ସଂନ୍ଧ୍ୟା ୭ ଟାରେ କୃଷକ ମାନଙ୍କ ସହ ଆଲୋଚନା କରିବେ ଗୃହମନ୍ତ୍ରୀ ଅମିତ ଶାହା । ଚାଷୀଙ୍କ ଜିଦ୍ ଆଗରେ ମୁଣ୍ଡ ନୁଆଁଇବେ କି ସରକାର ?

କନକ ବ୍ୟୁରୋ : କୃଷକ ଆନ୍ଦୋଳନ ପ୍ରସଙ୍ଗରେ ନରମୁଛି ସରକାରଙ୍କ ଆଭିମୁଖ୍ୟ । ସଂନ୍ଧ୍ୟା ୭ ଟାରେ କୃଷକ ମାନଙ୍କ ସହିତ ଆଲୋଚନା କରିବେ ଗୃହମନ୍ତ୍ରୀ ଅମିତ୍ ଶାହା । ଚାଷୀ ନେତା ଟିକାୟତ କହିଲେ ସମାଧାନକୁ ବାକି ଅଛି ଗୋଟିଏ ସୋପାନ ।
ଆଜି ଭାରତ ବନ୍ଦ ପରେ ଆସନ୍ତା କାଲି କୃଷକ ସଂଗଠନ ଓ ସରକାରଙ୍କ ଭିତରେ ଆଲୋଚନା ହେବା ପାଇଁ ଦିନ ଧାର୍ଯ୍ୟ କରାଯାଇଥିଲା । ହେଲେ ଭାରତ ବନ୍ଦର ପ୍ରଭାବ ଦେଖି କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଆଜି ଆଲୋଚନା ପାଇଁ କୃଷକ ସଂଗଠନକୁ ନିମନ୍ତ୍ରଣ କରିଥିବା ସୂଚନା ମିଳିଛି । ଏନେଇ ଭାରତୀୟ କିଷାନ ସଂଘର ନେତା ରାକେଶ ଟିକାୟତ କହିଛନ୍ତି କି ଅଜି ସଂନ୍ଧ୍ୟାରେ ୧୩ ରୁ ୧୪ ଜଣ କୃଷକ ନେତା ଗୃହମନ୍ତ୍ରୀଙ୍କ ସହ କାନୁନ୍ ବାବଦରେ ଆଲୋଚନା କରିବେ । ଏହା ସହ ଟିକାୟତ ଗାଜିପୁର ସୀମାବେ ଆନ୍ଦୋଳନ କରୁଥିବା କୃଷକ ମାନଙ୍କୁ ହଟାଇ ଦେଇଛନ୍ତି । ଏକ ଜାତୀୟ ଗଣମାଧ୍ୟମକୁ ସୂଚନା ଦେଇ ଟିକାୟତ କହିଛନ୍ତି କି ଏବେ ଆମ ଦାବି ପୁରଣ ପାଇଁ ଆଉ ଗୋଟିଏ ମାତ୍ର ସୋପାନ ବାକି ରହିଛି ।
ଅନ୍ୟପଟେ କୃଷି କାନୁନକୁ ନେଇ ହରିଆଣା ସରକାର ଏବେ ହରଡ ଘଣାରେ ପଡିଛନ୍ତି । ସରକାରର ଅଂଶିଦାର ଥିବା ଜେଜେପିର  ଚାପ ମୁଖ୍ୟମନ୍ତ୍ରୀ ମନୋହରଲାଲ୍ ଖଟ୍ଟରଙ୍କ ସରକାର ଉପରେ ପଡିଛି । ସେ ଆଜି ଏନେଇ ଆଲୋଚନା କରିବାକୁ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ରସିଂ ତୋମାରଙ୍କ ନିକଟରେ ପହଂଚିଛନ୍ତି । ଶ୍ରୀ ଖଟ୍ଟର ତୋମାରଙ୍କ ସହ ଆଲୋଚନା ଚଳାଇଥିବା ବେଳେ ହରିଆଣାର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା ଭୂପିନ୍ଦର ସିଂ ହୋଡା ଖଟ୍ଟର ସରକାରଙ୍କ ଉପରେ ଅବିଶ୍ୱାସ ପ୍ରସ୍ତାବ ଆଣି ବିଧାନସଭାରେ ଏକ ସ୍ୱତନ୍ତ୍ର ଅଧିବେସନ ଡାକିବାକୁ ଦାବି କରିବା ସହ ରାଜ୍ୟପାଳଙ୍କୁ ଏନେଇ ଚିଠି ଲେଖିଛନ୍ତି ।