ରାଜ୍ୟରେ ଆରମ୍ଭ ହେଲା ଖରିଫ ଧାନ କିଣା ପ୍ରକ୍ରିୟା । ଆଜିଠୁ ବରଗଡ଼ରେ ଆରମ୍ଭ, ୧୨ ତାରିଖରେ ଧାନ ବିକିବେ ସମ୍ବଲପୁର ଚାଷୀ । ଧାନ ବିକ୍ରିକୁ ନେଇ ଦ୍ୱନ୍ଦ୍ୱ ବଢ଼ାଇଲା ନୂଆ କୃଷି ଆଇନ
କନକ ବ୍ୟୁରୋ : ଶୁଭ ମୁହୁର୍ତ୍ତ ଦେଖି ନଡ଼ିଆ ଭାଙ୍ଗି ଆରମ୍ଭ ହୋଇଛି ଧାନ କିଣା । ବରଗଡ଼ ଜିଲ୍ଲାରେ ଚଳିତବର୍ଷ ଖରିଫ ଋତୁର ପ୍ରଥମ ଧାନ ସଂଗ୍ରହ ଆରମ୍ଭ ହୋଇଛି । ଜିଲ୍ଲାର ଅତାବିରା, ପଦ୍ମପୁର ଏବଂ ବରଗଡ଼ ଆରଏମ୍ସି ଅଧିନରେ ୧୮୫ଟି କ୍ରୟ କେନ୍ଦ୍ରରେ ଧାନ ସଂଗ୍ରହର ବ୍ୟବସ୍ଥା ହୋଇଛି । ଚଳିତ ବର୍ଷ ବରଗଡ଼ ଜିଲ୍ଲାରେ ୧ ଲକ୍ଷ ୩୩ ହଜାର ୯୩ ଜଣ ଚାଷୀ ଧାନ ବିକ୍ରି ପାଇଁ ପଞ୍ଜିକରଣ କରିଛନ୍ତି । ଆଉ ଚାଷୀଙ୍କୁ ମୋଟ୍ ୧ ଲକ୍ଷ ୪୪ ହଜାର ୪୧ଟି ଟୋକନ୍ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ଧାନ ସଂଗ୍ରହ ଆରମ୍ଭ ହୋଇଥିବା ବେଳେ ନୂଆ କୃଷି ଆଇନ୍ରେ ହୋଇଥିବା ବ୍ୟବସ୍ଥାକୁ ନେଇ ଚାଷୀଙ୍କ ଭିତରେ ଦ୍ୱନ୍ଦ୍ୱ ବଢ଼ିବାରେ ଲାଗିଛି । କାରଣ, ସରକାରୀ ବ୍ୟବସ୍ଥା ବାହାରେ ଧାନ ବିକ୍ରି କରିବାର ଯେଉଁ ବ୍ୟବସ୍ଥା ନୂଆ ଆଇନ୍ରେ ହୋଇଛି, ତାକୁ ନେଇ ଚାଷୀଙ୍କ ଦ୍ୱନ୍ଦ୍ୱ ବଢ଼ାଇଛି । କେଉଁଠି ଧାନ ବିକ୍ରି କରିବେ ଚାଷୀ? କିନ୍ତୁ କୃଷି ବିଭାଗର ସୂଚନା ଅନୁସାରେ, ଚାଷୀ ମଣ୍ଡି ବାହାରେ ଧାନ ବିକ୍ରି କରିପାରିବେ । କିନ୍ତୁ ଧାନ କିଣୁଥିବା ବ୍ୟକ୍ତି ବା ସଂସ୍ଥା, ସର୍ବନିମ୍ନ ମୁଲ୍ୟ ନିଶ୍ଚିତ କରିବା ଆବଶ୍ୟକ ।
ଚଳିତବର୍ଷ ଓଡ଼ିଶାରେ ବିପୁଳ ପରିମାଣରେ ଧାନ ଉତ୍ପାଦନ ହୋଇଛି । ହେଲେ ସାଧାରଣତଃ, ଜଳ ସେଚିତ ଜମିରୁ ଏକର ପିଛା ୧୯ କ୍ୱିଂଟାଲ ଏବଂ ଅଣ ଜଳସେଚିତ ଜମିରୁ ଏକର ପିଛା ୧୩ କ୍ୱିଂଟାଲ ଧାନ ସଂଗ୍ରହର ବ୍ୟବସ୍ଥା ରହିଛି । ଯାହା ଚାଷୀଙ୍କ ଦ୍ୱନ୍ଦ୍ୱ୍ୱ ବଢ଼ାଇଛି । କିନ୍ତୁ ସମବାୟ ବିଭାଗର ସୂଚନା ଅନୁସାରେ, କେଉଁ ଜିଲ୍ଲାରେ ଏକର ପିଛା କେତେ ଧାନ କିଣା ହେବ ତାହା ଜିଲ୍ଳା ସ୍ତରୀୟ ଧାନ ସଂଗ୍ରହ କମିଟି ଡିପିସି ନିଷ୍ପତି ନିଏ । ତେଣୁ ଭିନ୍ନ ଭିନ୍ନ ଜିଲ୍ଲାରେ ଏହା ଭିନ୍ନ ଭିନ୍ନ ଅନୁପାତରେ ଏହା ନିର୍ଦ୍ଧାରଣ ହେବ ।
ନୂଆ କୃଷି ଆଇନ୍ ଅନୁସାରେ ଧାନର ବିକ୍ରି ମୂଲ୍ୟ ସବୁଠି ସମାନ । ହେଲେ ପଡ଼ୋଶୀ ରାଜ୍ୟ ଗୁଡ଼ିକରେ ଧାନ ସଂଗ୍ରହ ଉପରେ ବୋନସ୍ ବ୍ୟବସ୍ଥା ରହିଛି । ତେଣୁ ଚାଷୀ ଓଡ଼ିଶା, ଓଡ଼ିଶା ବାହରେ ଧାନ ବିକ୍ରି କରିବାର ଆଶଙ୍କା ରହିଛି । ତେବେ ଏଦିଗରେ କିଛି ଚୁଡ଼ାନ୍ତ ନିଷ୍ପତି ହୋଇନଥିବା ସମବାୟ ବିଭାଗ ପକ୍ଷରୁ ସୂଚନା ଦିଆଯାଇଛି ।
ବରଗଡ଼ରେ ସୋମବାରଠାରୁ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଥିବା ବେଳେ ୧୨ ତାରିଖରୁ ସମ୍ବଲପୁର ଜିଲ୍ଲାରେ ଧାନ ସଂଗ୍ରହ ହେବ । ସମ୍ବଲପୁର ଜିଲ୍ଲାରେ ୫୩ ହଜାର ୧୪୭ ଚାଷୀ ଧାନ ବିକ୍ରି ପାଇଁ ପଂଜିକୃତ କରିଛନ୍ତି । ଆଉ ବର୍ତମାନ ସୁଦ୍ଧ ୪୨ ହଜାର ୪୨୩ ଟୋକନ୍ ଦିଆଯାଇଛି ।