ଚମୋଲି ଦୁର୍ଘଟଣା : ତପୋବନ ସୁଡଙ୍ଗରୁ ମିଳିଲା ୫ ଶବ । ଦୁର୍ଘଟଣାରେ ମୃତ୍ୟୁ ସଂଖ୍ୟା ୪୩ କୁ ବୃଦ୍ଧି
କନକ ବ୍ୟୁରୋ : ଉତ୍ତରାଖଣ୍ଡ ଚମୋଲିରେ ଫେବୃଆରୀ ୭ ତାରିଖ ଦିନ ହିମସ୍କଳନ ଘଟଣାରେ ମୃତ୍ୟୁ ସଂଖ୍ୟା ୪୩କୁ ବୃଦ୍ଧି ପାଇଛି । ତପୋବନ ସୁଡଙ୍ଗ ମଧ୍ୟରେ ଉଦ୍ଧାରକାରୀ ଦଳ ଲଗାତର ଭାବେ ଉଦ୍ଧାର କାର୍ଯ୍ୟ ଜାରି ରଖିଥିବା ବେଳେ ରବିବାର ଦିନ ସୁଡଙ୍ଗ ଭିତରୁ ୫ ଟି ମୃତଦେହ ଉଦ୍ଧାର କରାଯାଇଛି । ଏହି ୫ ଜଣଙ୍କୁ ମିଶାଇ ହିମସ୍କଳନ ଦୁର୍ଘଟଣାରେ ମୃତକଙ୍କ ସଂଖ୍ୟା ୪୩ ରେ ପହଂଚିଛି ।
Kanak News is now on WhatsApp
Join and get latest news updates delivered to you via WhatsApp
ଶନିବାର ଦିନ ଚମୋଲି ଜିଲ୍ଲା ଅଧିକାରୀ ସ୍ୱାତୀ ଏସ୍ ଭଦୋରିଆ କହିଥିଲେ କି ଏନଟିପିସି ଟର୍ନେଲରେ ବର୍ତ୍ତମାନ ପର୍ଯ୍ୟନ୍ତ ଉଦ୍ଧାରକାରୀ ଦଳ ଦ୍ୱାରା ୧୩୬ ମିଟର ପର୍ଯ୍ୟନ୍ତ ଖୋଳା ହୋଇଛି । ଶୁକ୍ରବାର ଦିନ ଏହି ଟର୍ନେଲ ଭିତରୁ ଜଣେ ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଥିଲା । ନିଖୋଜ ଥିବା ୨୦୪ ଜଣଙ୍କ ମଧ୍ୟରୁ ଏପର୍ଯ୍ୟନ୍ତ ୪୩ ଲୋକଙ୍କ ଶବଉଦ୍ଧାର କରାଯାଇଛି । ଏହା ସହ ୨ ଜଣ ଲୋକଙ୍କୁ ଜୀବିତ ଅବସ୍ଥାରେ ଉଦ୍ଧାର କରାଯାଇଛି ।
ରବିବାର ୫ ଟି ଶବ ଉଦ୍ଧାର ହେବା ପରେ ମୃତକଙ୍କ ସଂଖ୍ୟା ୪୩ ରେ ପହଂଚିଛି । ଆହୁରି ୧୬୧ ଜଣ ଲୋକ ଏବେ ବି ନିଖୋଜ ରହିଥିବା ବେଳେ ଉଦ୍ଧାରକାରୀ ଦଳ ମାଧ୍ୟମରେ ଏବେ ସୁଡଙ୍ଗ ଭିତରୁ ପାଣି ଓ ପଙ୍କ ସଫା କରିବା କାମ ଜାରି ରହିଛି । ଅନ୍ୟପଟେ ହିମସ୍କଳନ ଫଳରେ ଚମୋଲି ଜିଲ୍ଲାରେ ଜନ ଜୀବନ ପୁରା ଅସ୍ତବ୍ୟସ୍ତ ହୋଇପଡିଛି । ଗାଁ ଗାଁ ମଧ୍ୟରେ ଯୋଗା ଯୋଗ ବିଛିନ୍ନ ହୋଇପଡିଥିବା ବେଳେ ଆଇଟିବିପି ପକ୍ଷରୁ ଗାଁ ମାନଙ୍କରେ ସହାୟତା କେନ୍ଦ୍ର ଖୋଲି ଲୋକମାନଙ୍କୁ ଆବଶ୍ୟକ ସହାୟତା ଯୋଗାଇ ଦିଆଯାଉଛି ।