ମନ୍ଦିର ନହେଉଣୁ ଜମି ବିବାଦ । ବଢ଼ିବାରେ ଲାଗିଛି ରାମମନ୍ଦିରର ଜମି କିଣାରେ ଦୁର୍ନୀତି ଅଭିଯୋଗ ପ୍ରସଙ୍ଗ । ପ୍ରଧାନମନ୍ତ୍ରୀ ମୋଦିଙ୍କ ହସ୍ତକ୍ଷେପ ଦାବି କଲା ଶିବସେନା
କନକ ବ୍ୟୁରୋ: ରାମମନ୍ଦିର ଜମି କିଣାରେ ଦୁର୍ନୀତି ହୋଇଥିବା ନେଇ ଆପ୍ ଅଭିଯୋଗ ପରେ ଆରମ୍ଭ ହୋଇଥିବା ବିବାଦ ବଢ଼ିଚାଲିଛି । ବିରୋଧୀମାନେ ଏକାଠି ହୋଇ ସରକାରଙ୍କୁ ଘେରିଛନ୍ତି । ଏହି ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦୀ ହସ୍ତକ୍ଷେପ କରନ୍ତୁ ବୋଲି ଦାବି କରିଛି ଶିବସେନା । କଂଗ୍ରେସ ମଧ୍ୟ ତଦନ୍ତ ଦାବି କରିଛି । କଂଗ୍ରେସ କର୍ମୀ କାନପୁରରେ ବିକ୍ଷୋଭ କରିଛନ୍ତି । ସେପଟେ ପ୍ରଥମେ ଅଭିଯୋଗ ଆଣିଥିବା ଆପ୍ ନେତା ସଂଜୟ ସିଂଙ୍କ ଘରେ ଭଙ୍ଗାରୁଜା ହୋଇଛି । ଏନେଇ ଦୁଇଜଣଙ୍କୁ ଗିରଫ କରାଯାଇଥିବା ପୋଲିସ୍ କହିଛି ।
Kanak News is now on WhatsApp
Join and get latest news updates delivered to you via WhatsApp
ରାମମନ୍ଦିର ପାଇଁ ଜମିକିଣାରେ କୌଣସି ଦୁର୍ନୀତି ହୋଇ ନାହିଁ ବୋଲି ରାମମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି । ବୋର୍ଡର କହିବା କଥା ନୀତିଗତ ଭାବେ ଓ ସମ୍ପୂର୍ଣ୍ଣ ସ୍ୱଚ୍ଛତାର ସହ ଜମି କିଣାଯାଇଛି । ଆଉ ଯେଉଁ ଜମିର ଦାମ ବଢ଼ିବା କଥା କୁହାଯାଉଛି, ତାହାର ମଧ୍ୟ କାରଣ ରହିଛି । ଜମି ବେପାରୀ ବହୁ ବର୍ଷ ତଳେ ଏହି ଜମିକୁ ୨ କୋଟିରେ କିଣିଥିଲେ । ହେଲେ ରାମମନ୍ଦିର ରାୟ ପରେ ଅଯୋଧ୍ୟାରେ ଜମିର ମୂଲ୍ୟ ବହୁ ଗୁଣା ବଢ଼ିଯାଇଛି ଓ ତେଣୁ ଅଧିକ ଦାମରେ ଜମି କିଣିବାକୁ ହୋଇଛି ବୋଲି ଟ୍ରଷ୍ଟ କହିଛି ।
କେନ୍ଦ୍ର ସରକାର ମଧ୍ୟ ଜମି କିଣାରେ କୌଣସି ଦୁର୍ନୀତି ହୋଇନଥିବା କହିଛନ୍ତି । ରାମ ମନ୍ଦିର ନିର୍ମାଣରେ ବାଧା ପହଂଚାଇବା ପାଇଁ ବିରୋଧୀଙ୍କ ପକ୍ଷରୁ ଏହା ଏକପ୍ରକାର ଚେଷ୍ଟା ହେଉଥିବା ବିଜେପି ନେତା ଅଭିଯୋଗ ଆଣିଛନ୍ତି ।
ଗତବର୍ଷ ଫେବ୍ରୁଆରୀରେ ଶ୍ରୀ ରାମଜନ୍ମଭୂମି ଟ୍ରଷ୍ଟ ଗଠନ କରାଯିବା ନେଇ ପ୍ରଧାନମନ୍ତ୍ରୀ ଘୋଷଣା କରିଥିଲେ । ରାମମନ୍ଦିର ନିର୍ମାଣ କାର୍ଯ୍ୟର ତତ୍ୱାବଧାନ କରିବା ଏହି ଟ୍ରଷ୍ଟର ଦାୟିତ୍ୱ । ୨୦୧୯ ନଭେମ୍ବର ମାସରେ ଐତିହାସିକ ରାମମନ୍ଦିର ରାୟ ଆସିଥିଲା ।
ସୁପ୍ରିମକୋର୍ଟର ୫ ଜଣିଆ ବେଂଚଙ୍କ ରାୟ ରାମ ଲାଲାଙ୍କ ପକ୍ଷରେ ଯାଇଥିଲା । ବିବାଦର ମଂଜି ପାଲଟିଥିବା ୨ ଦଶମିକ ୭ ଏକର ଜମି ମନ୍ଦିର ଟ୍ରଷ୍ଟକୁ ହସ୍ତାନ୍ତର କରାଯିବାକୁ କୋର୍ଟ ରାୟ ଦେଇଥିଲେ । ଏହାସହ ଅଯୋଧ୍ୟାରେ ସୁନ୍ନି ୱାକଫ ବୋର୍ଡକୁ ମସଜିଦ ନିର୍ମାଣ ପାଇଁ ୫ ଏକର ଜମି ଯୋଗାଇବାକୁ ସରକାରଙ୍କୁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ ।