ମମିତାଙ୍କ ପରିବାରକୁ ଭେଟିଲେ କଂଗ୍ରେସର ଦିଲ୍ଲୀ ଟିମ୍ । ସୂର୍ଯ୍ୟେୱାଲା କହିଲେ, ପରିବାରର କାନ୍ଦ ଶୁଣିଲେ ଶୋଇପାରିବେନି ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ମମିତା ମେହେର ହତ୍ୟା ମାମଲାରେ ସତେ ଯେମିତି ବିରୋଧୀଙ୍କୁ ସଞ୍ଜୀବନୀ ମିଳିଛି । ପ୍ରାୟ ପ୍ରତ୍ୟେକ ଦିନ ରାସ୍ତାକୁ ଓହ୍ଳାଇ ବିକ୍ଷୋଭ ଓ ପ୍ରତିବାଦ କରୁଛନ୍ତି ବିରୋଧୀ । ଖାଲି ସେତିକି ନୁହେଁ ଏହି ଘଟଣାରେ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ଇସ୍ତଫା ମଧ୍ୟ ଦାବି କରୁଛନ୍ତି । କିନ୍ତୁ ଆଶ୍ଚର୍ଯ୍ୟଜନକ ଭାବେ ସରକାର ନୀରବ ରହୁଛନ୍ତି । ବରିଷ୍ଠ କଂଗ୍ରେସ ନେତା ରଣଦୀପ ସୁର୍ଯ୍ୟେୱାଲା ଓ ଚେଲ୍ଲାକୁମାରଙ୍କ ନେତୃତ୍ୱରେ ଦଳର ଏକ କେନ୍ଦ୍ରୀୟ ଟିମ ମମିତାଙ୍କ ପରିବାରବର୍ଗଙ୍କୁ ଭେଟିଥିଲେ । ତାଙ୍କୁ ଭେଟିବା ପରେ ସୂର୍ଯ୍ୟେୱାଲା କହିଥିଲେ, ପରିବାରର କାନ୍ଦ ଯଦି ମୁଖ୍ୟମନ୍ତ୍ରୀ ଦେଖିବେ, ତେବେ ତାଙ୍କୁ ରାତିରେ ନିଦ ହେବନାହିଁ ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ବର୍ଷ ଭିତରେ ବୋଧହୁଏ କୌଣସି ଘଟଣାକୁ ନେଇ ବିରୋଧୀ ଏମିତି ପ୍ରତିବାଦ କରିଥିବା ଦେଖିବାକୁ ମିଳିନଥିଲା । କିନ୍ତୁ ମମିତା ମେହେର ହତ୍ୟାକାଣ୍ଡ ମାମଲାରେ ଉଭୟ ବିରୋଧୀ କଂଗ୍ରେସ ଓ ବିଜେପି ୯ ଦିନ ହେଲା ଜାରି ରଖିଛନ୍ତି ଆନ୍ଦୋଳନ । ଭୁବନେଶ୍ୱରରୁ ଭବାନୀପାଟଣା, ବଲାଙ୍ଗୀରରୁ ବ୍ରହ୍ମପୁର ସବୁଠି ଚାଲିଛି ପ୍ରତିବାଦ, ଶୋଭାଯାତ୍ରା, ବିକ୍ଷୋଭ ।
ବିରୋଧୀଙ୍କ ଆନ୍ଦୋଳନ ତୀବ୍ର ହୋଇଥିଲେ ମଧ୍ୟ ମନ୍ତ୍ରୀ ଦିବ୍ୟଶଙ୍କରଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇ ନାହାଁନ୍ତି ସରକାର । ଏହାକୁ ନେଇ ବିରୋଧୀ ଆହୁରି ଆକ୍ରମଣାତ୍ମକ ହୋଇପଡିଥିବା ଦେଖିବାକୁ ମିଳୁଛି । ଆନ୍ଦୋଳନରେ ସାମିଲ ହୋଇଛନ୍ତି କଂଗ୍ରେସର କେନ୍ଦ୍ରୀୟ ନେତା । ଦଳର ବରିଷ୍ଠ ନେତା ରଣଦୀପ ସୂର୍ଯ୍ୟେବାଲା ଓ ଡି ଚେଲ୍ଲାକୁମାର ମମିତାଙ୍କ ଗାଁକୁ ଯାଇ ତାଙ୍କ ପରିବାରକୁ ଭେଟିଛନ୍ତି । ଆଉ ତାଙ୍କୁ ଭେଟିବା ପରେ ତଦନ୍ତକୁ ନେଇ ପ୍ରଶ୍ନ ଉଠାଇଛି କଂଗ୍ରେସ । ଆଉ ଦାବି ରଖି କହିଛନ୍ତିି…
