ବ୍ୟକ୍ତିଗତ ସମସ୍ୟାକୁ ଆଡେଇ ଦେଇ ରାଜକାର୍ଯ୍ୟ ପାଇଁ ଆଗେଇ ଆସିଲେ ରାଜ୍ୟପାଳ । ପତ୍ନୀଙ୍କ ବିୟୋଗ ପରେ ବି ଅଟକିଲାନି ବିଶ୍ୱବିଦ୍ୟାଳୟ କୁଳପତିଙ୍କ ସାକ୍ଷତକାର
କନକ ବ୍ୟୁରୋ : ଓଡିଶାର ରାଜ୍ୟପାଳ ପ୍ରଫେସର ଗଣେଶୀଲାଲ ଆଜି ଜଣେ କର୍ମଯୋଗୀ ଭାବେ ନିଜ ଦାୟିତ୍ୱ ସଂପାଦନ କରିଛନ୍ତି । ଗୋଟିଏ ପଟେ ପତ୍ନୀ ସୁଶୀଳା ଦେବୀଙ୍କ ମରଶରୀର ଅନ୍ତ୍ୟେଷ୍ଟି କ୍ରିୟା ପାଇଁ ଯାଉଥାଏ, ଏବଂ ଅନ୍ୟପଟେ ପ୍ରଫେସର ଗଣେଶୀଲାଲ୍ ନିଜ କର୍ତବ୍ୟ ସଂପାଦନ କରୁଥାନ୍ତି । ଆଜି ଥିଲା ୬ଟି ବିଶ୍ୱବିଦ୍ୟାଳୟର କୁଳପତି ନିଯୁକ୍ତିର ଦିନ । ଏଥିପାଇଁ ସକାଳ ୧୧ଟାରେ ରାଜଭବନରେ ସାକ୍ଷାତକାର ପାଇଁ ସମୟ ଧାର୍ଯ୍ୟ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଇତି ମଧ୍ୟରେ ଗତକାଲି ରାତିରେ ରାଜ୍ୟର ପ୍ରଥମ ମହିଳା ତଥା ରାଜ୍ୟପାଳଙ୍କ ପତ୍ନୀ ସୁଶୀଳା ଦେବୀ ଶେଷ ନିଶ୍ୱାସ ତ୍ୟାଗ କଲେ । କୋଭିଡ ପରବର୍ତି ଜଟିଳ ସ୍ୱାସ୍ଥ୍ୟଗତ ସମସ୍ୟା ପାଇଁ ସୁଶୀଳା ଦେବୀଙ୍କର ମୃତ୍ୟୁ ହୋଇଗଲା । ଗୋଟିଏ ପଟେ ରାଜକାର୍ଯ୍ୟ ଥିଲା ଏବଂ ଅନ୍ୟପଟେ ସବୁଠାରୁ ବଡ ବ୍ୟକ୍ତିଗତ ଦୁଃଖ ଥିଲା । କିନ୍ତୁ ତା ପରେ ବି ପ୍ରଫେସର ଗଣେଶୀ ଲାଲ ନିଜ କାର୍ଯ୍ୟ ଠିକ ଭାବରେ ତୁଳାଇ ପାରିଥିଲେ ।
ସାକ୍ଷାତକାର ପାଇଁ ଆସିଥିବା ପ୍ରାର୍ଥୀଙ୍କୁ ପ୍ରଶ୍ନ ଦେଇଥିଲେ, ଏବଂ ସେମାନେ ଲେଖିବା ପରେ ଏହି ଉତର ଓ ତାଙ୍କ ବାୟୋଡାଟା ନିଜେ ରାଜ୍ୟପାଳ ଯାଂଚ କରିଥିଲେ । ଏହାପରେ ୬ ଜଣଙ୍କୁ ନିଯୁକ୍ତି ଦିଆଯାଇଥିଲା । ପ୍ରଫେସର ସବିତା ଆଚାର୍ଯ୍ୟଙ୍କୁ ଉକ୍ରଳ ବିଶ୍ୱବିଦ୍ୟାଲୟର କୁଳପତି ଭାବେ ନିଯୁକ୍ତି ଦିଆଯାଇଥିଲା । ସେହିପରି ପ୍ରଫେସର ଅପରାଜିତା ଆଚାର୍ଯ୍ୟଙ୍କୁ ରମାଦେବୀ ମହିଳା ବିଶ୍ୱବିଦ୍ୟାଳୟ, ଫକୀରମୋହନ ବିଶ୍ୱବିଦ୍ୟାଳୟ ପାଇଁ ପ୍ରଫେସର ଦୀନବନ୍ଧୁ ସାହୁ, ଗଙ୍ଗାଧର ମେହେର ବିଶ୍ୱବିଦ୍ୟାଳୟ ପାଇଁ ପ୍ରଫେସର ଏନ୍. ନାଗାରାଜୁଙ୍କୁ ଦାୟିତ୍ୱ ଦିଆଯାଇଛି ।
ଉତର ଓଡିଶା ବିଶ୍ୱବିଦ୍ୟାଳୟର କୁଳପତି ଭାବେ ପ୍ରଫେସର କିଶୋର କୁମାର ବାସା, ଖଲ୍ଲିକୋଟ ବିଶ୍ୱବିଦ୍ୟାଳୟର କୁଳପତି ଭାବେ ପ୍ରଫେସର ପ୍ରଫୁଲ୍ଲ କୁମାର ମହାନ୍ତିଙ୍କୁ ନିଯୁକ୍ତି ଦିଆଯାଇଛି । ସେପଟେ ରାଜ୍ୟପାଳଙ୍କ ପତ୍ନୀଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।