କୋର୍ଟ ଛାଡି ଗାଁ ପାଳଗଦାରେ ବସି ନ୍ୟାୟ ଦେଲେ ବିଚାରପତି: ୪ ବେସାହାରା ଶିଶୁଙ୍କ ସମସ୍ୟା ପଚାରି ବୁଝିଲେ
କନକ ବ୍ୟୁରୋ: ସମସ୍ୟାର ସମାଧାନ ପାଇଁ ସମସ୍ତେ କୋର୍ଟଙ୍କ ଦ୍ୱାରସ୍ଥ ହୋଇଥାନ୍ତି । କିନ୍ତୁ କେବେ ଆପଣ ଶୁଣିଛନ୍ତି ଯେ ଖୋଦ୍ ବିଚାରପତିଙ୍କୁ କୋର୍ଟ ବାହାରେ ମାମଲାର ଶୁଣାଣି ବା କୌଣସି ସମସ୍ୟାର ସମାଧାନ କରିବା କଥା । ବାସ୍ତବରେ ଏମିତି କିଛି ଘଟିଛି କେନ୍ଦ୍ରାପଡ଼ାରେ । ଖୋଦ୍ ବିଚାରପତି ଗାଁରେ ପହଂଚି ସମସ୍ୟା କଥା ବୁଝିଛନ୍ତି । ପିଲାଙ୍କୁ ପାଖରେ ବସାଇ ସେମାନଙ୍କ ସମସ୍ୟାର ସମାଧାନ କରିଛନ୍ତି । ରାଜନଗର ଜିଲ୍ଲା ଚାରିପୋଖରିଆ ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ । ଗାଁର ଅମର ବାରିକଙ୍କ ଅକାଳ ମୃତ୍ୟୁ ପରେ ତାଙ୍କ ସ୍ତ୍ରୀ ତାଙ୍କର ଚାରି ପିଲାଙ୍କୁ ଛାଡ଼ି କୁଆଡ଼େ ପଳାଇଲେ । ବାପାଙ୍କ ମୃତ୍ୟୁ ଏବଂ ମା’ କୁଆଡ଼େ ଚାଲିଯିବା ପରେ ସେହି ୪ ଶିଶୁ ଏକା ହୋଇଯାଇଥିଲେ । ପ୍ର୍ରଥମେ କନକ ନ୍ୟୁଜରେ ଏହି ଖବର ପ୍ରସାରିତ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ଖବର କେନ୍ଦ୍ରାପଡ଼ା ଜିଲ୍ଲା ଆଇନ୍ ପ୍ରାଧିକରଣ ଅଧ୍ୟକ୍ଷ ତଥା ଜିଲ୍ଲା ଜଜ୍ ବିଶ୍ୱଜିତ୍ ମହାନ୍ତିଙ୍କୁ ବେଶ୍ ପ୍ରଭାବିତ କରିଥିଲା । ଆଉ ତୁରନ୍ତ ଏହି ଛୁଆ କେମିତି ସହାୟତା ପାଇବେ, ସେଥିପାଇଁ ଜିଲ୍ଲା ଆଇନ୍ ସେବା ପ୍ରାଧିକରଣ ସଚିବ ତଥା ଜଜ୍ ସୁମିତ୍ରା ସାହୁଙ୍କୁ ଚାରିପୋଖରିଆ ଗାଁକୁ ପଠାଇଥିଲେ । ଜଜ୍ ସୁମିତ୍ରା ଗାଁରେ ପହଂଚି ପ୍ରତିଟି ସମସ୍ୟା ପଚାରି ବୁଝିଥିଲେ । ୪ ଶିଶୁଙ୍କୁ ସମସ୍ତ ସୁବିଧା ଯୋଗାଇ ଦେବା ପାଇଁ ଶିଶୁ ସୁରକ୍ଷା ଅଧିକାରୀ ଓ ଜିଲ୍ଲା ସାମାଜିକ ସୁରକ୍ଷା ଅଧିକାରୀଙ୍କୁ ଘଟଣାସ୍ଥଳକୁ ଡକାଇ ନିର୍ଦ୍ଦେଶ ଦେଇଥିଲେ ଜଜ୍ ।
ଶିଶୁଙ୍କ ପରିବାରକୁ ତୁରନ୍ତ ଜାଗା ଓ ଘର ଯୋଗାଇ ଦେବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ଜଜ୍ । ଏହାସହ ସେହି ସ୍ଥାନରେ ଶିଶୁମାନଙ୍କ ପାଇଁ ବ୍ୟାଙ୍କ ଆକାଉଂଟ ମଧ୍ୟ ଖୋଲାଯାଇଛି ।
ବାପା, ମାଆ ଛେଉଣ୍ଡ ହୋଇ ବେସାହାରା ହୋଇଯାଇଛନ୍ତି ଏହି ୪ ଶିଶୁ । ବାପା ମାଆଙ୍କ ପରେ ୩ ପିଲାଙ୍କ ବୋଝ ଏବେ ୮ ବର୍ଷର ଲକ୍ଷ୍ମୀପ୍ରିୟା କାନ୍ଧରେ । ଜେଜେ ମୁଲ ଲାଗି ଯାହା ଆଣୁଛନ୍ତି ପରିବାର ଚଳୁଛି । ଏଭଳି ସ୍ଥଳରେ ଏକା ପଡିଯାଇଛନ୍ତି ଚାରି ଶିଶୁ ।
ସାଧାରଣତଃ କୋର୍ଟରେ ବିଚାରପତି ସବୁ ସମସ୍ୟାର ସମାଧାନ କରିଥାନ୍ତି । କିନ୍ତୁ ଖୋଦ୍ ଜଣେ ବିଚାରପତି କୋର୍ଟ ବାହାରେ ମାମଲାର ଶୁଣାଣି କରି ସମାଧାନ କରିବା ଭଳି ମହତକାମକୁ ପ୍ରଶଂସା କରାଯାଇଛି ।