କନକ ବ୍ୟୁରୋ: ଅଲମ୍ପିଆନ ଅମିତ ରୋହିଦାସ ହୁଅନ୍ତୁ କି ଭାରତୀୟ ପୁରୁଷ ହକି ଦଳର ଡିଫେଣ୍ଡର ନୀଲମ ସଂଜୀବ ଖେସ । ଉଭୟ ସୁନ୍ଦରଗଡର ଅଖ୍ୟାତ ପଲ୍ଲୀରୁ, ଗରିବ ପରିବାରରୁ, ଭଂଗାଘରୁ ଯାଇ ସାରାଦେଶରେ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ଆଉ ସେମାନେ ଆଜି ଯେଉଁ ସ୍ଥାନରେ ପହଁଚିଛନ୍ତି ସେଥିପାଇଁ ତାଙ୍କୁ କମ୍ ସଂଘର୍ଷ କରିବା ପାଇଁ ପଡି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଦଳ ପାଇଁ ଚୟନ ହେବା ପୂର୍ବରୁ, ହାତକୁ ପେସାଦାର ହକି ଷ୍ଟିକ୍ ଆସିବା ପୂର୍ବରୁ ଏହି ହକି ତାରକା ବି ଦିନେ ଗାଁ ଦାଣ୍ଡରେ ଖେଳୁଥିଲେ । ଗାଁର ଅନ୍ୟମାନଙ୍କ ଭଳି ସେ ବି କାଠ ତିଆରି ହକି ବାଡିରେ ମୁଳଦୂଆ ପକାଇଥିଲେ । ଅଲିମ୍ପିଆନ ଅମିତ ରୋହିଦାସଙ୍କ ମା’ଙ୍କ କହିବା ଅନୁସାରେ ସେ ମାତ୍ର ୪ବର୍ଷ ବୟସରୁ ହକି ଖେଳିବା ଆରମ୍ଭ କରିଦେଇଥିଲେ । ପରିବାରର ଦାରିଦ୍ର୍ୟତା ଆଗକୁ ଯିବାକୁ ବାଟ ଓଗାଳିଥିଲା । ପରିସ୍ଥିତି ଏପରି ଥିଲା ପରିବାର ଲୋକ ହକି ଷ୍ଟିକ ଖଣ୍ଡିଏ କିଣିକି ଦେବା ମୁସ୍କିଲ ହୋଇପଡ଼ିଥିଲା । ଗାଁର କିଛି ବଦନ୍ୟ ବ୍ୟକ୍ତି ହକି ଷ୍ଟିକ ଦେବା ପରେ ଖେଳିବା ଆରମ୍ଭ କରିଥିଲେ ଅମିତ୍ । ତା ପରେ ସେ ଆଉ ପଛକୁ ଫେରିନଥିଲେ ।
ସୁନ୍ଦରଗଡ ଜିଲ୍ଳା ସାରନାଟୋଲା ଗାଁର ଝାଟିମାଟି ଘର, ଗରିବ ଚାଷୀ ପରିବାରରୁ ଯାଇ ଭାରତୀୟ ହକି ଦଳର ନିର୍ଭରଯୋଗ୍ୟ ଡିଫେଣ୍ଡର ଭାବେ ସ୍ଥାନ ପାଇବାରେ ସକ୍ଷମ ହୋଇଛନ୍ତିି । ନୀଲମ ସଂଜୀବ ଖେସ୍ । ଗାଁର ଶୁଖିଲା ମାଟି ପଡିଆ ଓ କେନ୍ଦୁ ଗଛ ଡାଳରେ ତିଆରି ହକି ବାଡିରେ ଖେଳିବା ଆରମ୍ଭ କରିଥିଲେ ନୀଲମ । ଗାଁ ସ୍କୁଲରେ ପାଠ ପଢ଼ିବା ସମୟରେ ହକି ଖେଳ ପ୍ରତି ତାଙ୍କ ଭିତରେ ଅହେତୁକ ଦୁର୍ବଳତା ଦେଖିବାକୁ ମିଳିଥିଲା ।ତାପରେ ସ୍କୁଲ ଶିକ୍ଷକଙ୍କକ ପରାମର୍ଶରେ ସାଇ ସ୍ପୋର୍ଟସ ହଷ୍ଟେଲରେ ଛାଡିଥିଲେ ତାଙ୍କ ବାପା । ୨୦୧୬ରେ ଜାତୀୟ ଦଳରେ ସ୍ଥାନ ପାଇବାଠାରୁ ଅଦ୍ୟାବଧି ଦେଶ ପାଇଁ ୩୪ଟି ଆନ୍ତର୍ଜାତିକ ମ୍ୟାଚ ଖେଳି ସାରିଲେଣି । ଏବେ ଭାରତୀୟ ଦଳର ଡିଫେଣ୍ଡର ଭାବେ ସ୍ଥାନ ବଜାୟ ରଖି ଚଳିତ ବିଶ୍ୱକପ୍ ନିଜ ହୋମ ଗ୍ରାଉଣ୍ଡରେ ଖେଳିବେ ।
ସୁନ୍ଦରଗଡ ଏବେ ହକି ଖେଳାଳି ତିଆରିର ହବ୍ ପାଲଟିଥିବାବେଳେ, ଗାଁ ପିଲାମାନଙ୍କ ପାଇଁ ଆଧୁନିକ ଟର୍ଫର ବ୍ୟବସ୍ଥା କରୁଛନ୍ତି ରାଜ୍ୟ ସରକାର । ପ୍ରତି ବ୍ଲକରେ ଉଦୀୟମାନଙ୍କ ହକି ଖେଳାଳିଙ୍କ ପାଇଁ ତିଆରି ହେଉଛି ଆଷ୍ଟ୍ରୋ ଟର୍ଫ । ଯେଉଁ ଟର୍ଫରେ ଅଭ୍ୟାସ କରିବାର ସୁଯୋଗ ପାଉଛନ୍ତି ସୁନ୍ଦରଗଡ ଜିଲ୍ଲାର ଗ୍ରାମାଞ୍ଚଳର ଭବିଷ୍ୟତର ହକି ତାରକା ।