ଚାଷୀଙ୍କ ପାଇଁ ଦୁଃଖ ପାଲଟିଛି ହାତୀ ନଦୀ। ଗତିପଥ ବଦଳାଇ ଚାଷ ଜମିଆଡେ ମାଡିଯାଉଛି ନଦୀ

କନକ ବ୍ୟୁରୋ: କୂଳ ଖାଉଛି ହାତୀ ନଦୀ । ଫଳରେ ଜମି ଥାଇ ବି ଭୂମିହୀନ ହୋଇଛନ୍ତି ଚାଷୀ । କଳାହାଣ୍ଡି ଜୁନାଗଡରେ ହାତୀ ନଦୀ ଅନ୍ୟ ଦିଗକୁ ମାଡି଼ଯାଉଛି । ଫଳରେ ଚାଷୀ ମୁଣ୍ଡରେ ହାତଦେଇ ବସିଛନ୍ତି । ହାତୀ ନଦୀରୁ ପାଣି ନେଇ ଚାଷ କାମ କରିଥାନ୍ତି ଚାଷୀ । ହେଲେ ନଦୀ ଦିଗ ବଦଳାଇଥିବାରୁ ୩ଶହ ଏକର ଚାଷ ଜମି ବାଲିଚର ପାଲଟିଛି । ଚାଷ ହୋଇପାରୁନାହିଁ, ତେଣୁ ଚାଷ କାମ ଛାଡି ଚାଷୀ ଦାଦନ ଖଟି ଯିବାକୁ ସଜବାଜ ହେଉଥିବା କହିଛନ୍ତି ।

ଜମି ଥାଇ ବି ଚାଷ କାମ ହୋଇପାରୁନାହିଁ । କାରଣ ବର୍ଷ ସାରା ଚାଷ ପାଇଁ ପାଣି ଯୋଗାଉଥିବା ହାତୀ ନଦୀ ଏବେ ଦିଗ ବଦଳାଇ ଦେଇଛି । ନଦୀ ଗତିପଥ ବଦଳାଉଥିବାରୁ ଏହାର ସ୍ଥାୟୀ ସମାଧାନ ପାଇଁ ଚାଷୀ ବାରମ୍ବାର ଅଭିଯୋଗ କରିଛନ୍ତି । ତଥାପି ୨୦ ବର୍ଷ ହେଲା ଏହାର ସମାଧାନ ହେଉନାହିଁ । ପ୍ରଶାସନିକ ଅଧିକାରୀ ଓ ରାଜନେତା ସେମାନଙ୍କ ସମସ୍ୟା ବୁଝୁନଥିବା ଅଭିଯୋଗ ହୋଇଛି । ନଦୀରେ କୂଳ ଖାଉଥିବାରୁ ନଦୀ କଡରେ ଥିବା ମନ୍ଦିରକୁ ଯିବା ପାଇଁ ଲୋକ ଭୟ କରୁଛନ୍ତି ।