୫ ଲକ୍ଷ ଟପିଲା ଦେଶରେ କୋଭିଡ୍ ଜନିତ ମୃତ୍ୟୁ ସଂଖ୍ୟା: କୋଭିଡ୍ ମୃତ୍ୟୁ ରେକର୍ଡ ତାଲିକାରେ ବିଶ୍ୱର ତିନି ନମ୍ବର ସ୍ଥାନରେ ପହଁଚିଲା ଭାରତ
କନକ ବ୍ୟୁରୋ: ଦେଶରେ କମୁଛି କରୋନା ସଂକ୍ରମଣ କିନ୍ତୁ ବଢୁଛି ମୃତ୍ୟ ସଂଖ୍ୟା । ଦେଶରେ କୋଭିଡ ଜନିତ ମୃତ୍ୟୁ ସଂଖ୍ୟା ୫ ଲକ୍ଷ ପାରକରିଛି । ଯାହାକୁ ନେଇ କେନ୍ଦ୍ର ସରକାରଙ୍କ ଚିନ୍ତା ବଢିଛି । ସେପଟେ ଦେଶରେ ଆରୋଗ୍ୟ ହାର ୯୫.୪୯ ପ୍ରତିଶତ ଥିବା ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ତରଫରୁ ସୁଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ଧିମାଉଛି କରୋନା ସଂକ୍ରମଣ । ହେଲେ କମିବାର ନାଁ ନେଉନି କୋଭିଡ ଜନିତ ମୃତ୍ୟୁ ସଂଖ୍ୟା । ଗତ ୨୪ ଘଂଟା ମଧ୍ୟରେ ଭାରତରେ
– ୧, ୪୯,୩୯୪ ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି
– କରୋନା ମହାମାରୀରେ ୧,୦୭୨ ଜଣଙ୍କ ମୃତ୍ୟୁ ହୋଇଛି
ଏହାକୁ ମିଶାଇ ଦେଶରେ କୋଭିଡ ଜନିତ ମୃତ୍ୟୁ ସଂଖ୍ୟା ୫ ଲକ୍ଷ ପାର କରିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ତଥ୍ୟ ଅନୁସାରେ, ମୋଟ କରୋନା ଜନିତ ମୃତ୍ୟୁ ସଂଖ୍ୟା ୫ ଲକ୍ଷ ୫୫ ରେ ପହଂଚିଛି । ଏହା ସହିତ କରୋନା ମହାମାରୀରେ ମୃତ୍ୟୁ ସଂଖ୍ୟା ତାଲିକାରେ ବିଶ୍ୱରେ ଭାରତ ତୃତୀୟ ସ୍ଥାନରେ ପହଁଚିଛି ଭାରତ । କରୋନା ଜନିତ ମୃତ୍ୟୁରେ ଆମେରିକା ପ୍ରଥମ ଥିବା ବେଳେ ବ୍ରାଜିଲ ଦ୍ୱିତିୟ ରେ ରହିଛି । ସେହିପରି ଭାରତର ସଂଖ୍ୟା ତୃତିୟ ସ୍ଥାନରେ ରହିଛି ।
– ଆମେରିକାରେ ୮,୯୬,୫୫୭ ଜଣ ରୋଗୀ କରୋନା କାରଣରୁ ପ୍ରାଣ ହରାଇଛନ୍ତି
– ବ୍ରାଜିଲରେ ୬,୩୦,୩୦୧ ଜଣ ରୋଗୀଙ୍କ କୋଭିଡରେ ମୃତ୍ୟୁ ହୋଇଛି
– ଭାରତରେ କରୋନା ମୃତ୍ୟୁ ସଂଖ୍ୟା ୫,୦୦,୦୫୫ ରେ ପହଂଚିଛି
କରୋନାର ତୃତୀୟ ଲହରକୁ ସାମ୍ନା କରୁଛି ଦେଶ । ଲଗାତାର ଗୋଟିଏ ସପ୍ତାହ ଧରି କରୋନା ମାମଲା ଏକ ଲକ୍ଷ ଉପରେ ରହୁଛି । ଯାହାକୁ ନେଇ ସରକାର ମଧ୍ୟ ବିଭିନ୍ନ ସତର୍କ ସୂଚନା ଜାରି କରିଛନ୍ତି । କିନ୍ତୁ ଆଶ୍ୱସ୍ତିକର କଥା ଯେ ତୃତିୟ ଲହରରେ କରୋନାରେ ଆକ୍ରାନ୍ତ ହେଉଥିବା ଲୋକ ଖୁବ ଶୀଘ୍ର ସୁସ୍ଥ ମଧ୍ୟ ହେଉଛନ୍ତି । ସେହିପରି ବହୁତ କମ ରୋଗୀଙ୍କୁ ଡାକ୍ତରଖାନାରେ ଭର୍ତି ହେବାକୁ ପଡୁଛି । ଦେଶରେ ଗତ ୨୪ ଘଂଟାରେ ୨ ଲକ୍ଷ ୪୬ ହଜାର ୬୭୪ ଜଣ ଆକ୍ରାନ୍ତ କରୋନାରୁ ସୁସ୍ଥ ହୋଇଛନ୍ତି । ଅନ୍ୟପଟେ ଦେଶରେ ଆରୋଗ୍ୟ ହାର ୯୫. ୩୯ ପ୍ରତିଶତ ରହିଥିବା କେନ୍ଦ୍ର ସ୍ୱାସ୍ଥ ମନ୍ତ୍ରାଳୟର ତଥ୍ୟରୁ ଜଣାପଡିଛି ।
କରୋନା ମହାମାରୀ ସହିତ ଲଢେଇ ଏବେ ମଧ୍ୟ ଜାରି ରହିଛି । ମାକ୍ସ ପିନ୍ଧିବା, ସାମାଜିକ ଦୂରତା ପାଳନ କରିବା, ଅଧିକ ଭିଡ ନ କରିବା ଓ କରୋନା ସମସ୍ତ ଗାଇଡଲାଇନ କୁ ପାଳନ କଲେ ହିଁ ଦେଶ ମହାମାରୀ କବଳରୁ ମୁକୁଳି ପାରିବ ବୋଲି ବିଶେଷଜ୍ଞମାନେ କହି ଆସୁଛନ୍ତି ।