ବାଡି ଛାଡି ବନ୍ଧୁକ ଧରିଲେ ବନ କର୍ମଚାରୀ: ଶିକାରୀଙ୍କୁ ଦିଆଯିବ କଡ଼ା ଜବାବ, ସୁରକ୍ଷିତ ରହିବେ ବନ୍ୟଜନ୍ତୁ!

କନକ ବ୍ୟୁରୋ: ବନ୍ୟଜନ୍ତୁ ଓ ବନକର୍ମଚାରୀଙ୍କୁ ସୁରକ୍ଷା ଦେବାକୁ ରାଜ୍ୟ ସରକାରଙ୍କ ବଡ ନିଷ୍ପତି । ଏଣିକି ବନ କର୍ମଚାରୀ ପାଇବେ ପୋଲିସର କ୍ଷମତା । ପୋଲିସଙ୍କ ଭଳି ବନକର୍ମଚାରୀ ଏଣିକି ଶିକରୀଙ୍କ ଫୋନ୍ କଲ ଟ୍ରାକିଂ କରିବା ସହିତ ଲୋକେସନ ଯାଂଚ କରିପାରିବେ । ଏହାବାଦ ସେମାନେ ବାଡିଛାଡି ହାତରେ ବନ୍ଧୁକ ଧରିବେ । ଏଥିପାଇଁ ପ୍ରଶିକ୍ଷଣ ଦିଆଯାଉଛି ।

ଶିମିଳିପାଳରେ ବନ ଅଧିକାରୀ ଦୁର୍ବୃତଙ୍କ ଆକ୍ରମଣର ଶିକାର ହେବା ପରେ କର୍ମଚାରୀଙ୍କୁ ସୁରକ୍ଷା ଯୋଗାଇ ଦେବାକୁ ଦାବି ଉଠିଥିଲା । ଆଉ ଏବେ ରାଜ୍ୟ ସରକାର ବନ କର୍ମଚାରୀଙ୍କୁ ପୋଲିସର କ୍ଷମତା ଦେଇ ବନ୍ୟଜନ୍ତୁଙ୍କ ସୁରକ୍ଷା ଉପରେ ଗୁରୁତ୍ୱ ଦେଇଛନ୍ତି । ବନ କର୍ମଚାରୀ ଏବେ ସନ୍ଦିଗ୍ଧଙ୍କ ମୋବାଇଲ ଟ୍ରାକିଂ କରିପାରିବେ । ଲୋକେସନ ଟ୍ରାକିଂ ଓ ଫୋଲ୍ କଲ୍ ଡିଟେଲ୍ସ ଯାଂଚ କରିପାରିବେ । ଏହାବାଦ କର୍ମଚାରୀଙ୍କୁ ଗୁଳି ଚଳାଇବାକୁ ପ୍ରଶିକ୍ଷଣ ଦିଆଯାଉଛି । ଏହି କ୍ଷମତା ସାଧାରଣତଃ ଜଣେ ପୋଲିସ ପାଖରେ ଥାଏ । ଏଯାବତ ୯୦ ଜଣ ବନ ଅଧିକାରୀଙ୍କୁ ବନ୍ଧୁକ ଚଳାଇବାକୁ ପ୍ରଶିକ୍ଷଣ ଦିଆଯାଇଥିବା ବେଳେ ଆଗକୁ ଆହୁରି ପ୍ରଶିକ୍ଷଣ ନେବେ ବୋଲି ରାଜ୍ୟସ୍ତରୀୟ ବନ୍ୟପ୍ରାଣୀ ସପ୍ତାହ ଅବସରରେ କହିଛନ୍ତି ପିସିସିଏଫ ସୁଶୀଲ କୁମାର ପୋପଲି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହି ଅବସରରେ ବନ୍ୟପ୍ରାଣୀ ତଥା ସେମାନଙ୍କ ଆବାସସ୍ଥଳୀର ସୁରକ୍ଷା ଓ ଅଭିବୃଦ୍ଧି ପାଇଁ ଲୋକଙ୍କୁ ଅନୁରୋଧ କରିଛନ୍ତି ।

ଚଳିତ ବର୍ଷ ଶିମିଳିପାଳରେ ଶିକାରୀଙ୍କ ଆକ୍ରମଣରେ ବନ ଅଧିକାରୀ ସହିଦ ହୋଇଥିଲେ । ଜଂଗଲରେ ଦୁର୍ବତ ମାନେ ବନ୍ୟ ଜନ୍ତୁ ଶିକାର କରିବାକୁ ଆସି ହାତରେ ଧାରୁଆ ଅସ୍ତ୍ର ଧରୁଥିବା ବେଳେ ସୁରକ୍ଷା କର୍ମୀଙ୍କର ହାତରେ ବାଡି ଖଣ୍ଡେ ରହୁଥିବାରୁ ଦୁର୍ବୃତଙ୍କ ଦୌରାତ୍ମ୍ୟ ବଢୁଥିଲା । ଯେଉଁଥିପାଇଁ ନିକଟରେ ବନ କର୍ମଚାରୀ ପ୍ରତିକାତ୍ମକ ଭାବେ ଆନ୍ଦୋଳନ କରିଥିଲେ ଏବଂ ନିଜର ସୁରକ୍ଷା ଦାବି କରିଥିଲେ ।
ବିଭିନ୍ନ ସମୟରେ ଜଙ୍ଗଲରେ ବଢୁଥିବା ଶିକାରୀଙ୍କ ଦୌରାତ୍ମ୍ୟ ଓ ବନ୍ୟଜନ୍ତୁଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠୁଥିବା ବେଳେ ରାଜ୍ୟ ସରକାରଙ୍କ ଏହି ନିଷ୍ପତି ଶିକାରୀଙ୍କୁ କଡା ଜବାବ ଦେବ ବୋଲି ଆଶା କରାଯାଉଛି ।