- ମନ୍ତ୍ରୀ ଦିବ୍ୟଶଙ୍କରଙ୍କୁ ପଦରୁ ବହିଷ୍କାର କରାଯାଉ, ତାଙ୍କ ବିରୋଧରେ ମାମଲା ରୁଜୁ ହେଉ
- ମାମଲାର ଏସଆଇଟି ତଦନ୍ତ ହେଉ
- ମମିତାଙ୍କ ପରିବାରକୁ ୧କୋଟି ଟଙ୍କା କ୍ଷତିପୂରଣ ଦିଆଯାଉ
ଅନ୍ୟପଟେ ମନ୍ତ୍ରୀ ଦିବ୍ୟଶଙ୍କର ମିଶ୍ର ଇସ୍ତଫା ଓ ସିବିଆଇ ତଦନ୍ତ ଦାବିରେ ବିଜେପି ପକ୍ଷରୁ ଭୁବନେଶ୍ୱର ଡିସିପି ଅଫିସ ଘେରାଉ କରାଯାଇଛି । ଶୋଭାଯାତ୍ରା କରିବା ସମୟରେ ବିଜେପି କର୍ମୀଙ୍କ ସହ ପୁଲିସ ସହ ଧସ୍ତାଧସ୍ତି ହୋଇଥିଲା । ସେହିପରି ଗଞ୍ଜାମ ଛତ୍ରପୁରରେ ଏସପି ଅଫିସ ଘେରାଉ କରିଛନ୍ତି ବିଜେପି କର୍ମୀ । ବ୍ୟାରିକେଡ ଭାଙ୍ଗି ଏସପି ଅଫିସକୁ ପଶିବାକୁ ଉଦ୍ୟମ କରିବାବେଳେ ବିଜେପି କର୍ମୀ ଓ ପୋଲିସ ମୁହାଁମୁହିଁ ହୋଇଥିଲେ । ସେହିପରି ମାଲକାନଗିରି ,ନବରଙ୍ଗପୁର ଓ ଗଜପତି ମନ୍ତ୍ରୀଙ୍କ ଇସ୍ତଫା ଦାବିରେ ପ୍ରତିବାଦ କରିଛି ବିଜେପି । ନୂଆପଡା ଓ ସୁବର୍ଣ୍ଣପୁରରେ ବନ୍ଦ ପାଳନ ହୋଇଛି ।
ବିରୋଧୀଙ୍କ ଅଭିଯୋଗ ନେଇ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ କିଶୋର ମହାନ୍ତି । କହିଛନ୍ତି, ଘଟଣାର ତଦନ୍ତ ଚାଲିଛି । ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ । ଯିଏ ଦୋଷୀ ସିଏ ଦଣ୍ଡ ପାଇବ । ସୂଚନାଯୋଗ୍ୟ ଯେ, ମମିତା ମେହେର ହତ୍ୟାକାଣ୍ଡରେ ପୋଲିସର କାର୍ଯ୍ୟ ସବୁଠାରୁ ଅଧିକ ସନ୍ଦେହରେ ଥିବାବେଳେ, ପୋଲିସ ଡିଜି କିନ୍ତୁ ଚୁପ୍ ରହିଛନ୍ତି । ବିଧାନସଭା ଗୃହ ବିଭାଗର ଷ୍ଟାଣ୍ଡିଂ କମିଟି ବୈଠକରେ ଯୋଗ ଦେବାକୁ ଆସିଥିବାବେଳେ ଗଣମାଧ୍ୟମ ପ୍ରତିନିଧି ପ୍ରଶ୍ନ କରିଥିଲେ ବି କୌଣସି ଉତ୍ତର ନଦେଇ ଚାଲି ଯାଇଥିଲେ ଡିଜି ।