ବଞ୍ଚିଥିବା ଅବସ୍ଥାରେ ପୁଅର ଶୁଦ୍ଧିକ୍ରିୟା କଲା ବାପା । ଗାଁ ଲୋକଙ୍କ ବାସନ୍ଧ ପରେ ପୁଅର ମୃତ୍ୟୁ ପାଇଁ ଭୋଜିଦେଲା ବାପା
କନକ ବ୍ୟୁରୋ: ବଂଚି ଥାଉ ଥାଉ ପୁଅର ଶୁୁଦ୍ଧିକ୍ରିୟା କଲେ ପରିବାର । ଗଂଜାମ ଜିଲ୍ଲା ଭଂଜନଗର ବ୍ଲକ ଗାୟାଗଣ୍ଡା ବାଘୁଆ ଗାଁର ହରିଜନ ବସ୍ତିରେ ଘଟିଛି ଏଭଳି ଘଟଣା । ରୋଗ ଯନ୍ତ୍ରଣା ଓ ମାନସିକ ଚାପର ଶିକାର ହୋଇ ୨୧ ଦିନ ଏକ ଘରକିଆ ରହିବା କେତେ ଯେ କଷ୍ଟ ଯିଏ ଅଙ୍ଗେ ନିଭାଇଛି ସେ ହିଁ ଜାଣିଛି । ଆଉ ସେଇ ବାସନ୍ଦ ବୋଝକୁ ହାଲୁକା କରିବା ପାଇଁ ଛାତିରେ ପଥର ରଖି ଜୀବନ୍ତ ପୁଅ କାହ୍ନାର ଶୁଦ୍ଧିକ୍ରିୟା କରିଛନ୍ତି ରାମଚନ୍ଦ୍ର ନାୟକଙ୍କ ପରିବାର ।
Kanak News is now on WhatsApp
Join and get latest news updates delivered to you via WhatsApp
ଜୀବନ୍ତ ପୁଅକୁ ଶୁଦ୍ଧି ହେଲା ପରିବାର
ଭୋଜି ଖାଇଲେ ଗ୍ରାମବାସୀ
ରାମଚନ୍ଦ୍ରଙ୍କ ବଡପୁଅ କାହ୍ନା ମୁହଁରେ କେଶ ଉଠିବା ସହ ଦେହ ସାରା ବଥ ଉଠିଥିଲା । ଏନେଇ ଗଣମାଧ୍ୟମରେ ଖବର ପ୍ରସାରଣ ପରେ ପ୍ରଶାସନ ପକ୍ଷରୁ କାହ୍ନାର ଅପରେସନ୍ କରାଯାଇଥିଲା । ଏହି ଚିକିତ୍ସା ପରେ ବିଗିଡିଗଲା କାହ୍ନାର ସ୍ୱାସ୍ଥ୍ୟବସ୍ଥା । ଦେହ ସାରା ଘା’ ହେବା ପରେ ସାହି ଲୋକ କାହ୍ନାଙ୍କ ପରିବାରକୁ ଏକ ଘରକିଆ କରିବା ସହ ନିଆଁପାଣି ବାସନ୍ଦ କରିଥିଲେ । ଆଉ ୨୧ ଦିନ ଧରି ବାସନ୍ଦ ହୋଇ ରହିବା ପରେ ଜୀବନ୍ତ ପୁଅକୁ ଶୁଦ୍ଧି ହୋଇ ଗାଁ ଲୋକଙ୍କୁ ଭୋଜି ଦେଇଛନ୍ତି ରାମଚନ୍ଦ୍ର ନାୟକ ।
ଆଧୁନିକ ସମାଜର ଦ୍ୱାହି ଦେଉଥିବା ମଣିଷ ଆଜି ବି ଅନ୍ଧ ବିଶ୍ୱାର ଅନ୍ଧାର ଗଳିରେ ବୁଲୁଛି । ମଣିଷ ଦେହରେ ଘା’ ହୋଇ ସେଥିରୁ ପୋକ ବାହାରିଲେ ସେଥିପାଇଁ ତାକୁ ଜୀବନ୍ତ ଶୁଦ୍ଧି ହେଉଛି । ଗଂଜାମ ଜିଲ୍ଲାରେ ଏଭଳି ଘଟଣା ବାରମ୍ବାର ଘଟୁଛି । ଏବେ କାହ୍ନା ସହ ଘଟିଥିବା ଏହି ଘଟଣା ପୂର୍ବରୁ ଭଂଜନଗର ବୁଦୁଳି ଗାଁର ଜଣେ ମହିଳାଙ୍କ କ୍ଷେତ୍ରରେ ଘଟିଥିଲା ।