ଭୁବନେଶ୍ୱର କୋଳଥିଆ ନିଶା ନିବାରଣ କେନ୍ଦ୍ରର ଅନ୍ତେବାସୀଙ୍କ ମୃତ୍ୟୁକୁ ନେଇ ବଢୁଛି ସନ୍ଦେହ। ପିଟିପିଟି ମାରି ଦେଇଥିବା ଅଭିଯୋଗରେ ଥାନାରେ ଏତଲା।

କନକ ବ୍ୟୁରୋ: ନାଁ- ରାଜୀବ ଶ୍ରୀଚନ୍ଦନ, ବୟସ--୩୮ବର୍ଷ । ଘର-ଭୁବନେଶ୍ୱର ଡୁମଡୁମା । ଘରେ ବାପା ଓ ଭାଇ ଆରପାରିରେ । ପରିବାର କହିଲେ ମା’ ଓ ରାଜୀବ । ରାଜୀବ ଚାକିରି କରନ୍ତି । ହେଲେ ଧୀରେ ଧୀରେ ସେ ନିଶା କବଳରେ ପଡ଼ିଗଲେ । ହେଲେ ସେ ନିଜକୁ ସୁଧାରିବାକୁ ପଣ କଲେ, ଆଉ କୋଳଥିଆ ନିଷ୍ଠା ନିଶା ନିବାରଣ କେନ୍ଦ୍ରକୁ ଗଲେ ସୁଧାର ପାଇଁ । ଗତ ସପ୍ତାହ ତଳେ ସେ ନିଶା ନିବାରଣ କେନ୍ଦ୍ରରେ ଭର୍ତି ହୋଇଥିଲେ । ହେଲେ ଏଠାକୁ ଆସିବା ପୂର୍ବରୁ ନିଜ ସାଙ୍ଗକୁ କହିଥିଲେ ମା’ଙ୍କ ଦେଖାରଖା କରିବାକୁ । ରାଜୀବ କହିଥିଲେ ଶୀଘ୍ର ଭଲ ହୋଇ ଫେରିଆସିବେ । ହେଲେ ସେ ଆଉ ଫେରିଲେନି । ନିଶା ନିବାରଣ କେନ୍ଦ୍ରରୁ ସନ୍ଦେହ ଜନକ ଅବସ୍ଥାରେ ତାଙ୍କର ମୃତଦେହ ମିଳିଲା । ଏନେଇ ଖଣ୍ଡଗିରି ଥାନାରେ ଅଭିଯୋଗ କରିଛନ୍ତି ତାଙ୍କ ବନ୍ଧୁ । ରାଜୀବଙ୍କୁ ପିଟି ପିଟି ମାରିଦିଆଯାଇଥିବା ଅଭିଯୋଗ ହୋଇଛି ।

ଅନ୍ୟପଟେ ନିଷ୍ଠା ନିଶା ନିବାରଣ କେନ୍ଦ୍ର ପକ୍ଷରୁ କୁହାଯାଇଛି ଯେ, ଅସୁସ୍ଥତା କାରଣରୁ ରାଜୀବଙ୍କ ମୃତ୍ୟୁ ହୋଇଛି । ପୋଷ୍ଟମର୍ଟମ ରିପୋର୍ଟରୁ ସବୁ ସତ ସାମ୍ନାକୁ ଆସିବ ବୋଲି ନିଷ୍ଠା ନିବାରଣ କେନ୍ଦ୍ର କାଉନସେଲର କହିଛନ୍ତି । ନିଶା କବଳରୁ ମୁକ୍ତି ପାଇ ଭଲ ରାସ୍ତାକୁ ଫେରିବାକୁ ନିଶାଗ୍ରସ୍ତ ବ୍ୟକ୍ତି ନିଶା ନିବାରଣ କେନ୍ଦ୍ରକୁ ଯାଆନ୍ତି । ହେଲେ ଏବେ ନିଶା ନିବାରଣ କେନ୍ଦ୍ରକୁ ନେଇ ଗୋଟିଏ ପରେ ଗୋଟିଏ ଅଭିଯୋଗ ସାମ୍ନାକୁ ଆସିବାରେ ଲାଗିଛି । ଗତମାସରେ ଖୋର୍ଦ୍ଧା ଯାଆଁଳ ନିଶା ନିବାରଣ କେନ୍ଦ୍ରରେ ଅନ୍ତେବାସୀଙ୍କୁ କେମିତି ଅମାନବୀୟ ଭାବେ ମାଡ଼ ମରାଯାଉଥିଲା, ତାର ଭିଡିଓ ଭାଇରାଲ ହୋଇଥିଲା । ଏହାସହ କିପରି ନିଶା ନିବାରଣ କେନ୍ଦ୍ର ଆଳ କରି ନିର୍ଯାତନା ଦିଆଯାଉଛି ତାକୁ ନେଇ ମଧ୍ୟ ଅଭିଯୋଗ ହୋଇଥିଲ । ଅକ୍ଟୋବର ୧୭ରେ ପୁରୁଣା ଭୁବନେଶ୍ୱର ନିବାସୀ ବିଷ୍ଣୁ ଚରଣ ସାହୁ ଅଭିଯୋଗ ଆଣିଥିଲେ ଯେ, ସମ୍ପତି ହଡ଼ପ ପାଇଁ ନିଶାନିବାରଣ କେନ୍ଦ୍ରରେ ଭର୍ତି କରିଥିଲେ ତାଙ୍କ ନିଜ ଭାଇ । ୧୧ ମାସ ଧରି ଅକଥନୀୟ ଅତ୍ୟାଚାର ସହିବା ପରେ ଜମି ରେଜେଷ୍ଟ୍ରୀ କରିବା ପରେ ମୃତ୍ୟୁ ଯନ୍ତାରୁ ମୁକୁଳିଥିଲେ । ନିଶା ନିବାରଣ କେନ୍ଦ୍ର ଗୁଡ଼ିକ ବିରୋଧରେ ଅଭିଯୋଗର ଫର୍ଦ୍ଦ ବଢ଼ୁଥିବା ବେଳେ ପ୍ରଶାସନର କଡ଼ା ନଜର ଜରୁରୀ ହୋଇପଡ଼ିଛି ।