କନକ ନ୍ୟୁଜରେ ଖବର ପ୍ରସାରଣ ପରେ ସ୍କୁଲ ଲିଭିଂ ସାର୍ଟିଫିକେଟ ନୀତିରେ ପରିବର୍ତନ କଲେ ଗଣଶିକ୍ଷା ବିଭାଗ । ଏଣିକି ଏସଏଲସି ହଜିଲେ ମିଳିବ ଡୁପ୍ଲିକେଟ୍ ସାର୍ଟିଫିକେଟ । ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କୁ ରାଜ୍ୟ ସରକାରଙ୍କ ନିର୍ଦ୍ଦେଶ ।
କନକ ବ୍ୟୁରୋ : କନକ ନ୍ୟୁଜର ପ୍ରଭାବ । ସ୍କୁଲ ଲିଭିଂ ସାର୍ଟିଫିକେଟ ହଜିଗଲେ ଏଣିକି ଆଉ ଛାତ୍ର ଛାତ୍ରୀଙ୍କୁ ହଇରାଣ ହେବକୁ ପଡିବନି । ସତ୍ୟପାଠ ଦାଖଲ କଲେ ତାଙ୍କୁ ସ୍କୁଲ ଲିଭିଂ ସାର୍ଟିଫିକେଟ ବା ଏସଏଲସି ନକଲ ମିଳିପାରିବ । ଏନେଇ ରାଜ୍ୟ ସ୍କୁଲ ଓ ଗଶଶିକ୍ଷା ବିଭାଗ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି ।
Kanak News is now on WhatsApp
Join and get latest news updates delivered to you via WhatsApp
ଯଦି ସ୍କୁଲ ଲିଭିଂ ସାର୍ଟିଫିକେଟ ହଜିଯାଏ, ତେବେ ଏଫଆଇଆର ଆଧାରରେ କିମ୍ବା କୈାଣସି କାରଣରୁ ନଷ୍ଟ ହୋଇଗଲେ ଉପଯୁକ୍ତ ପ୍ରମାଣ ସହ ସତ୍ୟପାଠ ଦାଖଲ କଲେ ଏଣିକି ଏସଏଲସିର ନକଲ ମିଳିପାରିବ । ଆମେ ଗତ ତିନି ଦିନ ଧରି ସ୍ମିତାଲିଙ୍କ କାହାଣୀ ଦେଖାଆସିଥିଲୁ । ସ୍ମିତାଲିଙ୍କ ସ୍କୁଲ ଲିଭିଙ୍ଗ ସାର୍ଟିଫିକେଟ ହଜିବା କାରଣରୁ ସେ ତିନି ବର୍ଷ ହେଲା ପାଠପଢ଼ାରୁ ବଂଚିତ ହୋଇଛନ୍ତି । ସୋମବାର ରମାଦେବୀ କଲେଜରେ ଆଡମିଶନ କରିବାକୁ ଯାଇ ବିଫଳ ହେବା ପରେ ଏହି ଖବର କନକ ନ୍ୟୁଜ ସାମନାକୁ ଆସିଥିଲା । ଏହାପରେ ଗଣଶିକ୍ଷା ମନ୍ତ୍ରୀ, ସ୍ମିତାଲିଙ୍କୁ ସ୍କୁଲ ଲିଭିଙ୍ଗ ସାର୍ଟିଫିକେଟ ଦୁଇ ଦିନ ମଧ୍ୟରେ ଦିଆଯିବ ବୋଲି କହିଥିଲେ ।
ଆଉ ଏସବୁ ଭିତରେ ସରକାର ନିୟମରେ ପରିବର୍ତନ କରିଛନ୍ତି । ଏଣିକି ସ୍କୁଲ ଲିଭିଂ ସାର୍ଟିଫିକେଟ ହଜିଗଲେ ଆଉ କ୍ୟାରିୟର ଅଟକିଯିବ ନାହିଁ । ବରଂ ନିୟମ ଅନୁଯାୟୀ ସହଜରେ ଏସଏଲସିର ନକଲ ମିଳିପାରିବ । ଆଶା କରିବା ସରକାର ନିଜ ନିୟମରେ ଯେଉଁ ସଂସ୍କାର ମୂଳକ ପଦକ୍ଷପ ଆଣିଲେ ଏହାଦ୍ୱାରା ସ୍ମିତାଲିଙ୍କ ସମେତ ଅନ୍ୟ ଯେଉଁମାନେ ମଧ୍ୟ ଏଭଳି ସମସ୍ୟା ଦେଇ ଗତି କରୁଛନ୍ତି ସେମାନଙ୍କ ସମସ୍ୟାର ସମାଧାନ ହେବ ।