କନକ ବ୍ୟୁରୋ : ରାଜ୍ୟରେ ଆରମ୍ଭ ହେବ ହେପାଟାଇଟିସ୍ ନିରାକରଣ କାର୍ଯ୍ୟକ୍ରମ । ହେପାଟାଇଟିସ୍ ରୋଗର ଭୟାବହତା ନେଇ ଲୋକଙ୍କୁ ସଚେତନ କରିବା ଓ ନିୟନ୍ତ୍ରଣ କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ । ଯଦିଓ ଏହା କେନ୍ଦ୍ର ସରକାରଙ୍କ କାର୍ଯ୍ୟକ୍ରମ, ତଥାପି ଏହାକୁ ତୃଣମୂଳସ୍ତରରେ ସୁଦୃଢ଼ କରିବା ଲାଗି ରାଜ୍ୟ ସରକାର ଯୋଜନା କରିଛନ୍ତି । ଏହି ଭିତ୍ତିରେ ଜିଲ୍ଲାୱାରୀ ଏହାର ପରୀକ୍ଷଣ କେନ୍ଦ୍ର ପ୍ରତିଷ୍ଠା ପାଇଁ ନିଷ୍ପତ୍ତି ହୋଇଛି । କରୋନା ପାଇଁ ଏହି କାର୍ଯ୍ୟକ୍ରମ ଧିମେଇ ଯାଇଥିବା ବେଳେ ଆସନ୍ତା କିଛି ମାସ ଭିତରେ ଏହାର ଚୂଡ଼ାନ୍ତ ରୂପରେଖ ପ୍ରସ୍ତୁତ ହେବ ବୋଲି ସୂଚନା ମିଳିଛି । ହେପାଟାଇଟିସ୍ ମୁଖ୍ୟତଃ ଏ, ବି, ସି, ଡି ଓ ଇ। ହେପାଟାଇଟିସ୍ ‘ଏ’ ଦୂଷିତ ପାଣି ଦ୍ୱାରା ବ୍ୟାପିଥାଏ, ଯାହାକି ସାଧାରଣ ଭାବେ ଦେଖିବାକୁ ମିଳିଥାଏ । ମାତ୍ର ହେପାଟାଇଟିସ୍ ‘ବି’ ଓ ‘ସି’ ସଂକ୍ରମିତ ରକ୍ତ କିମ୍ବା ସିରିଞ୍ଜ ଜରିଆରେ କିମ୍ବା ଅସ୍ତ୍ରୋପଚାର ସମୟରେ ସଂକ୍ରମିତ ବ୍ୟକ୍ତିଙ୍କଠାରୁ ଅନ୍ୟମାନଙ୍କ ଶରୀରରେ ପ୍ରବେଶ କରିଥାଏ ।
Kanak News is now on WhatsApp
Join and get latest news updates delivered to you via WhatsApp
ପରବର୍ତ୍ତୀ ସମୟରେ ଏହା ଶରୀରରେ କର୍କଟ ଭଳି ବ୍ୟାଧି ସୃଷ୍ଟି କରିଥାଏ । ହେପାଟାଇଟିସ୍ ‘ବି’ର ଚିକିତ୍ସା ମଧ୍ୟ ବ୍ୟୟବହୁଳ । ରାଜ୍ୟରେ କେତେ ସଂଖ୍ୟକ ଲୋକ ହେପାଟାଇଟିସ୍ ‘ବି’ ଓ ‘ସି’ରେ ଆକ୍ରାନ୍ତ ହେଉଛନ୍ତି, ତାହାର କୌଣସି ନିର୍ଦ୍ଦିଷ୍ଟ ତଥ୍ୟ ନାହିଁ । ମେଡିକାଲ କଲେଜ ଓ ହସ୍ପିଟାଲଗୁଡ଼ିକରୁ ବର୍ଷ ଶେଷକୁ ଯେଉଁ ତଥ୍ୟ ସବୁ ସ୍ୱାସ୍ଥ୍ୟ ବିଭାଗକୁ ଆସୁଛି, ତାହା ମଧ୍ୟ ଅଧାପନ୍ତରିଆ । ତେଣୁ ହେପାଟାଇଟିସ୍ ଭଳି ଏକ ଜଟିଳ ରୋଗର ନିୟନ୍ତ୍ରଣ ତୃଣମୂଳସ୍ତରରେ କରିବା ଲାଗି ସରକାରଙ୍କ ପକ୍ଷରୁ ଯୋଜନା କରାଯାଇଛି । ବିଶେଷକରି ଗର୍ଭବତୀ ମହିଳାମାନଙ୍କ ବାଧ୍ୟତାମୂଳକ ଭାବେ ଏହି ପରୀକ୍ଷା କରିବା ଲାଗି ସ୍ୱାସ୍ଥ୍ୟ ବିଭାଗର ଅଧିକାରୀମାନେ ଚିନ୍ତା କରୁଛନ୍ତି ।