ଘରକୁ ଯାଇପାରିଲାନି ମୃତଦେହ। ସତ୍ୟନଗର ଶ୍ମଶାନରେ ହେଲା ସଂସ୍କାର
କନକ ବ୍ୟୁରୋ: ଭୀମ ଚୌଧୁରୀ, ଘର: ଝାଡ଼ଖଣ୍ଡ । ବିପୁଲ ରାୟ, ଘର: ପଶ୍ଚିମବଙ୍ଗ । ସୁଜିତ କୁମାର, ଘର: ବିହାର । ଇଏ ଏଭଳି କିଛି ବ୍ୟକ୍ତିଙ୍କ ନା’ ଓ ପରିଚୟ, ଯାହାଙ୍କର ଶବ ଠିକଣା ସ୍ଥାନରେ ପହଂଚିବାକୁ ଗୋଟିଏ ମାସ ଧରି ପରିବାର ଲୋକଙ୍କୁ ଅପେକ୍ଷା କରିବାକୁ ପଡ଼ିଛି । ଡିଏନଏ ପରୀକ୍ଷାରେ ଯାହାଙ୍କର ଶବ ଚିହ୍ନଟ ହୋଇପାରିଛି, ସେମାନଙ୍କ ସମ୍ପର୍କୀୟ ଶବ ନେଇ ଯାଉଛନ୍ତି, ଆଉ ଯାହାର ଚିହ୍ନଟ ହୋଇପାରିନି ସେମାନଙ୍କୁ ଆହୁରି ଅପେକ୍ଷା କରିବାକୁ ପଡ଼ିବ । ବାହାନଗା ଦୁର୍ଘଟଣାକୁ ଏହାରି ଭିତରେ ଗୋଟିଏ ମାସ ପୁରିଯାଇଥିଲେ ବି ଦୁଃଖ ଯାଇନି ।
Kanak News is now on WhatsApp
Join and get latest news updates delivered to you via WhatsApp
ଘରକୁ ନେଇ ଅନ୍ତିମ ସଂସ୍କାର କରିବା ସମ୍ଭବ ନଥିବାରୁ ଆଜି ଭୁବନେଶ୍ୱର ଶ୍ମଶାନରେ ଦୁଇଟି ମୃତଦେହର ଅନ୍ତିମ ସଂସ୍କାର କରିଛନ୍ତି ମୃତକଙ୍କ ସମ୍ପର୍କୀୟ । ଝାଡ଼ଖଣ୍ଡ ଓ ବିହାରର ଦୁଇଟି ପରିବାର ଏତେ ଦୂର ମୃତଦେହ ନେବାକୁ ରାଜି ନହେବାରୁ ଓଡ଼ିଶାରେ ଶେଷକୃତ୍ୟ କରାଯାଇଛି । ଝାଡ଼ଖଣ୍ଡର ଦିନେଶ ଯାଦବ ଏବଂ ବିହାରର ସୁରେଶ ରାୟଙ୍କ ଶେଷକୃତ୍ୟ ଭୁବନେଶ୍ୱରରେ କରାଯାଇଛି ।
ଏସବୁ ଭିତରେ ଭୁବନେଶ୍ୱର ଏମ୍ସରେ ଥିବା ୮୧ଟି ମୃତଦେହ ଭିତରୁ ୧୯ ଜଣଙ୍କ ଶବ ଚିହ୍ନ ହୋଇଛି । ଡିଏନଏ ସାମ୍ପୁଲ ମ୍ୟାଚ କରିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ତେବେ ବଳକା ମୃତଦେହକୁ ମାଇନସ ୧୮ ଡିଗ୍ରୀ ତାପମାତ୍ରାରେ ଶବଗୁଡିକୁ ସଂରକ୍ଷିତ କରି ରଖାଯାଇଛି ।
ଭୁବନେଶ୍ୱରର ଏମ୍ସରେ ଏବେ ବି ପଡ଼ିରହିଛି ମୃତଦେହ । ସଂପୂର୍ଣ୍ଣ ଡିଏନଏ ରିପୋର୍ଟ ଆସିଲେ, ସମ୍ପର୍କୀୟଙ୍କୁ ଶବ ହସ୍ତାନ୍ତର କରାଯିବ । ଥରେ ଚିନ୍ତା କରନ୍ତୁ କେଉଁ ମାନସିକତା ଭିତରେ ଦିନ କାଟୁଥିବେ ମୃତକଙ୍କ ପରିବାର ।