କନକ ବ୍ୟୁରୋ: ଗାଁର ଶିକ୍ଷିତା ଝିଅ ଯେବେ ଗରିବୀର ଗାର ଡେଇଁ ଆଗକୁ ବଢ଼ିପାରେନି । ପରିବାରର ମେରୁଦଣ୍ଡ ବୋଲାଉଥିବା ବାପା ଯେବେ ରୋଗାଗ୍ରସ୍ତ ହୋଇପଡନ୍ତି । ସେତେବେଳେ କଲମ ଧରିଥିବା ହାତ ଧରିନିଏ ରେଞ୍ଚି ଆଉ ଛୁଞ୍ଚି । ସଂଘର୍ଷକୁ ସାମ୍ନା କରିବା ପାଇଁ ସମୟ ତାକୁ ସଜାଇ ଦିଏ ସାଇକେଲ ଓ ଛତା ମେକାନିକ୍ । କିଛି କାହାଣୀ ଆପଣଙ୍କୁ ନକହିଲେ ବି ଖାଲି ସେ କାହାଣୀର ଦୃଃଖ, ଦୁର୍ଦ୍ଦଶାର ଦୟନୀୟ ଦୃଶ୍ୟକୁ ଦେଖିଲେ ହିଁ ଅନୁଭବ କରିହୁଏ । ଜୀବନ ଜିଇଁବା ପ୍ରକୃତରେ କେତେ କଷ୍ଟ ଓ ସଂଘର୍ଷର ସଜ୍ଞା କ’ଣ ତାହା ଆଜି ସଙ୍ଗୀତାଙ୍କ କାହାଣୀରୁ ଜାଣିପାରିବେ…
Kanak News is now on WhatsApp
Join and get latest news updates delivered to you via WhatsApp
ଭଦ୍ରକ ଭଣ୍ଡାରୀପୋଖରୀ ରାମଚନ୍ଦ୍ରପୁର ପଞ୍ଚାୟତ ପର୍ବତୀ ଗାଁର ସଙ୍ଗୀତା ବାରିକ । ରୋଜଗାରକ୍ଷମ ବାପା ଯେବେ ରୋଗାଗ୍ରସ୍ତ ହୋଇପଡିଲେ ସେବେଠୁ ତାଙ୍କ ପାଠ ପଢ଼ାରେ ବେଡ଼ି ଲାଗିଛି । ମାଆଙ୍କ ଔଷଧ ସହ ସାନ ଭାଇର ପାଠ ପଢ଼ା ଖର୍ଚ୍ଚ ଏବେ ସାଇକେଲ ଓ ଛତା ମରାମତି ଉପରେ ନିର୍ଭର କରୁଛି । କଷ୍ଟେ ମଷ୍ଟେ ଯାହା ବି ମିଳୁ ଗାଁ ମୁଣ୍ଡ ଛକରେ ସାଇକେଲ ଓ ଛତା ସଜାଡ଼ି ପୂରା ପରିବାର ପେଟ ପୋଷୁଛି +୨ ପଢ଼ିଥିବା ଝିଅ । କାହା ପାଖରେ ହାତ ନପତାଇ, ଦଇବ ଦେଇଥିବା ଦୁଃଖକୁ ଆପଣାଇ ଦମ୍ଭର ସହ ସାମ୍ନା କରୁଛି ସଙ୍ଗୀତା ।
ବାପା ବିଶ୍ୱମ୍ବର ବାରିକ, ଚର୍ମ ଜନିତ ରୋଗରେ ପୀଡ଼ିତ ହୋଇଥିବାବେଳେ ରୋଗୀଣା ଜେଜେ ମାଆର ମେଡିସିନ ବୋଝ ବି ସଙ୍ଗୀତା ସମ୍ଭାଳୁଛି । ଗତବର୍ଷ +୨ ଶେଷ କରିବା ପରେ ପାଠ ପଢ଼ିବାକୁ ଆହୁରି ଇଚ୍ଛା ଥିଲେ ବି ଭାଗ୍ୟ ନେଲା ଜୀବନ-ଯନ୍ତ୍ରଣାର ପରୀକ୍ଷା । ଗରିବୀ ସାଙ୍ଗକୁ ପରିବାର ସଦସ୍ୟଙ୍କ ରୋଗାଗ୍ରସ୍ତ ବୋଝ ତାକୁ ପାଠ ଛାଡ଼ିବାକୁ ବାଧ୍ୟ କରିଦେଲା । ସାଇକେଲ ଓ ଛତାର ମରାମତିର ଚାହିଦା ବି ବେଶ୍ କିଛି ନାହିଁ, ତେଣୁ ସରକାରଙ୍କ ରାସନ ସାମଗ୍ରୀ ପରିବାରର ଭୋକର ଭୂଗୋଳକୁ କେତେ ବା ବଦଳାଇବ?
ସଙ୍ଗୀତାଙ୍କ ଦୁଃଖ ଏତିକିରେ ସରିନି । କ’ଣ ଦୁଇ ମୁଠା ଖାଇଦେଲେ ଭୋକକୁ ଲୁଚେଇ ହେବ କିନ୍ତୁ ଭେକ ପାଇଁ ଦରକାର ଗୋଟେ ଘର । ଯାହାକି ଏହି ୫ ପ୍ରାଣୀ କୁଟୁମ୍ବଙ୍କ ଭାଗ୍ୟରେ ନାହିଁ, ମାଟି ଝାଟି ଘରେ ମୁଣ୍ଡ ଗୁଞ୍ଜିବା ସହ ସକରାରଙ୍କ ଶୁଭ ଦୃଷ୍ଟିକୁ ଚାହିଁ ବସିଛି ପୂରା ପରିବାର ।
ସତରେ ସଂଗୀତା ସଂଘର୍ଷର ସୀମାକୁ ପ୍ରତିଦିନ ମାପୁଛନ୍ତି । ପ୍ରଶାସନର ନଜର ପଡୁ କି ନପଡୁ ସେ କିନ୍ତୁ ନିଜ ଗୋଡ଼ରେ ଛିଡ଼ା ହୋଇ ଦୁନିଆକୁ ଦେଖାଇଛନ୍ତି । ଦୁଃଖ ଭିତରେ ଦମ୍ଭକୁ ନଦୋହଲାଇ ପରିବାରର ସବୁ ବୋଝକୁ ସାଇକେଲ ଓ ଛତା ତଳେ ସମ୍ଭାଳିଛନ୍ତି । ଏଭଳି ସାହାସୀ ଓ ଶିକ୍ଷିତା ଝିଅକୁ ଆମେ ସଲାମ୍ କରୁଛୁ ଆଉ ସରକାର ହୁଏତ ଏ ଖବର ଦେଖିଲେ ସହାୟତା କରିବେ ବୋଲି ଆଶା ରଖିଛୁ ।