଦ୍ଧି ପାଇନଥିବାରୁ  ଓଡିଶା ଓ ଛତିଶଗଡ ସୁପ୍ରିମକୋର୍ଟ ଯିବାକୁ ପ୍ରସ୍ତୁତ ହେଉଛନ୍ତି ବୋଲି କୁହାଯାଉଛି ।  ଏପଟେ ମହାନଦୀ ପ୍ରସଙ୍ଗକୁ ନେଇ ରାଜ୍ୟ ସରକାରଙ୍କୁ ଘେରିଛନ୍ତି ବିରୋଧୀ ।

କେନ୍ଦ୍ର ସରକାର ସବୁ ଜଳବିବାଦର ସମାଧାନ ପାଇଁ ଏକକ ଟ୍ରିବ୍ୟୁନାଲ  ଗଠନ ପ୍ରସ୍ତାବ ରଖିଛନ୍ତି ।  ଏ ନେଇ ଲୋକସଭାରେ ବିଲ୍ ପାଶ ହୋଇଛି ।  ରାଜ୍ୟସଭାରେ ଖୁବଶୀଘ୍ର ବିଲ ପାଶ କରିବା ପାଇଁ ଯୋଜନା  କରିଛନ୍ତି କେନ୍ଦ୍ର । ତେଣୁ  ମହାନଦୀ ଜଳବିବାଦ ଟ୍ରିବ୍ୟୁନାଲ ଅବଧି ବୃଦ୍ଧିକୁ  କେନ୍ଦ୍ର ସରକାର ବିଳମ୍ବ କରୁଥାଇପାରନ୍ତି ବୋଲି ଅନୁମାନ କରାଯାଉଛି ।