ଆଧୁନିକ ଚିକିତ୍ସା ବିଜ୍ଞାନର ବଡ଼ ଉପଲବ୍ଧି । ଚିକିତ୍ସା ଇତିହାସରେ ନୂଆ ଅଧ୍ୟାୟ ଯୋଡିବାକୁ ଯାଉଛି କରୋନା ଟିକା । ବର୍ଷକ ଭିତରେ ପ୍ରସ୍ତୁତିର ଶେଷ ପର୍ଯ୍ୟାୟରେ ପହଁଚିଛି ଭ୍ୟାକ୍ସିନ୍
କନକ ବ୍ୟୁରୋ : ଡିସେମ୍ବରରେ ଅକ୍ସଫୋର୍ଡର ୧୦ କୋଟି କରୋନା ଟିକା ଭାରତରେ ପ୍ରସ୍ତୁତ ହୋଇଯିବ । ସିରମ ଇନଷ୍ଟିଚ୍ୟୁଟ ମୁଖ୍ୟ ଅଦାର ପୁନାବାଲାଙ୍କ ଏହି ସୂଚନା ସଙ୍କେତ ଦେଉଛି, ଯେ ଆମେ କରୋନା ଟିକାର ପାଖାପାଖି ପହଂଚିଗଲୁଣି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ଡିସେମ୍ବରରେ ଚୀନରେ କରୋନା ଭାଇରସ ବ୍ୟାପିବା ପରେ ପ୍ରଥମେ ଏହି ଭାଇରସକୁ ଜାଣିବା ପାଇଁ ଉଦ୍ୟମ ଆରମ୍ଭ ହୋଇଗଲା ଓ ଫେବୃୟାରୀ ମାର୍ଚ୍ଚ ବେଳକୁ ସାରା ବିଶ୍ୱରେ କରୋନା କାୟା ବିସ୍ତାର କଲା । ଏହା ପରେ ପରେ ଆରମ୍ଭ ହୋଇଗଲା ଟିକା ପାଇଁ କାମ । ସମସ୍ତେ ଅନୁଭବ କଲେ ଏହି ମହାମାରୀକୁ ରୋକିବା ଆଉ ସମ୍ଭବ ନୁହେଁ । ଏକମାତ୍ର ଟିକା ହିଁ ମାନବ ଜାତିକୁ ରକ୍ଷା କରିପାରିବ ।
ଚିକିତ୍ସା ବିଜ୍ଞାନ ଇତିହାସରେ ଏହା ପ୍ରଥମ ଥର ହେବାକୁ ଯାଉଛି, ଯେ ପ୍ରାୟ ଏକ ବର୍ଷ ଭିତରେ ଏକ ଭୟଙ୍କର ମହାମାରୀର ଟିକା ଆସିବାକୁ ଯାଉଛି । ଇତିହାସ ପୃଷ୍ଠା ଓଲଟାଇଲେ ଆପଣ ଜାଣିପାରିବେ, ଟିକା ପ୍ରସ୍ତୁତି ପାଇଁ କେତେ ସମୟ ଲାଗେ ।
ଦୁଇ ଜଣ ବୈଜ୍ଞାନିକ ଘୋଷଣା କଲେ ପୋଲିଓ ମହାମାରୀର ଉତ୍ତର ସେମାନେ ପାଇଗଲେ । କିନ୍ତୁ ଏହାର ସାଇଡ ଇଫେକ୍ଟ ବା ପାଶ୍ୱର୍ପ୍ରତିକ୍ରିୟାକୁ ନେଇ ବିଶେଷଜ୍ଞ ମହଲରେ ବଡ ଅସନ୍ତୋଷ ଦେଖା ଦେଲା ଏବଂ ସେଇଠି ପୁଣି କାମ ଅଟକିଗଲା । ଏହାପରେ ୧୯୫୨ ମସିହାରେ କେବଳ ଆମେରିକାରେ ୫୭ ହଜାର ୬୦୦ ଜଣ ପୋଲିଓରେ ଆକ୍ରାନ୍ତ ହେଲେ, ସେଥି ମଧ୍ୟରୁ ୩ ହଜାର ୧୪୫ ଜଣଙ୍କର ମୃତ୍ୟୁ ହୋଇଗଲା ଏବଂ ପ୍ରାୟ ୨୨ ହଜାର ଲୋକଙ୍କୁ ପାରାଲିସିସ୍ ହୋଇଗଲା । ଏହାପରେ ୧୯୫୫ରେ ପୋଲିଓ ଟିକା ପ୍ରସ୍ତୁତ ହେଲା । ଅର୍ଥାତ୍ ଟିକା ପ୍ରସ୍ତୁତି ଆରମ୍ଭର ପ୍ରାୟ ୩୦ ବର୍ଷ ପରେ ପୋଲିଓ ଟିକା ଲୋକଙ୍କୁ ଦେବା ପାଇଁ ପ୍ରସ୍ତୁତ ହେଲା ।
ସେହିପରି ଡେଙ୍ଗୁ ପାଇଁ ଟିକା ପ୍ରସ୍ତୁତିର ଏକ ବିରଳ କାହାଣୀ ରହିଛି । କୁହାଯାଏ. ପ୍ରାୟ ୧୯୨୦ ମସିହାରୁ ଡେଙ୍ଗୁ ପାଇଁ ଟିକା ପ୍ରସ୍ତୁତି କାମ ଏକପ୍ରକାର ଆରମ୍ଭ ହୋଇଛି । ଏବଂ ଏହାର ୯୮ ବର୍ଷ ପରେ ୨୦୧୮ରେ ଆମେରିକା ଡେଙ୍ଗୁ ଭ୍ୟାକସିନକୁ ଅନୁମୋଦନ ଦେଇଛି ।
ଏହି ତଥ୍ୟରୁ ଆପଣ ଅନୁମାନ କରିପାରିବେ ଟିକା ପ୍ରସ୍ତୁତି ପାଇଁ କେତେ ସମୟ ଲାଗେ । ଏବଂ କୋଭିଡ ଟିକା ଆସିବାର ଖବର ସୂଚନା ଦେଉଛି, ଯେ ଆମ ଚିକିତ୍ସା ବିଜ୍ଞାନ ଇତିହାସରେ ଏହା ସବୁଠାରୁ କମ ସମୟ ଭିତରେ ଆସିବାକୁ ଯାଉଛି ।